1 TUI 2
2
Tatau vei Solomoni o Tevita
1Ni roro voleka mai na siga me mate kina o Tevita, a sa qai tatau vei Solomoni na luvena, ka kaya, 2“Au sa na lako ena sala era na lakova kece na kai vuravura. Mo kaukauwa ka qaqa, 3ka talairawarawa ki na veika sa vakarota ko Jiova na nomu Kalou. Mo muria na nona lawa kei na i vakaro kece sara, me vaka sa volai ena Lawa i Mosese, me rawa ni o rawata vinaka na veika kece sara o qarava ena veivanua kece o gole kina. 4Ena qai vakataudeitaka ko Jiova na nona vosa sa tukuna oti vei au, ni a kaya, ‘Kevaka era na raica vinaka na nodra i valavala o ira na luvemu, me ra lako e mataqu ena yalodina kei na lomadra taucoko kei na vu ni yalodra taucoko, ena sega ni muduki na nomu kawa me dabe ena i tikotiko vakatui e Isireli.’
5“Ia o sa kila talega na ka sa kitaka vei au o Joape na luve i Seruwaia ena nona a vakamatea e rua na turaganivalu ni Isireli, o ya o Epineri na luve i Neri kei Amasa na luve i Jica. O na nanuma vinaka ni a vakayacori na veivakamatei oqo ena gauna ni veisaututaki ena vuku ni kena saumi lesu na nodrau a veivakamatei na turaganivalu ena gauna ni veivaluvaluti. Ena ka oqo, sa vakamatea kina o koya e rua na tamata tawa cala, ka'u sa ciqoma na kena veibeitaki oi au, ka sotava kina na kena leqa.#2Samu 3.27; 20.10 6Sa matata vei iko na ka mo vakayacora; mo kakua ni vakatara me mate ga vakadodonu o koya.
7“Ia mo caka vinaka ena yalodina vei iratou na luve i Basiliai na kai Kiliati, ka me ratou tiko kei ira era kana mai na nomu teveli, baleta ni ratou a caka vinaka vei au ena gauna ka'u a dro voli kina mai vei Apisalome na tuakamu.#2Samu 17.27-29
8“Raica, e tiko talega vata kei iko o Semeai na luve i Kira mai na koro o Peurimi ena vanua o Penijamini. A sa rukaki au vakaca sara o koya ena siga ka'u a lako kina ki Meneimi; ia, ena nona a sotavi au mai na Uciwai na Joritani, au a qai bubului vua ena yaca i Jiova, ka kaya, ‘Au na sega ni vakamatei iko ena i seleiwau.’#2Samu 16.5-13; 19.16-23 9Ia kakua ni vakatara o iko me lako yani ena galala ka sega ni totogitaki. O sa na kila ga na ka mo vakayacora, ni sa nomu i tavi mo raica na nona vakamatei.”
Na Mate i Tevita
10A sa mate o Tevita, ka sa la'ki bulu ena Koro i Tevita. 11E 40 taucoko na nona yabaki ni veiliutaki vakatui e Isireli; sa tui mai Epironi me yabaki vitu ka 33 na yabaki mai Jerusalemi.#2Samu 5.4-5; 1Vei 3.4 12Sa qai sosomitaki Tevita na tamana o Solomoni ena i tikotiko vakaturaga, ka sa vakataudeitaki na nona veiliutaki vakatui.#1Vei 29.23
Na Mate i Atonaija
13A sa qai lako yani o Atonaija na luve i Akici vei Vaciseva na tina i Solomoni. A sa taroga sara o Vaciseva, “O sa lako mai vakasavasava, se segai?”
A sa sauma o koya, “Io, au sa lako mai vakasavasava.” 14A sa qai kaya tale o koya, “E dua na ka au via taroga tiko vei iko.”
A taroga lesu o Vaciseva, “Na cava o ya?”
15A qai kaya o koya, “O sa kila vinaka ni a dodonu me'u a buli me tui, ka ra sa nanamaki tu kina na vanua taucoko o Isireli. Ia, sa qai sega ni vakakina, ka sa yaco me tui na taciqu, baleta ni sa lewa vakaoqo ko Jiova. 16Ia oqo, sa dua bulu ga na ka au sa kerea vei iko, mo kakua ni bureitaka vei au.”
A taroga lesu o Vaciseva, “Na cava o ya?”
17A sa kaya o Atonaija, “Au kerea mo la'ki vosa mada vei Solomoni na tui, ka'u kila ni na sega ni bureitaka vei iko; o ya me soli Avisaki vei au, o koya na yalewa ni Sunemi, me watiqu.”#1Tui 1.3-4
18A sa kaya o Vaciseva, “Sa vinaka, au na vosa vua na tui ena vukumu.”
19A lako o Vaciseva vei Solomoni na tui me la'ki vosa vua ena vuku i Atonaija. A tucake na tui me la'ki tavaki koya, ka cuva vua, ka tiko sobu ena nona i tikotiko vakaturaga, ka solia e dua na i dabedabe me dabe kina na marama tinana; a qai dabe o koya ena yasana i matau. 20A sa kaya o Vaciseva, “E dua na kerekere lailai au kauta tiko mai vei iko; au kerea mo kakua ni bureitaka vei au.”
A taroga lesu na tui, “I Tinaqu, na cava o ya? Au na sega ni bureitaka vei iko.”
21A sa kaya o Vaciseva, “Me soli o Avisaki na yalewa ni Sunemi vei Atonaija na tuakamu me watina.”
22A sa tarogi tinana lesu o Solomoni na tui ka kaya, “A cava na vuna o sa kerea kina na yalewa ni Sunemi o Avisaki me nei Atonaija? E vakacava mo sa kerea talega na i tutu vakatui me sa nona! O koya na tuakaqu; de vinaka mo sa kerea talega na veika me baleti Epaiaca na bete kei Joape na luve i Seruwaia e ratou to vata mai na yasana kadua!” 23A sa vosa bubului o Solomoni ena yaca i Jiova, ka kaya, “Me qai vakamatei au na Kalou kevaka au sega ni sauma lesu na cala levu oqo vei Atonaija me mate o koya ena vuku ni ka sa kerea oqo! 24Ia oqo, me vaka sa bula ko Jiova, o koya sa vakataudeitaki au ka vakatikori au ena i tikotiko vakaturaga i Tevita na tamaqu, ka solia vei au e dua na kawa me vaka sa yalataka o koya, ena vakamatei edaidai o Atonaija!”
25A sa qai talai Penaia na luve i Jioiata yani o Solomoni na tui; ka sa mokuti koya mate.
Na Vakatalai i Epaiaca kei na Mate i Joape
26A vosa vei Epaiaca na bete o koya na tui, ka kaya, “Mo lako tani ki Anacoci, ki na nomu vanua; ni sa dodonu mo mate. Ia au na sega ni vakamatei iko edaidai, ni o sa colata voli na Kato ni Veiyalayalati i Jiova ena mata i Tevita na tamaqu, ka o vakaivotavota vata kaya ena veika kecega ka vakararawataki kina.”#1Samu 22.20-23; 2Samu 15.24 27A sa vakasavi Epaiaca o Solomoni me kakua tale ni veiqaravi vakabete vei Jiova; oqo me vakayacori kina na vosa i Jiova me baleta na vuvale vakabete nei Ilai mai Sailo.#1Samu 2.27-36
28A sa rogoca o Joape na veika sa yaco oqo. (A solia na nona veitokoni vei Atonaija o koya, ka segai vei Apisalome.) Sa qai dro yani o Joape ki na vale tabu i Jiova, ka la'ki kubeta na muana momoto ena i tutu cecere e cake ni cabocabonisoro. 29Ni sa yacovi Solomoni na tui na i tukutuku me baleta na dro nei Joape ki na vale tabu i Jiova ka toka volekata na i cabocabonisoro, a sa talai Penaia na luve i Jioiata o Solomoni, ka kaya vua, “Lako, ka la'ki mokuti koya mate.” 30A sa lako ki na vale tabu i Jiova o Penaia, ka kaya vei Joape, “Sa vakarota na tui mo lako tani mai tuba.”
A sa kaya o Joape, “E segai; au na mate ga eke.”
A sa lesu tale o Penaia vua na tui ka vakadewataka vua na vosa i Joape.
31A sa kaya vua na tui, “Mo cakava ga na ka sa tukuna o Joape. Vakamatei koya ka la'ki buluti koya. Oqo ena vakavuna me'u vagalalataki kina kei ira na kawa i Tevita na tamaqu mai na i vesu ni ca ka vakayacora o Joape ena nona vakadavea na dra ni tamata tawa cala. 32Ena totogitaki Joape ko Jiova ena vuku ni veivakamatei oqo sa vakayacora ka sega ni a kila taumada o Tevita na tamaqu. A vakamatea o Joape e lewe rua na tamata tawa cala ka rau vinaka cake sara mai vua: o ya o Epineri na luve i Neri ka komada ni mataivalu ni Isireli, kei Amasa na luve i Jica ka komada ni mataivalu ni Juta. 33Na veisausaumi ni dra me baleta na nodrau vakamatei ena tau vei Joape kei ira na nona kawa me tawamudu. Ia ena tiko ga na vakacegu kei na sautu i Jiova ki na kawa i Tevita sa dabe tiko ena nona i tikotiko vakatui.”
34Sa qai lako cake o Penaia na luve i Jioiata ki na Vale i Jiova ka vakamatei Joape; a sa buluti koya ena nona vale ga sa volekata na vanua lala. 35A sa lesi Penaia o Solomoni na tui me komada ni mataivalu, me i sosomi kei Joape, ka sa lesi o Setoki na bete me i sosomi kei Epaiaca.
Na Mate i Semeai
36A sa talatala na tui me kacivi o Semeai, ka sa kaya vua, “Mo tara e Jerusalemi e dua na nomu vale mo tiko kina, ka mo kakua ni lako tani mai kea ki na dua tale na vanua. 37Kevaka o na lako yani ena dua na siga ka qalo kosova na uciwai o Kitironi, ia mo kila deivaki sara kina ni o na mate vakaidina; ia na nomu mate oqo sa na baleti iko ga.” 38A sa kaya o Semeai vua na tui, “Kemuni na tui, e sa donu vakavinaka oqori. Au na vakayacora na veika o ni sa vosa kina.” A sa tiko kina vakadede mai Jerusalemi o Semeai.
39Ia ni oti e tolu na yabaki, e rau a qai dro e lewe rua na tamata bobula i Semeai vua na tui Kaca o Akisa, na luve i Meka. Ni sa rogoca o Semeai na nodrau sa tiko mai Kaca na nona bobula, 40a sa ia o Semeai ka vakarautaka na nona asa, ka lako yani ki Kaca vei Akisa na tui, me qarai rau na nona bobula. A sa kunei rau ka kauti rau mai lesu tale mai ki na nona vale. 41Ia ni sa tukuni vei Solomoni ni sa lako o Semeai mai Jerusalemi ki Kaca ka lesu tale mai, 42a sa talatala me kacivi mai o Semeai, ka kaya vua, “Au a sega li ni vakabubuluitaki iko ena yaca i Jiova, ka vakarota vei iko ka kaya, ‘Mo kila deivaki sara ni o na mate vakaidina ena siga ga o lako tani kina, ka lako ki na dua ga na vanua? Ia o a kaya vei au, “Sa donu vakavinaka oqori; au na vakayacora na nomuni vosa.” 43A cava oqo o sa sega kina ni muria na nomu bubului vei Jiova, kei na i vakaro ka'u a vakarota vei iko?” 44A sa kaya tale vei Semeai na tui, “O sa kila na ka ca kecega sa tu e lomamu, na ka ca o a kitaka vei Tevita na tamaqu. Ena ka oqo, ena totogitaki iko kina ko Jiova. 45Ia ena vakalougatataki au o koya ka vakataudeitaka e matana na i tikotiko vakatui i Tevita ka tawamudu.” 46A vakarota na tui vei Penaia, na luve i Jioiata, me lako yani, ka mokuti koya mate.
Ena ka oqo, a sa qai taucoko na kena vakataudeitaki na matanitu ena liga i Solomoni.
Currently Selected:
1 TUI 2: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.