1 Corintios 2
2
Cristo Que̱ Cua̱ñosiquë Coca
1Maija'quë coca mësarute quëa maca ta̱'ñe cacohua'i cocapi caquë quëama'ë paë'ë. 2Mësaru ja̱'re pa'i maca yequere cuasaroja̱i cama'ë paë'ë. Coa Jesucristo que̱ cua̱ñosiquëni cuasaquë quëahuë. 3Coa tsasiquë maca ca'raquë teaye pa'i macapi mësaru quë'ro ti̱'ahuë. 4Mësarupi yë'ë cayere sehuocaija̱jë caquë pa̱ise'e cuasajë ta̱'ñe coca cayepi caquë mësarute quëaye pa̱huë. Coa Maija'quë joyo co̱caiyepi cui'ne Maija'quë tutupi quëahuë, 5mësaru Maija'quëre necacaiquëre pare asayepi Maija'quë tutupi nese'e pa'ija̱quë caquë, pa̱ni pa̱i ta̱'ñe asayepi.
Diusupi I̱ñopi I̱ Joyo Ayeja̱'a
6Ja̱je pa'iquëta'are ta̱'ñe pa'i cocapi cajë quëayë, Maija'quëre tuicohua'i nuñerepa asacohua'ire cato. Iye yeja ta̱'ñe pa'iohua'i ca cocapi cajë cui'ne pa̱i ëjaohua'i coa esa ne huesëja̱'cohua'i ca cocapi cajë quëaye pa̱ñë. 7Coa ai jerepa Diusu de'oquërepa ta̱'ñe pa'ye ye'yayepi quëayë, Maija'quë i̱se'e cuasaquë pa'iyere. Ja̱ yë'ta'a yeja de'huama'në mai ai de'oye pa ja̱'ñere cuasa nëose'ere quëayë. 8Iye yëquë quëaye ti iye yeja cua̱ñecohua'i asa ti̱'añe pa̱ñë. Ja̱je asa ti̱'ama' do'ire Jesucristore de'oquëre pare que̱ni huani je̱oa'huë'ë, asa ti̱'asicohua'i pani pa̱ra'huë, huaiye. Ja̱je yo'ohuë, ja̱je toyase'e cayepi pa'ina. 9I̱ti toyase'e cato caji:
Pa̱ije ti ña ma'ñere pa̱i ti asa ma'ñere,
Cui'ne pa̱i ti a'ri mañaje cuasa ma'ñere,
Maija'quëre oicohua'ire i̱si ja̱'ñe ne de'huacaise'e paji.
10Ja̱re yëquëre i̱ñopi, i̱ joyopi yëquëni pa'i do'ire. De'o joyo cato si'aye Maija'quë cuasaquë pa'iye asaquë api. Ja̱je pa'ipi si'aye iyere i̱ñopi.
11Pa̱i asa ti̱'añe peoji, yeque cuasaquë pa'iye. Coa ja̱re i̱ joyose'e i̱ cuasaquë pa'iye asaquë pa'iji. Ja̱je cui'ne Maija'quëreje̱ ja̱re i̱ joyose'e i̱ cuasaye asaquë pa'iji. 12Mai cato Maija'quë joyore payë. Iye yeja joyore paye pa̱ñë. Ja̱je pa'ina, Maija'quë maire oi coa i̱siyere asayë. 13I̱sina, i̱ joyo i̱si cocapi cajë quëayë, Maija'quë ye'yayepi. Coa yëquë ta̱'ñe cuasayepi cajë quëama'pë pa'iyë. Maija'quë joyo yo'oye quëayë, Maija'quë joyo yo'oye asacohua'ina.
14Maija'quë joyo peoquë cato iye ti asa ti̱'añe peoji. Coa do'i peoyeje̱ pa'ye asaye pa'iji. Iye cato joyo aye a'ë. Ja̱re joyo pa'iye asacohua'ise'e asaye pa'iji. 15Jepi nuñere pa'ni caquë si'aye asaquë api, Maija'quë joyo paquë cato. Ja̱je pa'ini i̱ pa'iyere yecohua'ipi ca tëjini de'huasi'i cajë yo'oye peoji. 16Ja̱je pa'ina, toyase'e caji: “Ëjaë cuasaye asa ti̱'añe peoji. Cui'ne Maija'quëre pa̱ipi se ye'yaye peoji.” Ja̱je pa'iquëta'are mai cato Cristo cuasayere payë.
Currently Selected:
1 Corintios 2: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.