Tito 3
3
Tzeꞌn tuꞌn kybꞌete nimil toj kychwinqil
1Naꞌnxa kye nimil tuꞌn tkubꞌ kynimin aj kawil exsin tkyaqil kawbꞌil tzaluꞌn twutz txꞌotxꞌ, ex kukx tuꞌn tkubꞌ kybꞌinchin tkyaqil bꞌaꞌn; 2ex tuꞌn mi chi yolbꞌin tiꞌj aꞌla, qalaꞌ tuꞌn kymujbꞌinte kyibꞌ tukꞌa tkyaqil, ex tuꞌn kyyekꞌinte kymutxbꞌil kyibꞌ, a twutzxix wen, kywutz kykyaqil xjal.
3Quꞌn ikytaqtzin qteꞌn ojtxe: Ntiꞌtaq qnabꞌl, ex minataq nkubꞌ qnimin Dios. Nqo bꞌettaq toj najin, ex nqo bꞌinchintaq tkyaqil wiq achbꞌil, ex tzyuꞌnqotaq tuꞌn tkyaqil wiq il, ex otoꞌtaq toj tkyaqil nya bꞌaꞌn, ex nloꞌchjtaq qkꞌuꞌj kyiꞌj qukꞌa. Nchi el qikyꞌintaq, ex nqo el ikyꞌintaq kyuꞌn.
4Me atzaj teꞌ saj tyekꞌin Dios, a Klolqe, twenil ex tqꞌaqꞌbꞌil tkꞌuꞌj qiꞌj, 5ma qo klet, nya tuꞌn qbꞌinchbꞌin nyakuj bꞌaꞌn, qalaꞌ noq tuꞌn tqꞌaqꞌbꞌil tkꞌuꞌj qiꞌj.#Dan. 9:18. Ma txjet qanmin tuꞌn, noq tuꞌn ma qo itzꞌje tkabꞌ majin. Ex ma qo saqix tuꞌn Xewbꞌaj Xjan, 6a saj tqꞌoꞌn qMan Dios qe, noq tuꞌn Jesucrist, a Klolqe. 7Ex noq tuꞌn t-xtalbꞌil Dios, ma qo ok tzꞌaqle twutz, ex tuꞌn ikyjo, at qoklin jaꞌlin tiꞌj jun etzbꞌil toj kyaꞌj, a nqo ayoꞌn tiꞌj.
8A nyola xbꞌaj ntzꞌibꞌiꞌn lo, twutzxix teꞌ. Tuꞌntzintzjo, waja tuꞌn t-xi t-xnaqꞌtzinjiy lo tukꞌa tkyaqil tanmiꞌn, quꞌn tuꞌntzin ayeꞌ nimil tiꞌj qMan Dios, tzꞌokit kyqꞌoꞌnxix tilil, tuꞌn tbꞌantjo a wen kyuꞌn. Ayetziꞌn luꞌn, ilxix tiꞌj, ex nimxix tajbꞌin te tkyaqil xjal.
9Me atzin te, Tito, paꞌmil tibꞌa kyiꞌjjo kyyolxjal, a ntiꞌ tumil, ex tiꞌjjo nkyqꞌmaꞌnxjal kyiꞌj ojtxe qxeꞌchil. Ex mi txi tqꞌoꞌn ambꞌil te jyoj qꞌoj, ex jniꞌ yasbꞌil noq tuꞌn tpajjo ojtxe kawbꞌil, quꞌn ajo yasbꞌil lo ntiꞌ tumil, ex ntiꞌ tajbꞌin.
10Qa at jun kyxola, a noq taj tuꞌn tpaꞌn Ttanim Dios, txkontza, ex kawinxa, tuꞌn mi kubꞌ tbꞌinchin ikyjo. Ex qa il tiꞌj, txkontza juntl majl. Me qa mi xkubꞌ nimin tuꞌn, kypamil kyibꞌtza tiꞌj, 11quꞌn jun xjal ikyjo, ma txalpaj toj tchwinqil, ex nbꞌet toj til, ex noq tuꞌn ikyjo, tzul tkawbꞌil Dios tibꞌaj kujxix wen, tzeꞌnkuxjo ntqanin tbꞌinchbꞌin.
12Aj t-xi nsmaꞌn Artemas mo qa Tíquico#Kybꞌi. 20:4; Ef. 6:21-22; Col. 4:7-8; 2Tim. 4:12. te t-xela, liweyx txiꞌy toj tnam Nicópolis, quꞌn ma kubꞌ nbꞌisiꞌn tuꞌn tikyꞌx jbꞌalil wuꞌn antza. 13Ex mojinqexa Zenas, a aj kawil, ex Apolos,#Kybꞌi. 18:24-28; 1Co. 16:12. ex qꞌonxa tkyaqiljo a n-ajbꞌin kye toj kybꞌe. 14Ex xnaqꞌtzinxa kye qukꞌa, a nimil, tuꞌn tkubꞌ kybꞌinchin wen, ex tuꞌn kyonin kyiꞌjjo a ntiꞌ at kye, tuꞌntzintla kyajbꞌinxix kye txqantl.
15Tkyaqiljo nimil tzaluꞌn wukꞌiy, nxi kysmaꞌn jun qꞌolbꞌil tey. Ex atzin te, qꞌonxa jun qꞌolbꞌil kye kykyaqil tukꞌiy, aye nimil, kꞌuꞌjlinqe quꞌn.
Axitjo t-xtalbꞌil qMan Dios kyukꞌiy.
Currently Selected:
Tito 3: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.