Efesios 6
6
Mamajë Cui'ne Pëca Ja'quëohua'i Pa'iye
1Mai Ëjaëre sehuocohua'i sëte mësaru ja'quëohua'i cua̱ñeñere de'oye sehuojë yo'ojë pa'ijë̱'ë. Ja̱je yo'oye nuñere pa'ë. 2Moisés cua̱ñese'epi ca nëose'e pacopi du'ru acopi caco ñeje: “Më'ë ja'quëre cui'ne më'ë ja'core oi ëjaohua'ire ñaquë pajë̱'ë, jai do'i quë'iohua'ire cuasaquë. 3Ja̱re yo'oquëpi iye yejare ai tsoe sihuaquë de'oye pa'ija̱'quë api.”
4Cui'ne mësaruje̱ ja'quëohua'ije̱, mësaru mamajëre pë̱ti ëaye ne huëoma'pë pa'ijë̱'ë. Coa ai jerepa tayoyese'e nu'ñejë ye'yajë ai de'huajë̱'ë, mai Ëjaë oi yëhuoye ayepi.
5Jo'yaohua'i iye yeja mësaru ëjaohua'ire de'oye sehuocaijë̱'ë. Cristore necaiyeje̱ pa'ye cuasajë. Ëjaohua'ire ñajë, ca'rajë nuñere papi yo'ojë necaijë̱'ë.
6I̱ohua'i mësarute ña macase'e de'oye yo'oyeje̱ pa'ye yo'oma'pë pa'ijë̱'ë, coa ai jerepa si'a joyorepa de'oye cuasajë nejë'ë, Diusu yëyeje̱ pa'ye, Cristo jo'yaohua'i sëte. 7Mai Ëjaëre necaiyeje̱ pa'ye de'oye cuasajë sihuajë pa̱ire co'amaña de'oyerepa necaijë̱'ë. 8Tsoe mësarupi asayë, pa̱i ñapere i̱ohua'i yo'ose'eje̱ pa'ye jo'yaohua'ire cui'ne jo'yaohua'i peocohua'ire Ëjaëpi i̱si ja̱'ñe. 9Ëjaohua'ije̱ de'oye yo'ojë̱'ë, mësarute necaicohua'ire. Tutu cajë yo'oma'pë pa'ijë̱'ë. De'hua cuasajë̱'ë, mësaru cui'ne ja̱ohua'i te'e Ëjaëni ma'tëmo aquëre payere, si'a yë'quë maca si'aohua'ire ñaquëni.
Sehuosicohua'i Joyopi Uihua Co'amaña
10Yure cato Maija'quë do'ijë, i̱ tutu jerepa pa'yena tsioni i̱ ja̱'re pa'ijë, tutu quë'iohua'i pa'ijë̱'ë. 11Si'aye huati cosoyere, sa̱ñope quëco saojë̱'ë, o̱cue pa'i macarepa pa'iyere cajë, Diusu uihua ja̱'ñe i̱sise'epi. 12Mai cato uihuama'pë pa'iyë, pa̱ini ca̱pë cui'ne tara quë'iohua'ini. Mai cato uihuayë, maire meñe cua̱ñe tutu payere, huati cosoye tutu quë'iyere uihuayë, iye mu'seña nea hue̱'ña huati ëjaohua'i quë'i cua̱ñe tuture. Maija'quë te̱'tepi sa̱ñope uihuayë, co'ayepi maina cacayere ë̱sejë.
13Ja̱je pa'ina, co'a mu'se ti̱'aëna, quëcoyere cajë Maija'quë mësaru uihuaja̱'a ca̱ña i̱sise'ena su̱ñasicohua'ipi pa'ijë̱'ë. Ja̱je pa'ijë quëcosi jeteyo'je ta̱ima'cohua'irepa pa'ija̱'cohua'i. 14Soldado uihua të̱ica̱re su̱ñañeje pa'ye nuñere pare su̱ñasicohua'ipi o̱cue pa'i macarepa pa'ijë̱'ë, cui'neje soldado coti saihuë jëacaicore su̱ñañeje pa'ye nuñerepa yo'oyere su̱ñasicohua'ipi o̱cue pa'i macarepa pa'ijë̱'ë. 15Cui'ne Maija'quë coca jo'cua pa'iyepi ne de'huasicohua'i pa'ijë̱'ë, soldado zapato su̱ñase'eje̱ pa'iohua'i. 16Cui'ne mësaru Maija'quëre pa'iji cuasayere mësarute jëacai cua'arepa pajë̱'ë, huati hua'jo ñaña toa quë'yepi daina, si'aye ne yayoja̱'core. 17Cui'ne mësaru huaso cua̱ñose'ere quë̱na mapëje̱ pa'iore pajë̱'ë, si̱opë jëacaicore pajë cui'ne Maija'quë joyo hua'tiyore Maija'quë cocare i̱sicohua'i pa'ijë̱'ë. 18Cui'ne Maija'quëre se̱ñe je̱oma'pë si'anë ai se̱jë pa'ijë̱'ë, Maija'quë joyo cayeja̱'a. Yo'o jujahuë cuasama'pë, o̱cue pa'i macarepa cui'ñasicohua'ipi pa'ijë si'aohua'ire Maija'quë tse̱cohua'ire se̱cacaijë pa'ijë̱'ë. 19Cui'ne yë'ëreje̱ se̱cacaijë̱'ë, Maija'quëpi yë'ë ca ja̱'ñe i̱siquëna, caquë huaso coca yahuese'ere ti̱ñarepa asa ti̱'añe, quëcoquë caja̱'quëre. 20Maija'quëpi yë'ëre, iye cocare quëacaija̱quë caquë jëjo daosiquë a'ë, ja̱re quëa do'ire, yure yë'ë co cua̱ñosiquë pa'iyë. Se̱cacaijë̱'ë, yë'ë ca'rama'ë i̱ coca quëacai ja̱'ñere.
21Tíquico Maija'quë do'iquë, mai oiquëpi, je̱oñe peoyerepa mai Ëjaë co'amaña co̱caiquëpi, si'aye quëasipi, yë'ë i̱ño pa'iye, cui'ne yë'ë yo'oquë pa'iyeje̱. 22Ja̱je pa'ina, jëjo saoyë, mësaru quë'rona i̱pi sani i̱ño yëquë pa'iyere quëaquë, mësarute jerepa yëjë de'oye yo'oja̱'cohua'ire nejaquë caquë.
23Diusu Maija'quëpi cui'ne Ëjaë Jesucristopi Maija'quë do'ijëre jo'cua pa'iye sa̱'ñe oiye i̱sija̱quë Maija'quë pa'iji cuasa do'ire. 24Cui'ne Maija'quëpi i̱ oiye yeque po̱nama'quëpi de'oye ñacaija̱quë si'aohua'i Jesucristore oicohua'ire.
Currently Selected:
Efesios 6: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.