Filipenses 1
1
Pablo Cosiquëpi Toyase'e
1Pablo cui'ne Timoteo Jesucristo jo'yapi toyayë, iye toya ja'hua si'a Maija'quë do'ijëna, Maija'quë acohua'ina Jesure cajë, tsiosicohua'ina ëjaohua'ina, cui'ne co'amaña caracohua'ire co̱caicohua'ina, cajë toyayë, Filipos daripë pa'icohua'ina. 2Maija'quëpi cui'ne Ëjaë Jesucristopi co̱ni oi coa i̱siyepi de'oye jo'cua pa'ijë̱'ë.
Pablopi Sehuosicohua'ire Se̱cacaiye
3-5Du'ru huëosi mu'sepi iye mu'sena, yë'ë ja̱'re te'e de'o coca co̱ni necai do'ire, yë'ë mësarute cuasaye ñape de'oji caquë pëpayë, Maija'quëna. Cui'ne i̱te se̱ maca ai sihuaquë mësarute si'aohua'ire se̱cacaiyë. 6Ja̱je pa'ina, nuñerepa asayë, yë'ë, Maija'quë mësaruna de'o co'amaña ne huëosiquëpi je̱oma'ë de'oyerepa ne saoja̱'quë api, Ëjaë Jesucristo dai macaja̱'a. 7Ja̱je pa'ina, mësarupi yë'ë ja̱'re co̱ni Maija'quë coa i̱siyere pa do'ire, mësarute ai oi ja̱je cuasaye nuñere pa'ë. Ja̱je pa'ina, mësarupi yë'ë joyore pa'i do'ire yë'ë ja̱'re pa'iyë, yë'ëpi co sitore pa'ito panita'a Maija'quë huaso cocare co'aye cajëna, yë'ëpi ë̱sequë sa̱ñope, iye nuñerepa coca'ë caquë ëjaohua'i ña hue̱'ñana quëa hue̱'ñare. 8Yë'ë mësarute, Jesucristo oiyepi ai oiyë. Ja̱ oiyere Maija'quëpi ñaji.
9Ja̱je pa'ina, mësarute Maija'quëre se̱cacaiyë, mësarupi ai ta̱'ñe cuasacohua'ipi cui'ne si'aye asa ti̱'acohua'ipi ai jerepa pa̱ire oicohua'ipi, 10cui'ne de'oyese'e co'ejë yo'oja̱jë caquë. Ja̱je yo'ojë pa'ijë mësaru si'si peocohua'i pa'ija̱'cohua'i a'ë. Pa'ijëna, Cristo dani mësarute sa̱ñope caye pa̱sipi. 11Pa̱quëna, mësarupi Jesucristo necai do'ipi nuñerepa yo'oyere quë̱isë'eje̱ pa'ye pa'ija̱'cohua'i a'ë, Maija'quëre de'oquëre pa'ni cajë sihua ja̱'ñere.
Cristo Api, Yë'ë Pa'iye
12Yë'ë tëto saise'epi de'o coca jerepa quëaye po̱nëpi. Ja̱je mësaru Maija'quë do'ijëpi iyere asaja̱jë caquë quëayë. 13Ja̱je pa'ina, si'aohua'i soldado pa̱i ëjaë huë'e pa'icohua'i cui'ne si'aohua'i yecohua'ije̱ asayë, Cristore tui do'ire tse̱a cua̱ñosiquë pa'iye. 14Ja̱je yë'ë tse̱a cua̱ñosiquë pa'ina, ñajë sehuosicohua'ipi ai jerepa mai Ëjaëna quëcojë Maija'quë cocare ti ca'raye peoyerepa yëjë quëayë.
15Yecohua'ipi Cristo coca quëayë, yecohua'i quëayere ëa ñajë pë̱ijë, ai jerepa pa'iohua'i a'ë cuasajë. Ja̱je pa'iquëta'are yecohua'ipi de'oye cuasajë quëayë. 16Ja̱je pa'iquëta'are yecohua'ipi nuñerepa quëama'pë i̱ohua'i yëyere ti̱'añu'u cuasajë Cristo coca quëayë. Ja̱je yo'ojëna, yë'ëpi co sito pa'iquëpi ai co'a ju̱'ijaquë cajë. 17Ja̱je pa'iquëta'are de'oye cuasajë pa̱ire oijë quëacohua'i cato asayë, yë'ë i̱ño pa'iye, Maija'quë coca sa̱ñope cacohua'ire ca de'huaja̱'quëpi. 18Ja̱je pa'ina, yë'ëre i̱quepi co'aquë'ni si'aye de'oji, Cristo cocare pa̱ire oijë quëatoje̱, pa̱nita'a oima'pë coa quëatoje̱, si'aye sihuayë.
19Ja̱je pa'ina, Mësaru Maija'quëre se̱cacai do'ipi, cui'ne Jesucristo joyo co̱cai do'ipi cosiquëpi huaso cua̱ñosiquë pa'ija̱'quë a'ë cuasaquë sihuayë. 20Ja̱je pa'ina, yë'ë cato coa teaye ca jujani to̱me huesëma'ë pa'ija̱'quëpi cayë. Ja̱je pa'ina, yë'ë pa'iye ña do'ire mësarupi Cristo ai jerepa pa'i api, cuasaja̱jë caquë yo'oquë pa'iyë, yë'ë huajëquë pa'i maca cui'ne yë'ë ju̱'isi macaje̱. 21Ja̱je pa'ina, yë'ë pa'ye a'ë, Cristo cui'ne ju̱'iñepi coa jerepa de'oyere se ti̱'añe a'ë. 22Ja̱je pa'iquëta'are yë'ëpi ca̱përe huajëquë pa'ini, Ëjaë co'amañare yo'oye pa'iji. Ja̱je pa'ina, i̱quepi jerepa de'oquë'ni cuasayë, cui'ne de'oyese'e pa'ina, ñaquë. 23Ja̱je cayaye pa'ina, ¿i̱quepi jerepa de'oquë'ni, yë'ëre cuasaquëna jëaji, i̱ti yo'o ja̱'ñe? Ja̱je pa'iquëta'are yë'ëre cato ai jerepa de'oji, ju̱ni sani Ëjaë ja̱'re de'oye pa'iyepi. 24Ja̱je pa'iquëta'are, mësarute cato jerepa de'oji, yë'ëpi mësaru ja̱'re ja̱ yë'ta'a huajëquë pa'iyepi. 25Ja̱je pa'ina, nuñerepa cuasayë, yë'ëpi mësaru ja̱'re co̱ni pëaye de'oji, mësaru Maija'quëre necaiquëre pare cuasayere se mëocasi'i caquë cui'ne Maija'quëre cuasajë ai jerepa sihua ja̱'ñere caquë. 26Ja̱je pa'ina, mësarupi yë'ëre huajëquë pa'ina, ti̱jupë ña co̱jë ai jerepa Ëjaë Jesucristo necaise'ere, ñajë sihuaja̱'cohua'i a'ë.
27Yë'ëpi mësarute sani ñaquëna, pa'iyeje̱ pa'ye pa'ijë̱'ë, yë'ëpi so'ore pa'itoje̱, Cristo de'o coca cayeje̱ pa'ye pa'ijë̱'ë. Ja̱je pa'ijëna, mësaru o̱cue pa'i macarepa tuiyere, te'e cuasayena tsiosicohua'ipi, si'aohua'i te'e sa̱ñope, huaso cocare nejocaiyere ë̱sejë uihuayere quëajëna, coca asaye yëyë. 28Mësarute sa̱ñope yo'ocohua'ini ne quëco cua̱ñoma'pë pa'ijë̱'ë. Ja̱je pa'ina, mësaru quëcojë pa'iyepi ti̱ñarepa i̱ñoji, ja̱ohua'i ne huesë hue̱'ñana saiyere cui'ne mësarupi huaso cua̱ñosicohua'i pa'iyena saiyere i̱ñoji. Ja̱ pa'iye cato Maija'quë i̱siye a'ë. 29Ja̱je pa'ina, Cristo do'ire huaso cua̱ñoñese'e i̱siye pa̱pi, cui'ne Cristo do'ire, ai yo'o ja̱'ñeje i̱sipi, mësarute. 30Yureta'a mësaru yë'ë ja̱re co̱ni tsiosicohua'ipi te'ere uihuajë pa'iyë, yë'ë ja̱'në uihuaye ñasicohua'ipi cui'ne yureje̱ ja̱ yë'ta'api yë'ë uihuaye asajë pa'iyë.
Currently Selected:
Filipenses 1: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.