Apocalipsis 2
2
Siete Sehuosi Tsëcapë̱ana Toyase'e: Efeso Sehuosicohua'i Tsëcapëre Quëaye
1Efeso sehuosicohua'i tsëcapëre quëacai hui̱ñaëna toyajë̱'ë: ‘Ñeje caji, ëja te̱'te jë̱tëre siete ma'ñocore paquëpi, cui'ne siete pa'ye oropi nesi sotonoana toa tsë̱'ise'e jopoja̱'a cu'iquëpi. 2Yë'ëpi më'ë yo'oye si'aye asayë. Më'ë jëa co'amañare tutu yo'oquë neñe ñañë. Cui'ne më'ë yo'o jujama'ë pa'iye ñañë. Cui'ne co'a pa'icohua'ire quëco ti̱'añe pa̱cohua'i pa'ijëna, asayë. Asayë, cui'ne ëjaë jëjo daocohua'i a'ë cajë coa cacohua'ire neñani coa cosocohua'ire ti̱'ase'e. 3Më'ë cato jë'joye peoyerepa, cui'ne yo'o jujaye peoyerepa yë'ë do'ire ai ai yo'onije yo'oquë a'ë. 4Ja̱je pa'iquëta'are më'ëre te'ore sa̱ñope cacore payë. Më'ë du'ru huëo maca yë'ëre oise'eje̱ pa'ye yure oiye pa̱ñë. 5Ja̱je pa'ina, cuasa ñajaijë'ë, më'ë ja̱'në du'ru macarepa yë'ëre oi pa'ise'ere. Ja̱ maca Maija'quëna po̱nëni cui'naëpi de'oye yo'ojë̱'ë, du'ru huëo maca yo'ose'ere. Ja̱je Maija'quëna po̱nëma'quë pa'ito më'ëre esa sa̱ñope yo'oja̱'quë a'ë. Sani më'ë toa tsë̱'isico pa'isicore jioja̱'quë a'ë. 6Ja̱je pa'iquëta'are më'ë yeque de'huerepa de'oye yo'oye payë. Ja̱ cato më'ë nicolaítas pa̱i si'si yo'oyere coequë pa'iye a'ë. Yë'ëje̱ ja̱ohua'i yo'oyere coeyë. 7Ca̱joro hue'equë pani sehuosicohua'i tsëcapë̱are Maija'quë joyo cayere asajë̱'ë. Quëcosicohua'irepa etasicohua'ini a̱oja'quë a'ë, ti pani huesë so̱quë yë ayere, Maija'quë tsio pa'iconi.’
Esmirnana Quëaye
8Toyajë̱'ë, cui'ne Esmirna sehuosicohua'ire quëacai hui̱ñaëna. ‘Ñeje caji, du'ru aquë, cui'ne tëjiquë, ju̱'isiquëpi cui'naëpi pani co̱quëpi. 9Yë'ëpi ñañë, si'aye më'ë yo'oye, më'ë ai yo'oye cui'ne më'ë co'amaña peoye. Ja̱je pa'iquëta'are më'ë cato ma'tëmore jaiye co'amaña paquë a'ë. Yë'ë asayë, më'ëre judío pa̱i a'ë cacohua'ipi co'aye caye. Ja̱je pa'iquëta'are ja̱ohua'i cato Maija'quë mamajë peoyë. Coa huati ëjaërepa tse̱cohua'i a'ë. 10Ca'rama'ë pa'ijë̱'ë, më'ë ai yo'o ja̱'ñere. Ja̱je pa'ina, mësaru acohua'ire huatipi yo'oquëna, tse̱ani coja̱'cohua'i a'ë, si'aohua'i mësarupi neña cua̱ñosicohua'i pa'iyere cajë. Ja̱ maca mësaru coa diez mu'seña ai yo'oja̱'cohua'i a'ë. Mësaru o̱cue pa'i macarepa pa'ijë̱'ë, si'aye ai yo'oyepi daitoje̱. Yë'ëpi mësarute i̱ti pa'isi do'ire ti pa'iyere i̱sija̱'quë a'ë. 11Ca̱jaro hue'equë pani asajë̱'ë, Maija'quë joyo sehuosicohua'i tsëcapë̱are cayere. Quëcosicohua'i etasicohua'ipi cayaye ju̱'iñe paja̱'cohua'i a'ë.’
Pérgamona Quëaye
12Toyajë̱'ë, cui'ne Pérgamo sehuosicohua'i tsëcapëre quëacai hui̱ñaëna: ‘Ñeje caji, si'a te̱'ña jë̱jësë̱ hua'tiyo paquëpi. 13Yë'ëpi si'aye asayë, më'ë co'amaña yo'oye. Cui'ne asayë, më'ë Satanás cua̱ñe hue̱'ñare pa'iye. Ja̱je pa'i hue̱'ñare pa'iquëta'a më'ë yë'ëre o̱cue pa'i macarepa tuiyë. Yë'ëre i̱re pare cuasaye je̱oñe pa̱huë, më'ë. Ja̱ro Satanás pa'i hue̱'ñana Antipasre yë'ëre quëacaiquëre mësaru aquëre huani je̱o mu'señaje. 14Ja̱je pa'iquëta'are më'ëre a'ri maña sa̱ñope caye payë: Ja̱rote më'ë payë, te'ohua'ise'ere Balaam ye'yaquë pa'ise'ere je̱oñe coecohua'ire. Ja̱ëpi Balacre ye'yapi, Israel pa̱ire ne ta̱ojaquë caquë. Cui'ne pa̱i de'huasi diusure i̱sisi hua'i a̱iñe de'oji, cui'ne nomiohua'ire coa yo'oroja̱iñe de'oji cajë̱'ë caquë, yëhuoquë pa'a̱ji'i. 15Cui'ne ja̱rote më'ë payë, yecohua'ireje̱ nicolaítas ye'yase'e je̱oñe coecohua'ire. 16Ja̱je pa'ina, Maija'quëna po̱nëjë'ë, më'ë Maija'quëna po̱nëma'quë pa'ito, yë'ëpi më'ë quë'rona esa sani ja̱ohua'ire uihuaja̱'quë a'ë, yë'ë yë'opo eta hua'tiyopi. 17Ca̱joro hue'equë pani asajë̱'ë, Maija'quë joyo sehuosicohua'i tsëcapë̱are cayere: Si'aye quëcosicohua'i etasicohua'ini a̱oja'quë a'ë, yahuesi manare pare, joyo tutu i̱si a̱orepa. Cui'ne po quë̱na përe i̱sija̱'quë a'ë, i̱ti pëna te'e huajë mami pa̱ije ti ñama'coni toyasiconi. Coa i̱ti i̱sisiquëse'e ñañe pasipi.’
Tiatirana Quëaye
18Toyajë̱'ë, cui'ne Tiatira sehuosicohua'i tsëcapëre quëacai hui̱ñaëna: ‘Ñeje caji, Maija'quë mamaquë, toa ñoare paje̱ pa'ye ñaco ca̱ hue'equëpi, cui'ne i̱ quë̱ore, broncere de'o quë̱nare de'oyerepa a̱ose'eje̱ pa'ye hue'equëpi. 19Yë'ëpi si'aye asayë, më'ë yo'oye. Ñañë, më'ë pa̱ire oiye, më'ë Maija'quë pa'iji cuasaye, cui'ne më'ë quëcoye. Cui'ne asayë, më'ë du'ru huëo maca yo'ose'e ai jerepa yure yo'oquë pa'iye. 20Ja̱je pa'iquëta'are më'ëre a'ri maña sa̱ñope caye payë. Më'ëpi ja̱o Jezabelre Maija'quë ayere cayë cacore coa quëcoquë i̱o co'aye yo'oye ñaquëna, yë'ë jo'yare i̱o ye'yayepi cosoco ye'yaco nomiohua'ire coa yo'oroja̱iñena cui'ne pa̱i de'huasi diusuohua'ire i̱sise'ere a̱iñena. 21Yë'ëpi ja̱ote tsoe maca pa'iye i̱sihuë, i̱opi cuasa ñajani Maija'quëna po̱nëjaco caquë. Ja̱je pa'iquëta'are i̱opi coeco po̱nëñe pa̱co. Cui'ne ë̱mëohua'ire yo'oyeje̱ je̱oñe pa̱co. 22Ja̱ do'ire yë'ëpi i̱ote ca̱i saihuëna jëjo o̱aja'quë a'ë. Cui'ne i̱ote yo'ocohua'ini, ai ai yo'oyepi neja'quë a'ë, i̱o co'aye yo'oyere ña jujani Maija'quëna po̱nëma'cohua'i pa'ito. 23Cui'ne i̱o mamajëreje̱ huani je̱aja'quë a'ë. Ja̱je yo'oquëna, si'a sehuosicohua'i tsëcapë̱a yë'ë api si'aye pa̱i cuasaye cui'ne joyo pa'iye ñaquë asaja̱'cohua'i a'ë. Ja̱je pa'ina, yë'ëpi mësarute pa̱i ñape yo'ose'eje̱ pa'ye sa̱i de'huaja̱'quë a'ë. 24Ja̱je pa'iquëta'are, mësarute yecohua'ire Tiatira pa'icohua'ire cayë: Mësaru yo'o ja̱'ñe ai jerepa cua̱ñeñe pa̱ñë, ja̱ co'aye ye'yayere tuima'cohua'ire, cui'ne Satanás tse̱re ta̱'ñe asayere pa'ë cajë ye'yayere asama'cohua'ire. 25Ja̱je pa'iquëta'are mësaru yure payere de'hua ñajë pajë̱'ë, yë'ë dai macaja̱'a. 26Quëcosicohua'i etasicohua'ini, yë'ë yëyere yo'ojë pa'isicohua'ini, pa̱i yejaña cua̱ñe ëjaohua'ire neja'quë a'ë, 27yë'ë ja'quë yë'ëre cua̱ñe ëjaëre nese'eje̱ pa'ye. Ja̱ maca quë̱na tarapëpi ca̱jijë jai pa̱i yejaña cua̱ñeja'cohua'i a'ë, ya'o cua'conoa të'ca jo'a saoyeje̱ pa'ye yo'ojë. 28Cui'ne ja̱ohua'ire cato ñata to̱me macarepa miacai ma'ñocore pani i̱sija̱'quë a'ë. 29Ca̱jaro hue'ecohua'i pani asajë̱'ë, Maija'quë joyo sehuosicohua'i tsëcapë̱are cayere.’
Currently Selected:
Apocalipsis 2: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.