Efesios 5
5
Tayta Diospa wamrankuna imano kawayänanpaqpis kashqan
1Tayta Dios kuyashqan wamrankuna kaykarqa pay jusaynaq kashqanno qamkunapis jusaynaq kayay. 2Jesucristo kuyakuq kashqanno qamkunapis kuyakuq kayay. Kuyakuq karmi noqansi rayku wanur Tayta Diospaq mushkuq sacrificiuno kash.#Éxo. 29.18.
3Tayta Dios kuyashqan santu runakuna kaykarqa fornicación jusata ama jusalikuyaysu, wachakash ama kayaysu, ni ima jusatapis ama jusalikuyaysu. Saykunapaqqa parlaylapis ama parlayaysu. 4Lutankunata, manakaqkunata ni lutan yarpayman apakuq bujunädakunatapis ama parlayaysu. Saypa trukanqa imapitapis Tayta Diosta agradëcikuyay.
5Shumaq tantiyakuyay: fornicación jusata jusalikuqkuna y wachakash kaqkunaqa manami Tayta Dios y Jesucristo mandashqanman yaykuyanqasu. (Wachakash kaqkunaqa ïduluta adoraqnömi kaykäyan.) 6Mana cäsukuypa jusalikuqkunataqa Tayta Diosmi rabyashpan castiganqa. Sayno kaykaptinqa jusalikuyänaykipaq pï shakyäsiyäshuptikipis ama chaskipäyankisu. 7Wakin runakuna jusalikuyaptinpis paykunanöqa ama kayankisu.
8Nawpataqa qamkunapis jusalikuyashpayki sakaqcho kaykaqnömi kawayarqayki. Kananmi isanqa Jesucristuta chaskikur asikyaqchöna kawaykäyanki. Sayno kaykarnaqa Tayta Dios munashqanno waran waran kawayay. 9Asikyaqchöna kawarqa#5.9 Wakin griego copiakunachöqa asikyaqchöna kawar ninanpa trukanqa Espíritu munashqanno kawar ninmi. kuyapäkuqmi kayanki, alilatanami rurayanki y rasun kaqlatanami parlayankipis. 10Tayta Diospa shonqunpaqno kawayänaykipaq imaypis yarpachakuyay.
11Tayta Diosta mana cäsukuq runakuna lutankunata rurayaptinpis qamkunaqa ama rurayaysu. Saypa trukanqa lutan ruraykunata kachariyänanpaq tantiyasiyanki. 12Paykuna pakaylapa jusalikuyashqan pasaypa penqakuypaqmi kaykan. Saykunataqa ama parlaylapis parlayaysu. 13Asikyaptin ima kashqanpis rikakashqannömi paykuna jusalikuyashqanpis musyakanqa.
14Jusalikuqkuna tantiyakuyänanpaq parlapis kaynömi nin:
<<Punuy siki, rikchay.
Wanush kaykashqaykipita kawarimuy.
Jesucristumi asikyapäshunki>>.
15Sayno kaykaptinqa imano kawaykäyashqaykitapis shumaq tantiyakuyay. Mana tantiyakuq runano kawayänaykipa trukanqa tantiyakuq runano kawayay. 16Runakuna mana alita rurar kawayaptinpis qamkunaqa alikunalata imaypis rurayay. 17Mana tantiyakuq runanöqa ama kawayaysu. Saypa trukanqa Señorninsi munashqanno kawayänaykipaq shumaq tantiyakuyay.
18Ama upyayaysu. Shinkash runaqa lutankunatami ruran. Saypa trukanqa Espíritu Santupa munaynincho kawayay. 19Salmukunata, himnukunata y cörukunata cantar lapan shonquykikunawan Tayta Diosta alabayay. 20Ima kaptinpis Señorninsi Jesucristupa jutincho Tayta Diosta agradëcikuyay.#Col. 3.16-17.
Majayuqkuna imano kawayänanpaqpis nishqan
21Jesucristuta mansapakurqa jukninsi jukninsipis respitanakur kawashun.
22Warmikuna, Señor Jesucristuta cäsukuyashqaykinöla runaykikunatapis cäsukuyay.#Col. 3.18; 1Ped. 3.1. 23Warmiqa runanpa munayninchömi kaykan. Saynölami iglesiapis Jesucristupa munaynincho kaykan. Iglesianami paypa cuerpun y paymi iglesiapa salvaqnin.#Col. 1.18. 24Sayno kaykaptinqa Jesucristuta iglesian cäsukushqanno warmipis runanta cäsukusun.
25Runakuna, iglesiata Jesucristo kuyashqanno warmikikunata kuyayay.#Col. 3.19; 1Ped. 3.7. Iglesiata kuyarmi wanuymanpis Jesucristo charqan. 26Sayno wanurqan payman yärakuqkuna Tayta Diospa palabranwan maylash kar santu kayänanpaqmi. 27Saymi kikinpa nawpanman pushanqa asikyaypa asikyaykaqta, jusaynaqta, santuta y pay munashqanno kaykäyaqta.#2Cor. 11.2; Apoc. 21.2, 9.
28Pipis warminta kuyaq kaqqa kikinpa cuerpuntapis kuyanmi. Saymi cuerpunta kuyashqannöla warmintapis kuyanan. 29Manami pipis cuerpunta maltratansu, sinöqa alimentarmi cuidan. Saynölami Jesucristupis iglesianta cuidan. 30Noqansimi Jesucristupa cuerpun, [aysan y tulun] kaykansi.#Col. 1.18.
31Tayta Diospa palabranchöpis kaynömi nikan: <<Mamanpa y taytanpa makinpita runa yarqukun warminwan mana rakikaypa tänanpaqmi. Ishkaq karpis juklaylanömi kayanqa>>.#Gén. 2.24.
32Say qelqaraykaqqa Jesucristuwan juklaylano kashqansitami tantiyasimansi. Sayno tantiyasimashqansi seqaypa espantakuypaqmi kaykan. 33Saymi yapaypis nï: Cuerpuykita kuyayashqaykinöla warmikikunata kuyayay. Warmikunapis runankunata respitayäsun.
Currently Selected:
Efesios 5: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.