Lako Yani 2
2
Na Sucu nei Mosese
1A sa dua na tamata ena yavusa i Livai sa la'ki vakawatitaka e dua na yalewa ena kawa i Livai.
2A sa kunekune na yalewa oqo ka vakasucuma e dua na gonetagane, ia ni sa raica o koya ni sa mata vinaka na gone, a mani vunitaki koya tiko me tolu na vula.#Caka 7.20; Ipe 11.23 3Ia ni sa sega ni vunitaki koya rawa, a qai talia e dua na kato kuta ka dregata ena drega me kakua kina ni curuma na wai. A sa biuta na gonetagane ena loma ni kato ka vakacirima yani e uciwai, ena loma ni veikuta. 4A sa tu mai vakayawa na tuakana yalewa me raica na cava ena yaco vua na gone.
5A sa lako sobu mai na luvenitui goneyalewa me mai sisili e uciwai ka ra a lako vata mai kei ira na nona dauveiqaravi. Sa qai raica o koya na kato ena veikuta ka mani tala yani na nona vada me la'ki kauta mai. 6Ia ni dolava o koya na kena i sogo a raica sara na gone. A tagi na gone ka sa lomani koya sara vakalevu ka kaya, “Oqo e rairai luvena sara ga e dua vei ira na Iperiu.”
7A sa lako yani na ganena na gonetagane ka tukuna vua na luvenitui yalewa, “Me'u vakasaqara li mai e dua na yalewa ni Iperiu me qarava na gone vei kemuni?”
8A sauma na luvenitui yalewa ka kaya, “Io.” A lako yani na goneyalewa ka kauti tinadrau mai. 9A sa kaya vua na luvenitui, “Kauta na gonetagane oqo ka qaravi koya ena vukuqu, ia ka'u na saumi iko ena vuku ni nomu veiqaravi.” A sa kauta na gone na yalewa ka qaravi koya. 10Ia ni sa tubu cake na gone, a sa kauti koya lesu tale vua na luvena yalewa na tui, a sa susuga me luvena. A sa kaya, “Ni'u a dreti koya tani mai wai, au na vakatoka kina me yacana o Mosese.”#2.10 Mosese: Na yaca oqo e balebale vaka na “dreti koya tani” ena vosa vakaiperiu. #Caka 7.21
Sa Dro ki Mitiani o Mosese
11Ni sa tamata levu sara o Mosese, a sa lako yani vei ira na wekana, o ira na Iperiu, ka sarava na nodra vakasaurarataki ena cakacaka vakabobula. A sa raica talega e dua na kai Ijipita ni mokuta tiko e dua na Iperiu, na kai nona.#Ipe 11.24 #Caka 7.23-28 12A sa veiraiyaki, ia ni sa sega ni dua e raici koya, a sa qai mokuta mate na kai Ijipita ka buluti koya ena nuku. 13Ni sa lako tale yani o koya ena siga ka tarava, a sa raica e rua na Iperiu ni rau veivala tiko vakataki rau, a mani kaya vua ka caka cala, “A cava na vuna o sa mokuta kina na wekamu, na Iperiu oqo?”
14A sauma o koya ka vaka, “O cei sa lesi iko mo mai liutaki keimami ka lewai keimami? O sa nanuma beka mo vakamatei au me vaka na nomu vakamatea na kai Ijipita?” Ia ni sa rogoca na ka oqo o Mosese, a sa rere vakalevu ka kaya e lomana, “Era sa kila na tamata na ka au sa vakayacora.”
15Ia ni sa rogoca na ka oqo na tui, a sa vakasaqarai Mosese me vakamatea.
Ia sa mani dro tani kina mai vua na tui o Mosese ka la'ki tiko ena nodra vanua na kai Mitiani,#Caka 7.29; Ipe 11.27 ka dabe sobu ena bati ni keliwai.
16Ia na nodra bete na kai Mitiani o Jacoro, a sa vitu tiko na luvena yalewa. E ratou a lako mai me taki wai, ka ratou mai vakatawana na i gunugunu me ra gunu kina na manumanu i tamadratou. 17Ia ka so tale na i vakatawa ni manumanu era a lako mai ka cemuri ira tani na nodratou manumanu. A sa tucake o Mosese ka taqomaki iratou, ka vakatawa talega na wai me ra gunu kina na nodratou qele ni sipi. 18Ni ratou sa lako yani vei tamadratou, a sa qai tarogi iratou mai o koya ka vaka, “A cava dou sa lesu totolo mai kina edaidai?”
19E ratou a sauma ka kaya, “E dua na kai Ijipita a vukei keitou mai vei ira na i vakatawanisipi, ka takiva talega na wai me ra gunu kina na sipi.”
20A sa kaya vei ira na luvena yalewa o koya, “Sa evei o koya? A cava dou sa biuti koya tu yani kina? Dou la'ki sureti koya mai me tou mai kana vata.”
21A sa vakadonuya o Mosese me tiko ena vanua o ya, ka sa mani solia o Jacoro ki vua na luvena yalewa o Sipora me watina. 22A sa vakasucuma o Sipora e dua na luvena tagane. Sa kaya e lomana o Mosese, “Ni'u sa tiko vulagi ena vanua oqo, au na vakatokai koya kina me yacana o Kerisomi.”#2.22 Kerisomi: Na yaca oqo e balebale vaka na “tiko vulagi” ena vosa vakaiperiu.
23Sa qai mate na tui Ijipita ni sa oti e vuqa na yabaki. Ia era se tagi voli ga na Isireli ena vuku ni nodra vakabobulataki, ka ra sa tagi vua na Kalou me ra vukei. 24A sa rogoca na Kalou na nodra tagi, ka sa nanuma na nona yalayala vei Epara-ama, vei Aisake, kei Jekope.#Vteki 15.13-14 25A sa raica na Kalou na nodra vakabobulataki na Isireli, ka sa kauwaitaki ira.#2.25 kauwaitaki ira; e dua na i vakavakadewa makawa vakatakilai koya vei ira.
Currently Selected:
Lako Yani 2: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.