Génesis 50
50
Jacob oñeñotỹ
1José ojeity itúva ári, hasẽ soro ha ohetũmba chupe. 2Upéi he'i pe itúva retekue oñepohano#Umi Egiptogua, oñotỹ mboyve omano vaekuépe, omohyakuã porã hetekue, omoingévo hye pýpe pohã ryakuã porãita ojokóva tetekue ñembyai. Upévape oje'e ñembalsama. haguã anítei oñembyai oñeñotỹ mboyve. 3Upéicha ojejapo haguã Jacob retekue 40 ára oñepohano. Upevarã oñekotevẽva voínte umíva umi ára pukukue.
Egiptogua kuéra oguerojahe'o chupe 70 ára pukukue. 4Umi ára ohasa rire, José he'i Faraón rogagua kuérape:
—Pemoguahẽmi Faraónpe ko'ã che ñe'ẽ: 5“Che ru he'i vaekue chéve: ‘Eme'ẽ chéve ne ñe'ẽ Tupã rérape che ñotỹtaha Canaánpe amano rire’.#Gn 47.29-31. Ha ame'ẽ vaekue chupe che ñe'ẽ. Tahána upéicha ramo tañotỹ che rúpe ha taju jey.”
6Faraón he'ika chupe:
—Tereho katu eñotỹ nde rúpe reme'ẽ haguéicha chupe ne ñe'ẽ.
7Upérõ José oho oñotỹvo itúvape ha omoirũ chupe mburuvicha kuéra Faraón róga pegua, ha umi Egipto rupigua avei. 8José rogagua kuéra, ityke'ýra ha itúva rogagua kuéra ohopaite avei. Gosénpe opyta mitã, ovecha, kavara ha vaka kuérante. 9Omoirũ avei Josépe heta kárro ári ha kavaju arigua. 10Oguahẽ hikuái Goren-Ha-Atad héravape, opytáva ysyry Jordángui kuarahy resẽ gotyo. Ha upépe heta ojererojahe'o asy jey Jacob. José ojapo itúvare ñembyasy guasu 7 ára pukukue. 11Umi Canaangua, ohechávo jahe'o oikóva, he'i joa:
—Tuichaite piko ojahe'o huvicha kuéra omano vaekuére ko'ã Egiptogua!
Upévare upe ñu oñembohéra Abel-Misraim, oĩva ysyry Jordángui kuarahy resẽ gotyo. 12Jacob ra'y kuéra ojapo hese ha'e oipota haguéicha. 13Ogueraha hetekue Canaánpe ha oñotỹ pe ita kua oĩva ñu Macpélape, Mamré rovái, Abraham ojogua vaekue Efrón hitítagui, hogagua kuéra oñeñotỹ haguã.#Hch 7.16. 14José oñotỹ rire itúvape ojevy Egíptope, ityke'ýra kuéra ha opa imoirũhare ndive.
José ombopy'a guapy ityke'ýra kuérape
15Omano rire itúva, José ryke'y kuéra he'i ojupe:
—Oiméne José ndaija'éi hína ñande rehe ha omyengoviáta ñandéve upe jajapo vaekue hese.
16Upérõ he'ika hikuái chupe:
—Omano mboyve ñande ru he'i vaekue oréve: 17“Upéichake peje Josépe: ‘Eheja reína nde ryke'y kuérape hembiapo vaikue ha iñangaipa.’” Ko'ágã rojerure ndéve Tupã ñande ru Jára rérape reñembyesarái haguã ore jejavykuégui.
Ha José hasẽ ohendúvo ko'ã mba'e. 18Upéi ou ityke'ýra kuéra, oñesũ henondépe ha he'i:
—Roju ropytávo ne rembiguái ramo.
19José katu he'i chupe kuéra:
—Ani pekyhyje, che niko ndaha'éi Tupã. 20Peẽ niko añete pejapose vaekue che rehe ivaíva. Tupã katu oguenohẽ upévagui iporãva, ha che moĩ añangareko haguã heta tapicha rekovére. Ojehu rupi ko pejapo vaekue che rehe, ha'e kuéra oikove gueteri. 21Ani pejepy'apy! Che añangarekóta pende rehe ha pende ra'y kuérare.
Ha ombopy'a guapy ohechaukávo iñe'ẽme ohayhuha chupe kuéra. 22José opyta Egíptope itúva rogagua kuéra ndive ha oikove 110 áño. 23Ohecha Efraín ra'y kuéra ra'y ra'yre peve. Upéicha avei, Manasés ra'y Maquir ra'y kuéra oikove ypy José rapypa'ũme.#Gn 30.3.
José omano
24Ipahápe José he'i ityke'ýra kuérape:
—Amanótama. Tupã katu oñangarekóta katuete pende rehe ha pende reraháta ko tetãgui, upe tetãme ha'e ome'ẽ hague iñe'ẽ Abraham, Isaac ha Jacóbpe.
25Upéi José he'i Israel ra'y kuérape:
—Peme'ẽ chéve pene ñe'ẽ, Tupã oúvo pende reraha ko'águi, perahataha che kãnguekue.#Ex 13.19; Jos 24.32; Heb 11.22.
26José omano Egíptope oguereko ramo 110 áño. Hetekue oñepohano oñembyai'ỹ haguã ha oñeñongatu hyrúpe.
Currently Selected:
Génesis 50: GPC2006
Highlight
Share
Copy
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.