Siraki NA VUKU I JISU, LUVE I SIRAKI
NA VUKU I JISU, LUVE I SIRAKI
Na iVakamacala Taumada
Na iVola ni Vuku i Jisu, Luve i Siraki, e kilai raraba me Siraki se Ekelesiatiko. A vola taumada o Josua (se Jisu) e na vosa vakaIperiu, qai vakadewataka vaKirisi na makubuna. Na ivola qo e tu kina na nodra vakasama na Jiu, e totaka na vakabauta vakaJiu ni vakaraitaka ni Kalou sa lolomataka na vuku dina vei ira na nona tamata. E levu na veika vakalotu, itovo dodonu, kei na ivakasala e volai kina, vakabalavu e so, e so tale e na ivosavosa leleka.
E so na tikina e na iVola nei Siraki era yali e na levu na ilavelave makawa ni ivola qo. Na tikina kece qo era tabaki e ke e na matanivola kala (me vaka e na 1.5 kei na 1.7 e ra).
Na Lewenivola
Vosa taumada
Vakacerecerei na vuku (iwasewase 1) 1.1–23.27
a. iTavi, kena idole kei na veivakasalataki 1.1–16.23
b. Vuku vaKalou kei na kena tarai keda na tamata 16.24–23.27
Vakacerecerei o vuku (iwasewase 2) 24.1–50.21
a. Vuku kei na itovo vinaka 24.1–32.13
b. Vuku vaKalou, sokalou kei na cakacaka ni tamata 32.14–42.14
c. Na lagilagi ni Kalou e na veikabuli 42.15–43.33
d. Ra vakacerecerei na tubudra na Jiu 44.1–50.21
iTinitini kei na iKuri e so 50.22–51.30
Vosa taumada
E levu na vuli momona e taka mai vei keda e na Lawa, nodra ivola na Parofita, kei ira na muri mai, e kilikili kina meda vakacerecerei Isireli e na nona veituberi kei na yalomatua. E sega wale ga ni bibi vei ira na wilika mera vuli kina, e dodonu sara tale ga vei ira na guta na vuli mera vukei ira tale e so e na nodra vakadewataka yani vagusu se vakaivola. Sa mani vakauqeti gona kina na tukaqu o Jisu, ni sa vulica oti qai kenadau toka e na lawa, parofita, kei na nodra ivola tale e so na tubuda, me sa dua tale ga na nona ivola ni veituberi kei na yalomatua me ikuri ni vuli vei ira era guta na vuli, me qai uasivi kina nodra rokova tiko na lawa.
Oni sa vakadreti gona moni wilika e na yalogalala kei na mamakutu. Na kena vakadewataki keitou sa qarauna matua; ke mani so na tikina e sega ni matata, sa kerei kina na nomuni veivosoti. Na ka a volai taumada e na vosa vakaIperiu, e sega ni tautauvata sara ni vakadewataki i na dua tale na vosa. E sega ni ivola wale ga qo: na lawa sara mada ga, na parofita, kei na ivola tale e so, era se bau duidui toka nira se volai taumada.
Noqu mai tiko e Ijipita e na ika38 ni yabaki ni veiliutaki nei Euerekete, a levu toka na gauna galala meu vuli kina. Au a vakila ni dodonu meu ogataka na vakadewataki ni ivola qo e na yalomatua kei na maqosa, me oti qai tabaki me baleti ira na tu tani e tu vei ira na yalo ni via vuli kei na yalo ni via rokova na lawa
Currently Selected:
Siraki NA VUKU I JISU, LUVE I SIRAKI: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.