1 Juan 5
5
Tayta Diospa Surinman yärakunansipaq nishqan
1Jesús salvamaqninsi Cristo kashqanta criyiqkunaqa lapanpis Tayta Diospa wamranmi kaykäyan. Tayta Diosta kuyarqa wamrankunatapis kuyansimi. 2Wamrankunata kuyashqansita musyansi Tayta Diosta kuyar mandamientunkunata cumplirmi.
3Tayta Diosta kuyarqa mandamientunkunata cumplinsimi.#Juan 14.15; 2Juan 6. Mandamientunkunata cumpliyqa manami ajasu kaykan.#Deut. 30.11; Mat. 11.30. 4Sayno ajasu kaykan Tayta Diospa wamrankuna Satanásta vincish kayaptinmi.#Juan 16.33. Payta vincinsi Tayta Diosman yärakurmi. 5¿Pitaq Satanásta vincin? Jesucristo Tayta Diospa Surin kashqanta criyiqkunalami vincin.
Jesucristo salvamaqninsi kashqan
6Jesucristo Diospa Surin kashqanta musyansi bautizakushqan höra wamran kashqanta Tayta Dios nimush kaptin#Mat. 3.17; Juan 1.31-34. y yawarninta jichar wanush kaptinmi.#Mar. 15.39. Manami bautizakuptin Tayta Dios nimush kalaptinsu musyansi, saypa trukanqa yawarninta jichar wanush kaptinmi. Saynöpis Diospa Surin kashqanta musyansi Espíritu Santu tantiyasimashqami. Espíritu Santu tantiyasimashqansiqa rasun kaqmi kaykan.
7Jesucristo Diospa Surin kashqanta musyasimansi [jana pasacho kaykaq] kimsa testïgukunami. [Say testïgukuna kaykäyan Tayta Dios, Surin Jesucristo y Espíritu Santumi. Paykuna kimsaq karpis juklaylami kaykan. 8Saynölami kay pasachöpis kimsa testïgukuna musyasimansi.] Say testïgukuna kaykäyan Espíritu Santu, Jesucristo bautizakushqan y wanur yawarninta jichashqanmi. Say kimsa testïgukuna saylatami musyasimansi.
9Runa wilapämashqansita criyiykarqa Tayta Dios nimashqansitaqa masraq criyishun. Surin Jesucristupita Tayta Dios nimashqansiqa masmi välin runakuna wilapämashqansipitapis.#Juan 5.32-37; 8.18. 10Jesucristo Diospa Surin kashqanta criyiq kaqqa Tayta Dios tantiyasishqanta criyinmi. Jesucristo Diospa Surin kashqanta mana criyiq kaqmi isanqa Tayta Dios tantiyasishqantapis criyinsu. Mana criyirmi Tayta Diosta manakaqman churan.
11 Mana ushakaq kawayta qomashqansitami Tayta Dios tantiyasimashkansi. Say kawaytaqa tarinsi Surin Jesucristuta chaskikurmi. 12Tayta Diospa Surinta chaskikuq kaqqa mana ushakaq kawaytami tarin. Mana chaskikuq kaqmi isanqa say kawayta tarinqasu.#Juan 3.36.
Carta ushanan
13Tayta Diospa Surinman yärakuyaptikimi kay cartata apaykäsimü mana ushakaq kawayta tariyashqaykita musyayänaykipaq.#Juan 20.31.
14Tayta Dios munashqanno kananpaq imatapis manakushqaqa wiyamashqansitami musyansi. 15Wiyamashqansita musyarmi manakushqansino yanapämänansipaq kashqantapis musyansi.#Mat. 7.7-11; Luc. 11.9-13; Juan 15.7, 16; 16.23-24; 1Juan 3.21-22.
16Mayqaykipis wawqi panikuna jusalikushqanta musyarqa paykunapaq Tayta Diosta manakuyay. Perdonananpaq kaq jusa kaptinqa Tayta Dios perdonanqami. Mana perdonananpaq kaq jusa kaptinqa Tayta Diosta ama manakuyaysu.#Jer. 7.16; 14.11-12; Mat. 12.31-32; Heb. 6.4-6; 10.26. 17Mana ali rurayqa lapanpis jusalami. Sayno kaptinpis Tayta Dios mana perdonananpaq kaq jusa kaykanmi.#5.17 Mana perdonananpaq kaq jusaqa jusalikuyta mana kacharishqanmi kaykan. Say jusata jusalikuq runaqa manami Tayta Diosta perdonta manakunsu. Jusalikushqanpita lakikur perdonta manakuptinmi isanqa Tayta Dios perdonanqa (1Juan 1.9).
18Musyansimi Tayta Diospa wamran kashpansi manana jusalikushqansita. Saynöpis Tayta Diospa Surin Jesucristumi Satanáspita sapaykämansi.
19Musyansimi Tayta Diospa wamranna kashqansita. Saynöpis musyansimi intëru kay pasa Satanáspa munaynincho kaykashqanta.
20Musyansimi Tayta Diospa Surin Jesucristo kay pasaman shamur Tayta Diosta reqinansipaq tantiyasimashqansita. Saymi Tayta Diospa y Surin Jesucristupa makincho kawaykansi. Jesucristuqa kikin Diosmi kaykan. Paymi mana ushakaq kawayta qomansi.#Juan 17.3.
21Kuyay wamräkuna, ima ïdulukunamanpis ama yärakuyaysu. [Amén.]
Currently Selected:
1 Juan 5: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.