Jope Na i Vakamacala Taumada
Na i Vakamacala Taumada
Sa tukuni e Na i Vola kei Jope na kena i tukutuku e dua na tamata dodonu ka sotava na veika dredre ka mosimosi e nona bula me vaka na nodra mate kece na luvena, na yali ni veika e taukena, kei na kena tauvi koya na mate ca. Sa qai vakavotuya mai o koya ka vola taumada na i vola oqo e tolu na i wasewase ni vakayatuyatu vakaserekali me dusia kina na vakanananu i Jope kei ratou na nona i tokani voleka me baleta na leqa sa yacovi koya. A qai rairai sara e muri vei Jope na Kalou, o koya ka veivosakitaki tiko vakalevu ena nodratou veitalanoa o Jope kei iratou na nona i tokani voleka.
E ratou vakamacalataka na i tokani voleka i Jope na leqa e yaco vua mai na nodratou vakasama vakayalo, o ya ni Kalou e dau lomani ira ga na tamata vinaka ka cudruvi ira na tamata ca. Ena ka oqo, era nanuma kina ni vu ni nona kune rarawa tiko o Jope baleta ni tiko na nona i valavala ca. Ia, sa rui vovodea sara vei Jope na vakasama oqori; ka ni sega ni dodonu me yaco vua na veika rarawa oqo baleta ni kila o koya ni tamata dina ka dodonu. Ia, sa sega ga ni kila rawa se cava na vuna e vakatara kina na Kalou me yaco na veika mosimosi vakaoqo ki vua e dua me vakataki koya, ka mani doudou me vakataroga na veika oqo vua na Kalou. E tudei vinaka tu na vakabauta i Jope; ia, sa gadreva vakalevu sara me vakadonui ena mata ni Kalou ka me vinaka tu ga na kena i rogorogo ni sa tamata dodonu o koya.
A sega ni sauma na Kalou na lomatarotaro nei Jope; ia, sa dolea vinaka ga na vakabauta i Jope ena nona vakatakila vua na kaukauwa kei na vuku vakalou sa veivakadrukai. Ni oti o ya, sa qai vakadinadinataka o Jope ni Kalou levu e qarava sa rui vuku ka cecere sara; a mani veivutunitaka kina na vosa ni cudru kei na vosa vakacaca sa cavuta oti.
Sa qai tini na i tukutuku oqo ni sa vakalesui tale vei Jope na i tutu ni nona bula e liu; ia sa levu cake sara na veika e taukena mai na kena e liu. A vunauci ira na i tokani voleka i Jope na Kalou ena vuku ni nodra sega ni kila rawa na i balebale ni nona kune rarawa tiko o Jope. O Jope duadua ga e kila deivaki ni sa rui cecere cake dina ga na Kalou mai na veivakasama eso e nanumi me baleti koya.
Na Lewe ni Vola
Na vakayatuyatu taumada 1.1–2.13
O Jope kei ira na nona i tokani 3.1–31.40
a. Vosa vakacaca o Jope 3.1-26
b. Ai matai ni veivosaki 4.1–14.22
c. Na i karua ni veivosaki 15.1–21.34
d. Na i katolu ni veivosaki 22.1–27.23
e. Vakacaucautaki na vuku 28.1-28
f. Na i otioti ni tukutuku i Jope 29.1–31.40
A vosa i Ilaiu 32.1–37.24
Sa vosa vei Jope na Kalou 38.1–42.6
A kena i tinitini 42.7-17
Currently Selected:
Jope Na i Vakamacala Taumada: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.