3. O BELE KEI NA DRAKONI DAUKATA 14
14
O Taniela kei ira na bete i Bele
1Ni sa bulu vata o Tui Asitiaje kei ira nona itubutubu, sa dewa na veiliutaki vei Sairusi na kai Peresia. 2O Taniela na nona itokani dredre duadua vei ira nona ilawalawa.
3E dua na matakau era dau qarava na kai Papiloni, yacana o Bele. E veisiga era yauta vua e tinikarua na buseli na falawa uasivi, e vagasavulu na sipi kei na limasagavulu na qaloni waini. 4E vakarokorokotaki koya na tui, lai cuva vua e veisiga. Ia o Taniela e qarava ga nona Kalou.
5Sa qai tukuna na tui, “Na cava o sega ni qaravi Bele kina?” E sauma, “Baleta au sega ni rokova na matakau e buli e na liga, au rokova ga na Kalou bula a buli lomalagi kei vuravura e lewa na veikabula kece.”
6E kaya na tui, “O sega ni vakabauta ni kalou bula o Bele? O sega ni dau raica na levu ni kena kei na mena e veisiga?”
7Sa qai dredre o Taniela, kaya, “Moni kua saka ni kilaleca, ni qo e qele ga e loma, varasa e sau, e sega ni dua na ka e bau kania se gunuva.”
8Sa qai cudru na tui, sa kacivi ira nona bete, kaya vei ira, “Moni tukuna vei yau o cei e kania tiko na magiti qo; ke sega, oni na mate. 9Kevaka oni vakadinadinataka ni kania tiko o Bele, e na mate o Taniela, ni vosa beci Bele.” Sa qai tukuna o Taniela vua na tui, “Sa vinaka saka.” 10Era lewe vitusagavulu na bete nei Bele, sega ni wili kina na nodra veitinani. Erau sa curuma vata na valenisoro i Bele na tui kei Taniela.
11Era kaya na bete i Bele, “Keimami sa curu saka i tuba; o kemuni saka ga, moni tauca na kakana, vakarautaka na waini, sogota na katuba, qai dregata e na nomuni mama. 12Nioni suka mai e na mataka, kevaka oni kunea ni sega ni kania kece o Bele, me keimami mate; ke sega, me mate o Taniela, o koya e vakaucacataki keimami.”
13Era wele tu ga, baleta e ruku ni teveli era sa kelia e dua na sala vuni era dau muria tiko mera lai kania na magiti. 14Nira sa curu i tuba, sa tauca sara na tui na kei Bele. Sa talai ira o Taniela nona tamata mera kau dravusa mai, mera qai kaburaka e loma ni valenisoro taucoko e mata ni tui duadua. Sara qai curu i tuba, ra sogota na katuba, ra dregata e na mama ni tui, ra mai gole yani.
15E na bogi era sa gole mai na bete kei na nodra veitinani me vaka sa matau tu vei ira, era qai namuraka na ka kece. 16E na mataka lailai, sa yadra na tui, rau lako vata mai kei Taniela. 17Sa kaya na tui, “Se taucoko tu na drega Taniela?” E sauma, “Io saka.”
18Ni se qai dola ga na katuba, sa raica na tui na teveli, qai kaila e cake, “O kemuni Bele na cecere, e sega vei kemuni na veidabui, e sega sara ga.” 19Sa qai dredre o Taniela, tarova na tui me kua ni curu, kaya, “Raica na vuloa. O cei so na weniyavana qo?”
20Sa kaya na tui, “Au raica na weniyava ni tagane, yalewa, kei na gone.” 21Sa katakata na tui, qai vesuki ira na bete kei ira na nodra veitinani, sara qai vakaraitaka vua na katuba vuni era dau curucuru tiko kina mera lai kania na magiti e na teveli. 22Sa mani vakamatei ira na tui, soli Bele vei Taniela me vorolaka kei na nona valenisoro.
Vakamatea o Taniela na drakoni
23E dua tale ga na tama ni drakoni era rokova na kai Papiloni. 24E kaya na tui vei Taniela, “E sega ni rawa nio cakitaka ni qo e kalou bula; mo cuva gona vua.”
25E kaya o Taniela, “Au na cuva vua na Turaga na noqu Kalou, ni o koya e Kalou bula. 26Ia ke sa donu saka vei kemuni, au na mokuta na drakoni, sega na iselewau se iwau.” E kaya na tui, “Sa donu.”
27Sa qai vakasaqara vata o Taniela na kuluta, na uro kei na drauniulu, me buli kina na keke me kena na drakoni. Sa kania na drakoni qai kacabote na ketena. Sa kaya o Taniela, “Raica na ka oni qarava tiko mai!”
28Nira sa rogoca na kai Papiloni, era sa leva, era kudruvaka na tui, ra kaya, “Sa Jiu na tui; sa vorolaki Bele, mokuta na drakoni, vakamatei ira tale ga na bete.” 29Era lako vua na tui, ra kaya, “Soli Taniela mai; ke sega, keimami na vakamatei iko kei na nomu matavuvale.”
30Sa raica na tui nira sa dre nodra mua, sa mani soli Taniela vakavoraki vei ira. 31Era kolotaki Taniela i na qara ni laione. E siga ono na nona curu kina. 32E vitu na laione eratou tiko kina; e veisiga e dau rua na kedratou yagonimate, rua na sipi. Ia sa sega ni soli qo vei iratou, meratou kanalaki Taniela.
Vakabulai o Taniela mai na qara ni laione
33Mani tiko voli kina e Jutia na parofita o Apakuki. Sa vakasaqa tu na supu, qai dovidovia na madrai e na boulu me kau i na were me kedra na musu witi. 34Ia sa kaya na yagilosi ni Turaga vei Apakuki, “Kauta na kakana qori i Papiloni, vei Taniela e na qara ni laione.”
35Sa kaya o Apakuki, “Au se bera saka vakadua ni raici Papiloni, au sega ni kila e dua na ka baleta na qara ni laione.”
36Sa qai taura na yagilosi ni Turaga na buradelana, vukataki koya e na drauniuluna, qai talaci koya tale mai Papiloni e na qara ni laione, e na domo ni cagi vakacevaruru. 37Sa qai kailavaka o Apakuki, “Taniela! Taniela! Qori na kemu sa solia mai na Kalou.”
38Qai kaya o Taniela, “Oni se nanumi yau saka tiko noqu Kalou, oni sega ni vakanadakui keimami na lomani kemuni.” 39Sa mani mata o Taniela me kana. Sa vakasukai Apakuki sara tale i nona vanua na yagilosi ni Turaga.
40E na ikavitu ni siga sa mai lolositaki Taniela na tui. Ni sa yaco mai na qara, sa iro sobu, qai raici Taniela ni dabe toka kina. 41Sa tabalaka na tui e na domo levu, “Oni cecere saka na Kalou i Taniela, e sega tale ni dua drau tautauvata.” 42Sa qai tuberi Taniela mai, balati ira i loma o ira na via veretaki koya. Era sa laukana sara ga e matana.
Currently Selected:
3. O BELE KEI NA DRAKONI DAUKATA 14: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.