1 Corintios 3
3
Maija'quë Co'amaña Necaicohua'i Yo'oye
1Maija'quë do'ijë, yë'ë mësarute ca maca cama'ë paë'ë, Maija'quë joyopi cuaquëna, pa'icohua'ire cayepi. Pa̱huë, caye mësarupi Cristo ayere asa ti̱'ama'cohua'ipi tsi̱tu'uje̱ pa'iohua'i pa'i do'ire. Ja̱je pa'ina, pa̱ise'e yëye yo'ocohua'ire cayepi cahuë. 2Ja̱je pa'ina, mësarute a̱'jiñere ye'yahuë, tsi̱ maña oje tsu̱'sucohua'ire yo'oyeje̱ pa'ye. Ja̱je ye'yahuë, mësarupi jëa a̱o a̱ni ti̱'ama'cohua'ije̱ pa'iohua'i pa'ijëna, ñaquë. Yureje̱ ja̱ yë'ta'a joyo pa'iyere asa ti̱'ama'cohua'i pa'iyë, mësaru, pa̱ise'e cuasayere ja̱ yë'ta'api pa'ijë. 3Ja̱ do'ire ja̱ yë'ta'a pa̱ise'e cuasayere payë: yecohua'i payete ña ëaye, sa̱'ñe pë̱ti yo'oye, cui'ne te'e cuasama'pë sa̱ñope cuasayere cayere. Ja̱ do'ire sehuoma'cohua'i yo'oyere yo'oyë, mësaru. 4Ja̱ do'ire yecohua'i ñeje cayë: “Pablore ye'yequë a'ë.” Yecohua'ipi cayë: “Yë'ë Apolosre ye'yequë a'ë.” Ja̱je yo'ojë cani mësaru coa pa̱ise'e cuasayere pa'icohua'i cayere cayë.
5¿Ja̱je pa'ito i̱quei'ni, Pablo? ¿Cui'ne i̱quei'ni, Apolos? Yëquë cato coa Maija'quëre necaicohua'i a'ë. Ja̱je pa'ina, yëquëpi quëajëna, mësaru cato asajë sehuosicohua'i a'ë, mai Ëjaëni. Pa̱i ñape yëquë mai Ëjaë ñaquë i̱sise'eje̱ pa'ye yo'ohuë. 6Yë'ëpi ta̱ñeje pa'ye quëahuë, Maija'quë cocare cui'ne Apolospi ta̱se'ere oco do'ecaiyeje̱ pa'ye quëapi, Maija'quë coca mësarute. Ja̱se'e pa'iji, yëquë nese'e. Ja̱je pa'iquëta'are ta̱se'e mëoñe cato Maija'quë yo'oye a'ë. Ja̱je pani Maija'quëpi mësarute ai de'huaji, i̱te cuasayena. 7Maija'quëpi i̱ti ñese mëañe cato neji. I̱ti ta̱quë cui'ne i̱ti oco do'equë do'i peoyë. 8Ja̱je pa'ina, ta̱cohua'i cui'ne oco do'equë si'a yë'quë maca pa'iohua'i a'ë. Ja̱je pa'iquëta'are Maija'quëpi pa̱i ñapere i̱ohua'i nese'eje̱ pa'ye sa̱ija'quë api. 9Yëquë cato Maija'quë co'amañare necaicohua'i a'ë. Mësaru cato i̱ tsioje̱ pa'iohua'i a'ë.
Cui'ne mësaru Maija'quë huë'e'ë. 10Maija'quë yëyere ta̱'ñe yo'oye i̱sise'eje̱ pa'ye nehuë. Yë'ë cato de'oyerepa huë'e ne huëose'ere o̱ahuë. Yë'ë nesi jeteyo'je yequëpi huë'e ë̱mëje'e cato neñe pa'iji. Ja̱je pa'iquëta'are pa̱i ñape ñare pajë nejajë, ë̱mëje'e cato. 11Jesucristo api, i̱ti du'ru huëocore paje̱ pa'i, quëco paquërepa, yequë peoji. Ja̱je pa'ina, yecore du'ru huëocore neñe peoji. 12Ico ë̱mëje'ena neñe pa'iji, coa si'aye pa̱i yëyeje̱ pa'ye: oropi pa̱nita'a yeque plata hue'yosi quë̱napi, jai do'i quë̱napi, so̱quë to̱ñapi, ja'opi pa̱nita'a hue̱capi. 13Ja̱je nesicohua'ita'are pa̱i ñape nese'e ña mu'se ti̱'aëna, ti̱ñarepa ñaja'cohua'i a'ë, pa̱i ñape nese'e. Ja̱ mu'se cato pa̱i ñape nese'e toapi ëo ñañe pasipi. 14Toaje̱ ti uma'a huë'e nesiquëpi sa̱i cua̱ñoja'quë api, i̱ nesi do'i. 15Ja̱je pa'iquëta'are i̱ nesicopi coa u huesëru sa̱i cua̱ñoñe pa̱ja'quë api, i̱ nesi do'i, i̱se'e jëaja̱'quë api, jai huë'e ucona jëayeje̱ pa'ye.
16Mësaru a'ë, Maija'quë huë'e. Ja̱ huë'e cato Maija'quë joyopi pëani pa'i sito. ¿Ja̱je pa'iye mësaru huesëye? 17Ja̱je pa'ina, pa̱ipi Maija'quë huë'ere co'a de'huacaito Maija'quëpi i̱teje̱ nejoñe pa'iji. Maija'quë huë'e cato de'o co'sija'i huë'e a'ë. Mësaru a'ë, i̱ti huë'e.
18Co'ye cosoma'pë pa'ijë̱'ë. Iye yeja ta̱'ñe asayere ai cuasaquë a'ë cuasaquë pani, ja̱ cuasase'ere je̱oni huesëquëje̱ pa'i de'oni ye'yejë̱'ë, ta̱'ñe asayere pare. 19Iye yeja pa̱i ta̱'ñe asayere Maija'quë cato coa huesëcohua'i yo'oye a'ë caquë ñaji. Ja̱je pa'ina, toyase'e caji: “Diusupi ta̱'ñe asacohua'ire i̱ohua'i ta̱'ñe yo'oyë cuasajë yo'oyena ne ta̱oji.” 20Cui'ne caji yequeje̱: “Ëjaëre papi ta̱'ñe asacohua'i cuasaye de'oye a'ë caquë ñaji.” 21Ja̱ do'ire pa̱ini ye'yejë jerepa pa'i a'ë cuasama'pë pa'ijë̱'ë. Si'aye mësaru tse̱se'e pa'iji: 22Pablo, Apolos, Pedro, iye yeja ju̱'iñe, yure pa'iye, yequë mu'se pa'i ja̱'ñe, si'aye mësaru tse̱ a'ë. 23Mësaru cato Cristo tse̱cohua'i a'ë, cui'ne Cristopi Maija'quë tse̱quë api.
Currently Selected:
1 Corintios 3: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.