Efesios 6
6
Taytanwan surinkuna imano kawayänanpaqpis yäsishqan
1Wamrakuna, Señor Jesucristuta chaskikush kaykarqa mamaykita y taytaykita imaypis cäsukuyay. Sayno cäsukuyänaykitami Tayta Dios munan.#Col. 3.20. 2Promësayuq punta kaq mandamientupis kaynömi nin: <<Mamaykitawan taytaykita ali rikanki. 3Saynöpami kay pasacho aska wata kawanki>>.#Éxo. 20.12; Deut. 5.16.
4Wamrayuqkuna, wamraykikunata ama rabyanäsiyaysu.#Col. 3.21. Saypa trukanqa Señor Jesucristo munashqanno kawayänanpaq shumaq tantiyasiyay.
Ashmaywan patrón ali rikanakuyänanpaq yäsishqan
5Ashmaykuna, kay pasacho kaq patronnikikunata cäsukur mandayäshushqaykita lapan voluntänikiwan rurayay. Jesucristuta cäsukuyashqaykinöla patronnikikunatapis cäsukuyay. 6Patronnikikuna rikanalanchöqa ama aruq tukuyaysu, saypa trukanqa Jesucristupa sirviqnin kar lapan voluntänikikunawan aruyay. Saynöpami Tayta Dios munashqanta rurayanki.
7Patronnikikuna mandayäshushqaykita lapan voluntänikikunawan rurayay. Ama runakunapaq aruqnölaqa aruyaysu, saypa trukanqa Señor Jesucristupaqno aruyay. 8Ashmay kashqapis mana ashmay kashqapis alita rurashqansipitami Jesucristo gloriacho premiuta qomäshun.#Col. 3.22-25.
9Patronkuna, qamkunapis ashmaynikikunata ali rikayay. Qayapäyänaykipa trukanqa ali shimilaykipa shakyäsiyay. Tantiyakuyay ashmay karpis patrón karpis jana pasacho kaykaq patronninsipa makincho kaykashqansita.#Col. 4.1. Payqa lapansitapis iwalmi rikaykämansi.#Deut. 10.17; Col. 3.25.
Supaykunata ichipänansipaq yäsikuy
10Wawqi panikuna, Señor Jesucristo munayninwan yanapaykäyäshuptikiqa firmi kawayay. 11Diabluta ichipäyänaykipaq Tayta Dios kamaripäyäshushqaykikunata jatikuyay.#Rom. 13.12-14; 1Tes. 5.8. 12Noqansi manami runa mayinsiwansu guërracho kaykansi, saypa trukanqa munayyuq supaykunawanmi. Paykunaqa mana rikakaq karpis intëru kay pasachömi imaykatapis mana alikunata ruraykäyan. 13Sayno kaykaptinqa Tayta Dios kamaripäyäshushqaykikunata jatikuyay. Sayta jatikuyaptikimi supaykuna shamurpis vinciyäshunkisu.
14Wachkuykiqa rasun kaqlata parlayashqaykimi kaykan.#Isa. 11.5.
Chalëcuykiqa runa mayikita ali rikayashqaykimi kaykan.#Isa. 59.17.
15Bötasnikiqa Jesucristupa wilakuyninta wilakuyashqaykimi.#Isa. 52.7.
16Escüduykiqa Tayta Diosman lapan shonquykikunawan yärakuyashqaykimi. Say escüduwanmi nina rataykaq flëchawanno Satanás atacayäshuptikipis sapakuyanki.#Sal. 7.13.
17Cascuykiqa Tayta Dios salvayäshushqaykimi.#Isa. 59.17.
Espädaykiqa Tayta Diospa palabranmi. Saywanmi Espíritu Santu imaypis yanapäyäshunki.#Heb. 4.12.
18Imay hörapis Espíritu Santu tantiyasiyäshushqaykino Tayta Diosta manakuyay. Mana ajayaypa imaypis ruwakuyay. Yärakuq mayikikunapaqpis mana qonqaypa manakuyay.
19Noqapaqpis Tayta Diosta manakuykuyälay wilakur shumaq parlanäpaq y pitapis mana mansapaypa Jesucristupa ali wilakuyninta wilapänäpaq. 20Tayta Diospa wilakuqnin kar wilakuyninta wilakushqäpitami prësu kaycho wichqaraykä. Sayno kaptinpis Tayta Diosta manakuyay mana mansapaypa pitapis wilapänäpaq.#Col. 4.2-4.
Carta ushanan
21Kuyay wawqinsi Tíquico#Hech. 20.4; 2Tim. 4.12. chämurmi imano kaykashqäta y imata rurashqätapis wilayäshunki. Paypis Señor Jesucristupa wilakuqninmi kaykan. 22Saymi payta kachaykämü imano kaykashqätapis wilayäshunaykipaq. Paymi shakyäsiyäshunki Tayta Diosman shumaq yärakuyänaykipaq.#Col. 4.7-8.
23Tayta Dios y Señor Jesucristo yanapaykuyäläshunki payman yärakur kuyanakuyänaykipaq y jawka kawayänaykipaqpis. 24Señor Jesucristuta lapan shonqunwan kuyaqkunata Tayta Dios kuyapar imaypis yanapaykuläsun. [Amén.]
Currently Selected:
Efesios 6: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.