1 Corintios 1
1
Corinto Sehuosicohua'ina Pablopi Toya Saoye
1Maija'quë i̱ yëyeje̱ yë'ëre Pablore nepi. Jesucristo jëjo daoquëre nesiquëpi pa'iyë. Iye toya ja'hua Sóstenes ja̱'re toyayë, Cristo do'ire, Maija'quë do'iquë de'osiquë ja̱'re co̱ni. 2Ja̱ro Corinto daripë sehuosicohua'i pa'icohua'i cajë toyayë, Cristo Jesuna tsioni pa'i do'ire. Maija'quë tse̱cohua'i pa'icohua'ina cajë toyayë. Si'a hue̱'ña sehuosicohua'i pa'ijë Ëjaë Jesucristo de'oquërepa mamire se̱cohua'i ja̱'re co̱ni mësaruteje̱ soipi, i̱na i̱sisicohua'ipi de'ocohua'i pa'ija̱jë caquë. Ja̱je pa'ina, Cristo api, mai Ëjaë cui'ne ja̱ohua'i Ëjaë. 3Diusu Maija'quëpi cui'ne mai Ëjaë Jesucristopi co̱ni de'oye yo'ose'ere pajë cui'ne de'oye pa'iye i̱sise'ere pajë de'oye pa'ijë̱'ë.
Cristo Do'ipi De'oye Pa'iye
4De'oyerepa Maija'quë mësarute yo'o u'ni Ëjaë Jesucristo do'ipi caquë, Maija'quëre si'anë de'oji caquë, sihuayë. 5Ja̱je pa'ina, Maija'quëpi mësarute ta̱'ñe coca caye cui'ne ta̱'ñe asaye i̱sipi, joyo aye do'i quë'yere pare. 6Ja̱je pa'ina, coa caye peoyerepa Cristo cocapi mësarute ti̱ñe pa'iye po̱napi. 7Po̱naëna, pa'ijë Jesucristo daija̱'a mu'sere utejë pa'icohua'ire ti̱ñe po̱naëna, pa'iye Maija'quë i̱siye ti jopo caraye peoji. 8Ja̱je pa'ina, mësarute Diusupi o̱cue pa'i macarepa ñacai pasipi, tëji mu'sere paja̱'a, yecohua'ipi mësaru Maija'quë quëcosicohua'ire Jesucristo daisi maca tayo yo'ocohua'i a'ë caye pa̱ja'cohua'ire i̱pi ñacai paja̱quë. 9Maija'quë i̱ ca nëose'eje̱ pa'ye yo'o ti̱'aquëre papi mësarute soipi, i̱ mamaquë mai Ëjaë Cristo Jesús ja̱'re tsioni pa'ija̱jë caquë.
Sehuosicohua'i Huase'e
10Maija'quë do'ijë mësarute se̱ñë, mai Ëjaë Jesucristo mamipi, de'oye te'e cuasajë, cui'ne te'e nëina, pa'ija̱jë caquë. Huahuesicohua'i pa'ima'pë pa'ijë̱'ë. Coa ai jerepa te'e cuasayepi pa'ijë̱'ë. 11Ja̱je mësarute cayë, Cloé tsëcapëpi mësaru te'e cuasama'pë pa'iyere quëarena. 12Ja̱je te'e cuasama' do'ire mësaru cayë, pa̱i ñape ñeje: “Yë'ë cato Pablo aquë a'ë.” Yecohua'ipi cayë: “Yë'ë cato Apolos aquë a'ë.” Yecohua'ipi cayë: “Yë'ë cato Pedro aquë a'ë.” Yecohua'ipi cayë: “Cristo aquë a'ë.” 13¿Ja̱je pa'ito Cristo i̱ a'ri te̱'ña maña huahuesiquë a'ë? ¿Pa̱nita'a Pablo, yë'ëpi cruz que̱ cua̱ñore mësaru do'ire? ¿Pa̱nita'a Pablo mamipi do cua̱ñosicohua'i a'ni? 14Pa̱ni, de'oji sihuayë, Maija'quë ñacaina, de'hue jai pa̱ire doye pa̱huë. Coa Crispore cui'ne Gayore dohuë. 15Ja̱je doye pa̱si do'ire yecohua'ije̱ yë'ë Pablo mamipi do cua̱ñosiquë a'ë caye pa̱ja'cohua'i a'ë. 16Coa Estéfanas tsëcapëse'ere oco dohuë. Cui'ne, yecohua'ita'are doye pa̱huë, cuasayë. 17Yë'ëre pa̱ire oco doquë pa'ijë̱'ë caquë Cristo cua̱ñeñe pa̱pi. Coa i̱ cocare quëacaijë̱'ë caquë cua̱ñepi. Ja̱je pa'ina, i̱ cruz ju̱'ise'e do'i quë'yere quëayë. Yë'ëpi de'o pa'i cocapi caquë quëaquëna, pa̱ipi yë'ëna i̱re papi cuasajë Cristo cruz ju̱'ise'ere do'i peoye necaiye coeyë.
Cristopi Maija'quë Tuture Cui'ne Ta̱'ñe Asaye Paquë
18Cristo cruz ju̱'ise'e cato do'i peo coca asa cua̱ñoji, ne huesë hue̱'ñana saicohua'ire. Ja̱je pa'iquëta'are iye coca Maija'quë tuturepa asa cua̱ñoji, huaso cua̱ñocohua'ire cato. 19Ja̱je pa'ina, toyase'e caji:
Ta̱'ñe asacohua'i asaye nejoja'quë a'ë.
Cui'ne asa ti̱'acohua'ireje̱ i̱ohua'i asa ti̱'añe ti̱rona yahueja̱'quë a'ë.
20¿Maija'quëpi, ta̱'ñe asaquëre, ye'yaquëre cui'ne iye yeja ayere ta̱'ñe ca de'huaquëre do'i peoquëre neru, yure i̱quere co̱caiye'ni, ja̱ohua'i? Co̱caiye pa̱ñë, Maija'quëpi iye yeja ta̱'ñe asayere do'i peoye neina. 21Ja̱je pa'ina, iye yeja pa̱ipi i̱ coca do'i peoye cuasayë. Cuasajëta'a ja̱ cocare quëase'epi i̱te i̱re pare asacohua'ise'ere huasoye pa'iji. Ja̱je pa'ina, pa̱i ta̱'ñe asayepi Maija'quëre ti̱'añe pa̱ñë.
22Judío pa̱ipi pa̱i yo'o ti̱'a ma'ñere yo'ojëna, ñañe yëyë. Griego pa̱ipi cato ai ta̱'ñe asacohua'i pa'iyere co'eyë. 23Ja̱je pa'iquëta'are yëquë cato ja̱ohua'i co'eyere yo'oma'pë pa'ijë coa Cristo cruz que̱ cua̱ñosiquë ayere quëayë. Quëajëna, judío pa̱ini ta̱'tëpoje̱ pa'ye asa cua̱ñoji, i̱ohua'i que̱siquëni quëajëna. Cui'ne judío pa̱i peocohua'ini griego pa̱ini coa do'i peoyere yo'ojë cayeje̱ pa'ye asa cua̱ñoji. 24Ja̱je pa'iquëta'are judío pa̱ipi pa̱nita'a griego pa̱ipi Maija'quë soisicohua'ire cato Maija'quë tuturepa cui'ne i̱ ta̱'ñe yo'oyerepa do'i quë'ye asa cua̱ñoji. 25Maija'quë yo'ose'e do'i peoye pa̱ire asa cua̱ñoñepi, pa̱i ta̱'ñe asayere tëto saise'e pa'iji. Jesupi ju̱quëna, tutu peoquëje̱ pa'iji. Ja̱ yë'ta'a i̱ ju̱'i maca i̱ tutupi pa̱i tutu tëto saise'erepa pa'iji. 26Maija'quë soisicohua'i mësaru te'ohua'ise'e pa̱i ëjaohua'i pa'iyë. Te'ohua'ise'e iye yeja pa'iye ta̱'ñe asacohua'i pa'iyë. Cui'ne te'ohua'ise'e ëjaohua'irepa tsëcapë acohua'ije̱ pa'iyë. Mësarupi tsoe asayë, ja̱je pa'iye. Maija'quëpi ja̱je soipi, mësarute. 27Pa̱ipi huesëohua'ire ñacohua'ini Maija'quëpi sahuapi, ta̱'ñe pa'iohua'i a'ë cacohua'ire i̱ño quëcosi'i caquë. Cui'ne cua̱ñe tutu peocohua'ire pa̱i ñacohua'ini cua̱ñe tutu quë'iohua'ire sahuapi, cua̱ñe ëjaohua'ini i̱ño quëcosi'i caquë. 28Iye yeja pa̱ipi do'i peocohua'ire ñacohua'ini Maija'quëpi sahuapi, do'i quë'iohua'i pa'isicohua'ini cui'ne ëjaohua'ini do'i peocohua'ire nesi'i caquë. 29Ja̱je pa'ina, yë'ëpi jerepa pa'i a'ë cuasaye peoji, Maija'quë ña hue̱'ña. 30Maija'quëpi Cristo Jesús ja̱'re tsioni pa'iye nepi, maire. Cui'ne Cristo api, mai ta̱'ñe asaye, Cristo do'ipi Maija'quë ja̱'re tsioni nuñerepa pa'iye, Cristo do'ipi i̱na i̱sisicohua'ipi nuñerepa yo'ocohua'i pa'iye, cui'ne Cristo do'ipi huasosicohua'i pa'iye, nequë. 31Ja̱je pa'ina, Maija'quë coca toyase'e cayeje̱ pa'ye: “Jerepa pa'i a'ë cuasaye yëni Ejaë Jesuni cuasaye pa'iji, jerepa pa'ire pani.”
Currently Selected:
1 Corintios 1: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.