Dauveilewai 2
2
Na Talaidredre i Isireli
1Sa qai lako cake na agilosi i Jiova mai Kilikali vaka ki Pokimi ka kaya, “Au a kauti kemuni mai Ijipita, ka kauti kemuni ki na vanua ka'u a yalataka vei ira na nomuni qase, au na sega ni voroka tale na noqu veiyalayalati kei kemuni. 2Mo ni kakua ni vakayacora e dua na veiyalayalati kei ira era sa tiko ena vanua oqo. Mo ni talaraka sobu na nodra i cabocabonisoro. Ia o ni sa sega ni talairawarawa ki na noqu i vakaro. O ni sa vakayacora ga na kena veibasai!#Lako 34.12-13; Vrua 7.2-5 3O koya oqo au sa kaya kina, “Au na sega ni vakatalai ira tani e matamuni, ia era na yaco me kemuni meca, kei na nodra kalou ena vakatarabetaki kemuni.” 4Ena gauna a cavuta kina na vosa oqo na agilosi i Jiova vei ira na Isireli, era sa vakatekivu me ra tagi na tamata. 5O koya oqo era sa vakatoka kina na vanua o ya me o Pokimi.#2.5 Pokimi: Na yaca oqo e kena i balebale vakaiperiu “o ira era sa tagi”. Era a vakacaboisoro vei Jiova mai kea.
Na Mate i Josua
6Ni sa vakatalai ira yani na tamata o Josua era a lako yani na Isireli ki na veivanua kecega era taukena. 7Na tamata kecega era sa qaravi Jiova ena siga kecega sa bula kina o Josua, kei na siga kecega era bula kina o ira na qase era bula balavu cake mai vei Josua, o ira ka sarava na cakacaka levu sa vakayacora o Jiova vei ira na Isireli. 8A sa mate o Josua na luve i Nuni, na tamata ni Kalou, ni sa 110 na nona yabaki. 9Ia era sa buluti koya ena i yalayala ni nona vanua o Timinaca Eresi ena veidelana e Ifereimi, vaka ki na vualiku ni ulunivanua o Keasi.#Josua 19.49-50 10Ia o ira na i tabatamata ka ra soqoni vata kei ira na nodra qase, kei na i tabatamata taravi ira era sa sega ni kilai Jiova se na cakacaka a cakava e Isireli o koya.
Sega ni Yalodina o Isireli
11Ia era sa vakayacora na Isireli na veika ca kecega ena mata i Jiova ka ra mani vuki tani kina me qaravi Peali. 12Era sa biuti Jiova na Kalou ni nodra qase, o koya ka kauti ira tani mai na vanua o Ijipita. Era sa vakamumuri ka qarava na nodra kalou na duidui tamata tani eso era bula vakavolivoliti ira. Na veika oqo sa tubu kina na cudru i Jiova. 13Era sa vakanadakui Jiova ka qaravi Peali kei Aseteroci. 14Ena ka oqo sa tubu kina na cudru waqawaqa i Jiova vei ira na Isireli, ka soli ira kina vei ira na dauvakacaca me vakalolomataki ira ka volitaki ira vei ira nodra meca era tiko vakavolivoliti ira, ka ni ra sa sega ni taqomaki ira rawa. 15Ni ra lako yani me ia na i valu, sa sega ni tiko kei ira na liga i Jiova ka yaco kina vei ira na veika ca kecega, me vaka sa tukuna oti o Jiova ni na yacovi ira. Sa ka levu sara na nodra vakaloloma.
16A sa qai vakatubura cake vei ira o Jiova eso na dauveilewai me sereki ira mai na nodra i vesu kaukauwa na dauveivakasaurarataki. 17Ia era sa sega ga ni via vakarogorogo vei ira na dauveilewai oqo, ka ni ra vinakata ga me muria na veikalou tani ka cuva me qaravi ira ka ra vuki tani kina mai na veisala kecega era sa muria na nodra qase, era sa talairawarawa ki na i vakaro i Jiova, ia era sa sega ga ni via muria na nodra i vakarau. 18Ena veigauna kecega a vakatubura kina o Jiova eso na dauveilewai me baleti ira, sa dau tiko o koya kei ira na dauveilewai, ka me sereki ira tani mai na ligadra na kedra meca ena veisiga kecega era bula kina, sa dau vakayavalati na loma ni Kalou me lomani ira ena nodra rarawa kei na nodra kudru ena veika era dau sotava. 19Ni ra mate na dauveilewai era sa lesu tale ka vakayacora na veika vakasisila ka ra sa sega ni dau vakayacora na nodra qase, me ra muria na veikalou tani ka qaravi ira ka cuva vei ira. Ia era sa sega ni biuta laivi na veitovo oqo ka ni a kaukauwa na lomadra kei na nodra sala. 20Ena vuku ni ka oqo a waqa kina na cudru i Jiova vei ira na Isireli, ka kaya vei ira, ni o ira, na tamata oqo era sa talaidredre ki na noqu veiyalayalati ka'u sa vakarota vei ira na nodra qase ka ra sega ni rogoca na domoqu. 21Au na sega tale ni vakatalai ira tani na veimatanitu kecega ka sa biuta tu o Josua ni bera na nona mate. 22Me rawa kina ni vakatovolei ira na Isireli se ra na yalodina se sega ni via muria na gaunisala i Jiova era sa muria na nodra qase. 23A laivi ira kina na veimatanitu oqo o Jiova ka sega ni vakatalai ira tani mai vei ira, ka sega talega ni soli ira vei Josua.
Currently Selected:
Dauveilewai 2: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.