1 Veigauna 29
29
Na i Solisoli Eso me Tara kina na Valenisoro
1A sa kaya o Tevita na tui vei ira kece era sa soqoni vata tu, “Sa i Solomoni na luvequ o koya sa digitaka na Kalou, ia e se gone ga o koya ka se bera ni kila vinaka na veiqaravi. Ia sa ka levu sara na cakacaka me vakayacori, baleta ni oqo e sega ni nodra valenitui na lewenivanua, ia sa vale tabu ga i Jiova na Kalou.#1Vei 22.5 2Au sa sasagataka vakaukauwa sara me'u vakarautaka na i yaya eso e gadrevi ena Valenisoro me vaka na koula, na siliva, na parasa, na kaukamea, na kau, na vatu talei eso, na vatu vulavula, kei na vatu mapolo. 3Me i kuri ni veika kece au sa vakarautaka, au sa solia talega na siliva kei na koula ka'u sa taukena vakataki au baleta ni sa rui bibi vei au na Valenisoro ni Kalou. 4Au sa solia kina e sivia e 100 na tani na koula dina ka rauta ni 240 na tani na siliva dina me ukutaki kina na lalaga ni Valenisoro 5ka vakakina na i yaya kece e vinakati me ra cakava na kena matai. Ia o cei tale vei kemuni sa lomasoli me solia e dua na nona i solisoli vei Jiova?”
6Era sa qai bole mai me ra cau ki na cakacaka ni Valenisoro o ira na turaga ni mataqali, kei ira na i liuliu ni veivuvale, kei ira na komada ni veiwasewase ni mataivalu, kei ira na i vakalesilesi era lewa na veika me baleta na tui. 7Era a solia kina e sivia na 170 na tani na koula, e sivia e 340 na tani na siliva, e rauta ni 620 na tani na parasa, ka sivia e 3,400 na tani na kaukamea. 8Vei ira era taukena na veivatu talei, era sa solia yani na nodra i yau ki na valeniyau ni vale tabu, ka sa qarava na kena maroroi o Jieli na Livai mai na vuvale i Kerisoni. 9Era sa soli-ka vei Jiova na tamata ena yalo galala, ka ra sa marautaka na levu ni ka sa soli rawa. A sa marau vakalevu vakakina o Tevita na tui.
Sa Vakacaucautaka na Kalou o Tevita
10A sa ia na vakavinavinaka vei Jiova o Tevita na tui e matadra na lewenivanua era sa soqoni vata. A sa kaya, “Kemuni Jiova na Kalou ni neimami qase o Jekope, mo ni sa vakarokorokotaki tikoga ka tawa mudu! 11O ni sa cecere ka kaukauwa, o ni sa lagilagi ka uasivi, o ni sa vakaturaga. Sa nomuni na veika kecega e lomalagi kei vuravura, o ni sa kena tui, o ni sai liuliu cecere ni veika kecega.#Maciu 6.13 12Sa taka mai vei kemuni na i yau kecega kei na sautu; o ni sa lewa na ka kecega mai na nomuni gumatua kei na kaukauwa; ka sa rawa mo ni vakayacora vua e dua me tamata cecere ka qaqa. 13Ia oqo, kemuni na neimami Kalou, sa ka levu na neimami vakavinavinaka vei kemuni, ka sa vakacaucautaki na yacamuni dokai.
14“Ia o ira na noqu tamata kei au sa sega ni rawa ni solia vei kemuni e dua na ka, baleta na veika kecega sai solisoli loloma mai vei kemuni, ka keimami sa solia lesu tale oqo vei kemuni na veika ga sa nomuni taumada. 15O ni sa kila na Turaga ni keimami sa bula voli ga me vaka na vulagi se kawa tamata veitokiyaki, me vakataki ira ga na neimami qase. Na neimami veisiga sa vaka e dua na i yaloyalo ni ka sa sivi yani, ka sega ni rawa me keimami drotaka na mate. 16I Jiova na neimami Kalou, keimami sa kumuna vata mai na yau kece oqo me tara kina e dua na valenisoro me rokovi kina na yacamuni tabu, ia era sa taka kecega mai vei kemuni ka ra sa nomuni kecega. 17Au sa kila ni o ni dau vakatovolea na yalo ni tamata kecega, ia o ni sa vinakata na tamata yalododonu. Ena dela ni yalodina kei na yalododonu, au sa solia kece yani kina oqo vei kemuni ena yalo e vinakata, ka'u sa raica na nodra marautaka na nomuni tamata era sa soqoni eke me ra kauta mai na nodra i solisoli vei kemuni. 18Kemuni Jiova, na Kalou ni neimami qase o Epara-ama, kei Aisake, kei Jekope, mo ni vakadeitaka tikoga ka tawa mudu ki na lomadra na nomuni tamata na yalo ni gagadre me vakaoqo, ia mo ni qai vagolea na yalodra me ra yalodina tikoga vei kemuni. 19Ni solia vei Solomoni na luvequ na yalo ni gagadre dina ka me na dau talairawarawa ki na nomuni i vakaro kecega, ka tara na Valenisoro ka'u sa cakava oti oqo na kena vakavakarau.”
20Sa qai vakaroti ira na tamata o Tevita, “Ni vakacaucautaki Jiova na nomuni Kalou!” Era sa ia na lewenivanua taucoko na vakacaucautaki Jiova na Kalou ni nodra qase, ka ra vakacuva na uludra ni ra sa vakarokoroko vei Jiova ka vaka talega kina vua na tui.
Sa Vakataudeitaki o Solomoni me Tui
21Ena siga ka tarava, era a vakamate manumanu ka cabora vei Jiova, ka ra qai solia vei ira na tamata me ra kania. Era a vakacabora talega e dua na udolu na bulumakau, e dua na udolu na sipi tagane, kei na dua na udolu na lami, ka ra sa vakamai umauma oqo ena i cabocabonisoro. A sa kau talega mai na waini me i madrali gunuvi. 22Sa tubu sara vakalevu na marau ena siga o ya ni ra sa ia na kana kei na gunu ena mata i Jiova.
Oqo na i karua ni gauna era vakataudeitaka kina ni sa tui o Solomoni. Era sa lumuti koya ena yaca i Jiova me nodra tui, kei Setoki me nodra bete. 23Sa qai sosomitaki Tevita na tamana o Solomoni ka dabe ena i tikotiko vakatui sa tauyavutaka o Jiova. A sa yaco me dua na tui e rawati koya vinaka, ka ra sa talairawarawa vua o ira kecega na Isireli.#1Tui 2.12 24Era sa qai vosayalayala ni ra na yalodina vei Solomoni na tui o ira kecega na i vakalesilesi kei na sotia, ka wili kina o ira kece na vo ni luve i Tevita tagane. 25A sa vakalevulevui Solomoni e matadra na Isireli o Jiova, ka cakava me vakasakiti vakalevu cake na nona bula mai vei ira na vo ni tui era veiliutaki e Isireli.
Na i Cavacava ni Veiliutaki nei Tevita
26A sa vakataulewa voli ena vanua taucoko o Isireli o Tevita na luve i Jese 27me 40 na yabaki. A sa veiliutaki vakatui me vitu na yabaki mai Epironi ka 33 na yabaki mai Jerusalemi.#2Samu 5.4-5; 1Vei 3.4 28A sa mate o koya ni sa matua vinaka sara na nona yabaki ni bula, ni sa vutuniyau ka rokovi, ka sa sosomitaki koya me tui o Solomoni na luvena. 29Na volaitukutuku me baleti Tevita na tui mai na i tekitekivu ki na kena i tinitini sa volai tu ena nodratou i vola na parofita e tolu, o Samuela, kei Necani, kei Kata. 30Sa tukuna na veivola oqo na i vakarau ni nona veiliutaki, kei na nona kaukauwa, kei na veika kece sa yacovi koya, kei Isireli, kei na veimatanitu sa wavolita.
Currently Selected:
1 Veigauna 29: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.