Akeai 1
1
Sa Vakarota na Kalou me Tara Vou Tale na Valenisoro
1 #
Esera 4.24–5.2; 6.14 Ena i karua ni yabaki a tui Peresia tiko kina o Taraiasi, ena i matai ni siga ni kaono ni vula, a sa vosa o Jiova ena gusu i Akeai na parofita. Na i tukutuku o ya e nodrau na kovana e Juta, o Serupepeli na luve i Sialitieli kei na Bete Levu, o Josua na luve i Josateki.
2A sa kaya o Jiova ni lewevuqa vei Akeai, “Era sa kaya tiko na tamata oqo ni se sega ni kena gauna dodonu oqo me tara vou tale kina na Valenisoro.” 3Sa qai yaco na vosa i Jiova vei Akeai na parofita me kaya vakaoqo vei ira na tamata: 4“Kemuni na noqu tamata, a cava na vuna o ni sa tiko kina ena veivale tara vakavinaka ka laiva me rusa tu ga na noqu Valenisoro? 5Ni bau raica mada na veika sa yaco tiko vei kemuni! 6O ni a tea e levu sara na sila, ia na ka o ni tamusuka e lailai wale ga. E tu na kemuni kakana, ia e sega ga ni rauta mo ni mamau kina. E tu na waini mo ni gunuva, ia e sega ga ni rauta mo ni sinai kina. E tu na nomuni i sulu, ia e sega ga ni rauta me rawa kina mo ni katakata. Ia na tamata cakacaka e sega ni rawata rawa na i sau me bula kina. 7Ni raica na veika sa yaco tiko vei kemuni! 8Ni lako sara ga oqo ki na veidelana ka la'ki taya mai na kau ni vale. Dou tara vou na Valenisoro, au sa na qai marau, niu sa na qaravi tale me vaka e liu.
9“O ni a dau nuitaka me levu na ka e tamusuki, ia e dau yaco me lalai wale ga. Ia ni o ni sa dau yauta mai ki na koro na ka sa tamusuki, au a qai vakacaginataka tani.#1.9: au a qai vakacaginataka tani; se Au a vakacacana. A cava beka na vu ni noqu dau cakava na ka oqo? E baleta ni sa rusa tu ga na noqu Valenisoro, ia o kemuni o ni dui oga ga ena cakava na nomuni veivale. 10Oqo na vu ni kena sa sega na uca, ka mani sega kina na ka e bula rawa. 11Au a vakavuna me dausiga na vanua — na kena veidelana, na veiloga ni sila, na veiloganivaini, kei na veiloga ni olive — na veika kecega e vakatubura na qele, na tamata kei manumanu, kei na veika kecega o ni tovolea tiko mo ni tea.”
Era sa Muria na i Vakaro i Jiova na Tamata
12Era sa qai vakayacora na veika sa tukuna na Kalou o Jiova me muri o Serupepeli kei Josua kei ira na vo-ni-bula, oqo o ira kece sara na tamata era sa lesu mai na tiko vakabobula#1.12: era sa lesu mai na tiko vakabobula; se o ira ka ra sega ni kau vakabobula. mai Papilonia. Era sa rere, ka ra sa talairawarawa kina vei Akeai na parofita, na i talatala i Jiova. 13Sa qai tukuna o Akeai na i tukutuku i Jiova vei ira na tamata: “Au sa na tiko ga kei kemuni - oqori na noqu vosa ni yalayala.” 14A sa vakauqeti ira na tamata kecega o Jiova me ra qarava na cakacaka ni Valenisoro: o Serupepeli na kovana e Juta; o Josua, na Bete Levu, kei ira kecega na vo-ni-bula mai na veivakabobulataki;#1.14: na vo-ni-bula mai na veivakabobulataki; se na vo-ni-bula era sa sega ni kau vakabobula. Era sa qai tekivu cakacaka ena Valenisoro i Jiova na Kalou kaukauwa, 15ena i ka 24 ni siga ni kaono ni vula, ena i karua ni yabaki ni nona veiliutaki vakatui tiko o Taraiasi.
Currently Selected:
Akeai 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.