Apocalipsis 1
1
Jesucristo I̱ñose'e
1Iye cato Diusupi Jesucristona i̱ñose'e a'ë, Jesucristopi i̱ jo'yare quëaja̱quë caquë, yequë mu'se esa pa'i ja̱'ñere. Ja̱je i̱ñouna, Jesucristopi i̱ hui̱ñaëre jëjo daopi, i̱ jo'yaë Juanna quëaja̱'quëre. 2Ja̱je pa'ina, Juanpi i̱ti si'aye iye co'amaña cui'ne Maija'quë cocare Jesucristopi i̱tire pa'ë caquëna, ñasiquëpi quëaquë pa'iyë.
3Sihuaquë pa'ija̱'quë api, iye toyase'e ñaquëpi, cui'ne sihuacohua'i pa'ija̱'cohua'i a'ë iye Maija'quë i̱sisi cocare caquëna, asajë i̱ño toyase'e cayere sehuocohua'ipi, tsoe ti̱'a tëjiji, i̱ti yo'oja̱'a mu'seña.
Juan Toyase'e Siete Sehuosi Tsëcana Caquë
4-5Yë'ë Juanpi toyayë, siete sehuosicohua'i tsëca Asia yeja pa'icohua'ina caquë, mësarute i̱ti pa'iquëpi, tsoe pa'isiquëpi cui'ne daija̱'quëpi cui'ne i̱ ñu'i saihuë ti̱ñarepa siete joñoa pa'iyepi co̱ni, cui'ne Jesucristo i̱ case'eje̱ ñaquë cacaisiquëpi, ju̱'isicohua'i aquëpi du'ru huëisiquëpi iye yeja pa̱i ëjaohua'ire meñe cua̱ñequëpi co̱ni mësarute de'oye ñacaiyepi jo'cua de'oye pa'ijë̱'ë. Cristo cato maire oi tayo yo'o tuture nejocaji'i, i̱ tsiepi. 6Nejoni maire ëjaohua'ire cui'ne Maija'quëre i̱ pëca ja'quëre pare necaicohua'ire nepi. Ja̱ë api, si'aye miañe paquë, cui'ne si'aye i̱ tse̱se'e a'ë. Ja̱je pa'ija̱quë.
7Sirija̱'a daija̱'quë api, ja̱re asajë̱'ë. Si'a pa̱i ñaja'cohua'i a'ë, i̱te, cui'ne i̱te a'si yo'osicohua'ije̱ ñaja'cohua'i a'ë, cui'ne si'a yeja pa'icohua'ije̱ i̱te ñajë ai cuasajë oija̱'cohua'i a'ë. Ja̱je pa'ija̱'coa.
8“Yë'ë aë, du'ru aquë, cui'ne tëjiquë” caji, Ëjaë Maija'quë si'a tutu quë'ire papi, i̱ti pa'iquëpi ja̱'në pa'isiquëpi, cui'ne i̱ti daija̱'quëpi.
De'o Cristore Ñase'e
9Yë'ë, Juan mësaru a'yë a'ë, Maija'quë do'ire. Ja̱je pa'ina, Jesure tsioni pa'i do'ire mësaru ja̱'re te'e pa'iyë, Maija'quë cua̱ñe te̱'te pa'iyere, ai yo'oyere, cui'ne ai yo'ojë quëco tuture. Ja̱je paquëpi Jesucristo case'ere Maija'quë cocare quëa do'ire tse̱asiquëpi Patmos hue'e saodohuëre paë'ë. 10Pa'ina, mai Ëjaëre pare sihua mu'se ti̱'aëna, Maija'quë joyopi yo'oquëna, joyose'e pa'iquë de'osiquëpi Maija'quëre se̱i paë'ë. Pa'i asahuë, yë'ë jeteyo'jepi duruhuë juiyeje̱ pa'yerepa tutu caquëna.
11“Yë'ë a'ë, du'ru aquërepa cui'ne tëjiquërepa. Toyajë̱'ë, te'e toya pëpë më'ë ñañere. Toyani Asia yejana jëjo saojë̱'ë, siete sehuosi tsëcana Efesona, Esmirnana, Pérgamona, Tiatirana, Sardisna, Filadelfiana, cui'ne Laodiceana.”
12Caquëna, ¿nepi ja̱je caye'ni? caquë co'ye po̱nëquë ñahuë, siete pa'ye oropi nesi sotonoana, toa tsë̱'ise'epi pa'ina. 13Ja̱ siete pa'ye pa'i jopore pare pa̱ije pa'ipi, i̱ quë̱ore paja̱'a tsoa ju'i ca̱re ju'i nëcapi. I̱ coti saihuëre paja̱'a oro të̱ica̱pi të̱asiquë paji'i. 14I̱ naña cato poja'yerepa paji'i. Yëi ñama nañaje pa'ye, pa̱nita'a po sirioje̱ pa'yerepa paji'i. Cui'ne i̱ ñaco ca̱pi toa ñoaje pa'yerepa paji'i. 15Cui'ne i̱ quë̱o cato de'o quë̱nare de'oyerepa a̱oni toana ëose'eje̱ pa'yerepa ye'hue pa'ye paji'i. Cui'ne i̱ yë'o cato jai jupo pi̱siyeje̱ pa'yerepa tutu pi̱sipi. 16I̱ ëja te̱'te jë̱tëre siete ma'ñocohua'ire papi. Cui'ne i̱ yë'opopi etapi, hua'ti ñacaje̱ pa'iore papi si'a te̱'ña jë̱jësë̱core papi. Cui'ne i̱ tsiapi ë̱së si'a tuturepa miaquëna, ñañeje pa'yerepa miapi.
17Ja̱re ñani i̱ quë̱ore pana ju̱'ise'eje̱ pa'i ta̱ë'ë. Ta̱iquëta'are i̱pi yë'ëre, i̱ ëja te̱'te jë̱tëpi patoquë capi:
“Ca'rama'ë pa'ijë̱'ë, yë'ë a'ë du'ru aquë cui'ne tëjiquë, 18i̱ti pa'iquë, ju̱'isiquë pa'isiquëpi yure ti pani huesëyë. Yë'ëpi pa'iye, cui'ne ju̱'iñe i̱si tutu payë, cui'ne ju̱'isicohua'i pa'i te̱'te hui'yoquë. 19Toyajë̱'ë, më'ë ñase'ere, yure pa'iyere, cui'ne jeteyo'je pa'i ja̱'ñere. 20Iye a'ë, siete ma'ñocohua'i yë'ë jë̱të pa'isicohua'ire quëaye, cui'ne siete pa'ye oropi nesi sotonoana toa tsë̱'ise'ere quëaye. Siete ma'ñocohua'i cato quëayë, siete hui̱ñaohua'ini, siete tsëca sehuosicohua'i ëjaohua'ini. Cui'ne ja̱ siete pa'ye toa tsë̱'ise'e cato quëaji, siete sehuosi tsëcapë̱a pa'iyere.
Currently Selected:
Apocalipsis 1: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.