Isaías 47
47
Ho'a Babilonia
1“Eguejy ha eguapy yvýpe,
kuñataĩ Babilonia,#Is 13.1—14.23; Jer 50.1—51.64.
eguejy,
rekúiva nde guapyhágui,
caldéo kuéra táva guasu.
Nereñembohéra mo'ã véima
kuñataĩ juky asymi.
2Eipyhy nde avati soka
ha ejoso trígo.
Eipe'a nde rova aho'iha,
eipepy nde sái
tojekuaa ne retyma
rehasávo ysyry kuéra.
3Eñemboi opívo
ha topyta nandi nde ryeguy.
Amyengoviáta
ne rembiapo vaikue
ha ndaipóri che joko vaerã!”
4He'i Tupã Israelgua
marangatúva,
ivaívagui ñande pe'áva,
hérava
Ñandejára ipu'akapáva:
5“Eguapy kirirĩháme
caldéo kuéra táva guasu,
ekañy iñypytũháme,
na nde réra mo'ã véigui
tetã nguéra ruvicha guasu.
6Che pochy ramo guare
che retãgua ndive,
che retã che voi amomarã,
ha nde po guýpe
aheja vaekue ho'a.
Ndereiporiahurerekói vaekue
chupe kuéra.
Itujáva ati'ýre
remoĩ mba'e pohýi.
7Ere vaekue:
Chéta pende ruvicha
opa árape guarã.
Ha nderejepy'a mongetái
ko'ã mba'ére,
ha mba'éichapa repáta
na ne mandu'ái vaekue.
8Ha ko'ágã,
kuña revy'a mantéva,
ehendúke kóva:
Rejeko kyhyje'ỹ rehe
nde guapyhápe
ha ere nde py'a pýpe:
Chétante
ha ndaipóri mo'ãi ambue.
Ndapyta mo'ãi che ména
ha che memby'ỹre.
9Mokõive mba'e#Ap 18.7-8.
ojehúta ndéve
reimo'ã'ỹhágui,
peteĩ árape voi:
Mena'ỹ ha memby'ỹre
repytáta,
hetave repaje apo ramo jepe.
10Nde reko añáme
reñeñandu vaekue
kyhyje'ỹre.
Ere nde pype:
‘Ndaipóri che recháva’.
Ne arandu
ha ne mba'e kuaa
nembotavyrai.
Ere nde py'apýpe:
‘Chétante,
ndaipóri mo'ãi ambue’.
11Cháke oúta hína
nde ári ivaíva,
ikatu'ỹtava
nde pajépe rejoko,
nde ári ojeitýta
ikatu'ỹre remombi,
upéicha háguinte
oúta ñerundi
reimo'ã'ỹ vaekue.
12Epyta katu
opa nde paje apo reheve,
ne kuñataĩ guive
rejapo ite vaekue,
jahecha maerãpa
iporãta ndéve
jahecha oĩpa
okyhyjéva nde hegui.
13Nde kueráima
ndéve oñemoñe'ẽ vaekuégui.
Tou upéicharõ
ha ta nde pe'a ivaívagui
umi yvága kuaaha,
mbyja rehe oma'ẽvo
oikuaáva mba'e ñemi,
ha jasy pyahu rehe omañávo
tomombe'u ndéve ojehútava.
14Ñana pirukuéicha
umíva okaipáta,
nokañy mo'ãi tata rendy
ndaha'e mo'ãivagui
tatapỹi ojepe'e haguã.
15Upéicha opa reíta
umi paje apoha
ne pytyvõ ite vaekue
ne kuñataĩ guive:
Peteĩ-teĩ ohóta
tape japu rehe
ha ndaipóri mo'ãi
ñehundígui nde pe'áva.”
Currently Selected:
Isaías 47: GPC2006
Highlight
Share
Copy
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.