1 Samuela 2
2
Na Masu i Ana
1A sa masu o Ana, ka kaya,#Luke 1.46-55
“Sa reki na yaloqu ena vuku i Jiova;
au sa marau ena ka sa cakava o koya!
Au sa dredrevaki ira na noqu meca;
ka'u sa seretaka na nomuni vakabulai au.
2“Sa sega tale ni dua e yalosavasava cake me vakataki Jiova;
sa sega tale ni dua me vakataki koya,
sa sega na dauveimaroroi me vakataka na noda Kalou.
3“Mo tarova na nomu bolebole domoilevu;
Me kakua ni cavuta na gusumu na vosa qaciqacia;
Ni sa Kalou daukila ka o Jiova,
Ni sa lewa o koya na veika kece era cakava na tamata.
4A sa ramusu na nodra dakaititi na tamata i valu qaqa,
ia o ira na malumalumu era sa kaukauwa cake mai!
5O ira na tamata ka dau vakamamautaki e liu
era sa cakacaka saumi me rawa kina na kedra,
ia o ira na viakana sa oti mai na nodra viakana.
Sa le vitu na luvena na marama yava,
ia na marama sa lewe levu na luvena sa qai sega na luvena e vo.
6O Jiova sa ia na veivakamatei, ka sa solia lesu tale na bula;
sa talai ira na tamata ki na vuravura ni mate,
ka la'ki kauti ira lesu tale mai.#Ym 16.13; Tb 13.2
7Sa vakadravudravuataki ira eso na tamata o Jiova, ka vakavutuniyautaki ira eso,
Sa vakalolomataki ira eso, ka vakalagilagi ira eso.
8Sa keveta cake na dravudravua o koya mai na kuvu ni soso,
Sa vueti ira na leqa mai na nodra vakaloloma.
Sa lesi ira me ra veitokani kei ira na ravouvou
ka vakatikori ira ki na i tutu dokai ka lagilagi.
Na veiyavu kei vuravura sa taukena o Jiova;
ka sa buli vuravura kina o koya.
9“Sa dau maroroi ira na tamata yalosavasava o koya,
Ia era na yali ena butobuto o ira na i valavala ca;
E sega ni gugumatua na tamata ena nona kaukauwa ga.
10Era na raramusumusu na meca i Jiova;
Ena vakalutu kurukuru vei ira mai lomalagi.
Ena lewai vuravura taucoko o Jiova;
ka solia na kaukauwa vua na nona tui,
ka vakavuna me qaqa o koya sa lumuta.”
11A sa lako ki nona vale mai Rama o Ilikana; ia sa tiko ga mai Sailo na gonetagane me qaravi Jiova ena mata i Ilai na bete.
O Rau na Luvei Ilai Tagane
12Ia o rau na luvei Ilai e rau tamata sega na kedrau yaga; e rau sega ni dau vakarorogo vei Jiova. 13Ia sa dau vakaoqo na i yalayala ni veika era sa rawa ni vinakata na bete vei ira na tamata. Ni sa vakacabora na nona i soro e dua na tamata, sa dau kauta mai e dua na i cula mata i tolu na nona dauveiqaravi na bete, ni saqa tiko na lewe ni manumanu; 14a sa dau cokataka na i cula oqo ki na i tavuteke, se kuro, se kuro levu, se kuro walega; ia na veika ga e coka, se cula rawa, sa kena na bete. O ira kece na Isireli era lako mai ki Sailo e caka vei ira na ka oqo. 15Me kenai kuri, ni sa bera ni kama waicala uma uro, sa dau lako mai na nona tamata na bete me kaya vua na tamata sa vakacabora na i soro, “Mo solia vei au eso na lewe ni manumanu me tavu me kena na bete; e sa na sega ni taura me ciqoma na lewe ni manumanu saqa mai vei iko; io, na kena ga e droka.”
16Ia kevaka e sauma na tamata o ya, “Me laivi me vakamai taumada na uro, ka mo qai taura na kena o vinakata,” ena qai kaya na nona tamata na bete, “E sega! Mo solia sara mai vei au oqo! Ia kevaka e sega, au sa na taura vakaukauwa.”
17Ia sa ka levu sara na nodra i valavala ca na luvei Ilai tagane ena mata i Jiova, me vaka ni rau vosabeca na nodra i madrali na tamata vei Jiova.
O Samuela kei Ilai
18A sa qarava tiko na nona i tavi vakabete o Samuela ena mata i Jiova, ka dina ga ni a gone, ka vauci tu e tolona na i sulu vakabete na efoti lineni. 19Ena veiyabaki sa dau cula o tinana e dua na nona kote lailai, ka kauta vua ena gauna a dau salavata kina kei na watina me vakacabora na i soro vakayabaki. 20A sa vosavakalougatataki rau o Ilikana kei na watina o Ilai, ka kaya, “Me solia tale mada ga o Jiova vei iko eso tale na gone mai vua na yalewa oqo, me sosomitaki kina o koya o drau sa solia Vua.”
Ni oti o ya, erau sa lesu tale ki na nodrau vale.
21Sa vakalougatataki Ana o Jiova, ka la'ki tolu tale na luvena tagane, kei na rua na luvena yalewa. Ia sa tubu me levu, na gonetagane o Samuela ena mata i Jiova.
22A sa qase sara mai o Ilai, ka sa rogoca o koya na veika ca e rau a dau cakava tiko na luvena vei ira kecega na Isireli; ka ni rau sa moceri ira na yalewa era dau qarava tiko na katuba ni Vale ni Veitavaki. 23Sa kaya vei rau o koya, “A cava o drau sa kitaka kina na veika oqo? Au sa rogoca mai vei ira kecega na tamata, na kemudrau i tukutuku ena vuku ni valavala tawa savasava drau sa vakayacora tiko oqo. 24Oi kemudrau na luvequ, me kakua sara oqo! Ni sa sega ni vinaka na i rogorogo ka'u sa dau rogoca mai vei ira na tamata ni Kalou me baleta na nomudrau caka cala. 25Kevaka sai valavala ca e dua na tamata vua e dua tale, ena rawa ni taqomaki koya na Kalou; ia kevaka sai valavala ca vei Jiova e dua na tamata, o cei tale ena veivosaki ena vukuna?” Ia e rau a bese ni vakarorogo ki na vosa i tamadrau, baleta ni sa lewa o Jiova me vakamatei rau. 26A sa tubu tiko na gone o Samuela, ka sa vinakati koya o Jiova, ka vakakina o ira na tamata.#Sr 46.13; Luke 2.52
Na Parofisai e Baleta na Vuvale nei Ilai
27A lako mai vei Ilai e dua na tamata ni Kalou ka kaya vua, “Sa vosa vakaoqo o Jiova, ‘Au a sega li ni a rairai vakaidina vei Eroni kei na vuvale i tamamu ena nodra a bobula voli nei tui Ijipita? 28Ia ka'u a digitaki koya mai vei ira na veimataqali kecega e Isireli me noqu bete, me vakacaboisoro ena noqu i cabocabonisoro, me vakama talega na veika boi vinaka, ka me vakaisulutaki e mataqu e na i sulu vakabete na efoti lineni. Au a solia talega vei ira na lewe ni vuvale i tamamu na i votavota e dodonu me ra taura mai na i soro e vakamai ena i cabocabonisoro.#Lako 28.1-4; Vsoro 7.35-36 29A cava li o dou kocova kina na noqu i soro kei na noqu i madrali laukana me vaka ka'u a vakarota, me caka ena noqu vale? I Ilai, a cava li na vuna o dokai rau cake kina vakalevu na luvemu mai vei au ena nomu vakatara me rau vakayagataka na uro ni veitiki ni madrali laukana kecega era sa vakacabora vei au na noqu tamata? 30O koya oqo, sa lewa kina o Jiova na nodra Kalou na Isireli, ‘Au a kaya vakaidina me ra vakaitavi vakabete e mataqu na nomu lewe ni vale, kei ira na lewe ni vale i tamamu, ka sega ni mudu.’ Ia oqo sa kaya o Jiova, ‘Me yawa vei au oqo, ka ni'u sa na sega ni vosota tale, ni'u na vakarokorokotaki ira ga era sa vakarokorokotaki au; ia o ira era beci au, era na beci talega. 31Raica oqo, sa roro tiko mai na gauna, ka'u na tagutuva kina na nomu kaukauwa, kei na nodra kaukauwa na lewe ni vale i tamamu me kakua kina ni dua me rawa ni bula balavu me la'ki qase sara ena nomu vuvale. 32O na kunea na leqa ena noqu i tikotiko, ka na tu e matamu na didi kei na yalovuvu ena levu ni veivakalougatataki kei na sautu sa nodra i votavota na Isireli; ia ena sega na tamata me bula balavu me la'ki qase ena nomu vale, ka tawa mudu. 33Au sa na maroroya e dua vei ira na nomu kawa me bula, me qaravi au mai na noqu i cabocabonisoro, ia ena vakarusai na matana me mataboko, ka vakararawataki na yalona: ia era na bale drokadroka ena mate rarawa o ira kece na nomu kawa. 34Ia oqo na kenai vakatakilakila vei iko, na ka sa na yacovi rau ruarua na luvemu tagane, o Ofinai kei Finiasi; ni rau na mate ruarua ena dua vata ga na siga.#1Samu 4.11 35Ia ka'u na lesia me noqu e dua na bete yalodina, me na cakava na nona i tavi me vaka na veika kecega sa tu e lomaqu, kei na yaloqu; ia ka'u na vakatubura vua e dua na vuvale yalodina, ka sa na vakayacora na nona i tavi e matana o koya ka'u na lumuta, ka tawa mudu. 36Ia o koya yadua sa vo ena nomu mataqali, ena lako mai ka cuva sobu vua, ka kerea me dua na nona tiki ni siliva, se dua na i buli madrai, ka na kaya, “Au sa masuta mo lesi au mada ki na dua na cakacaka vakabete, me'u kania kina e dua na tiki ni madrai.”
Currently Selected:
1 Samuela 2: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.