Doma 1
1
I. NADEN CHIENDAMBI, QUEQUIN CHIAID
(1.1-15)
Mibi tantiembi, quequin Pabadon chiaid
1Esuquidistun iuambo Pabado nebi. Aidën: Ubi chuibenneta, quequin tantiamiaidquio nebi. Adembidi Nuquin Papantsen: Umbi Chiaid Bëda tantiamequin chuibenneta, caidquio nebi. Adquid icquin mibitedi tantiembi. 2Ëndenquimboshë Nuquin Papan aton Mado chote chuiquin ambi oncamiaido dada uamepampic. 3Aden Nuquin Papan chiampicpadequi chidon tishaid yec isadaidbon chuiquid tapa Dabid yampidën tsiuecquid Esus nepanëdash. 4Aidi abipadquid yec icsambuen naisa yec uënës uacsho Nuquin Papan uincuenmeshun ambi namiacpadombuen aton Mayanën aton Mado Esuquidistu nadatiambocquid icmepanëdash. 5Aidëmbi ubi tantiaquioquin: Ma nëidën nidaid utsi utsiec yacno nidshun chuibenniac matses utsibontsen ma ubi tantiaquin umbi chiacpadombuen nanu, quequin ambi naidbëta ambi chiaid chuibennequid Esuquidistun icmepondashi. 6-7Utsi utsiec Doma yacnocquido Esuquidistu tantiabenash iccuededquido icsho mibitedi chiec nebi. Nuquin Papan mibitedi tantiaquin: Cun matses canu, queshun mibitedi tantiamiac. Nuquin Papabëtan Nuquin Icbo Esuquidistun ma bëdambuen isquin bëdambuec tabadmepanu, queshun mibitedi tantiaquin Nuquin Papa chiannembi.
Pabado Doma yacnocquido iste bunaid
8Nëidba chuinu. Esuquidistu tantiaquin: Nuquin Papa bëdamboshë iquec, caimbi. Mibitedi Esus tantiec bëdambuec tabadsho issun nidaid utsi utsiec yacnocquidon mimbi naid chuisho tantiombi. 9Aden abi tantiaquidquio icquin umbi Ambi Chiaid Bëda aton Madon naid chuibennequin mibitedi ënenquio icquin tantiasho isash Nuquin Papa: Abimbo caic, quendac. 10Nadembidi mibi istante bunquin Nuquin Papa ënenquio icquin chiannembi. Mimbi tantiacpaden mimbi nidmiac nëbi nidtsiabi, Papa, quequin chiannembi. 11Aden mibitedi iste bunebi. Mibëd tabadquin Nuquin Papan Chiaid chuibantsiambi. Nuquin Papan tantiamiacpadombuen ma chieshtoenquio icquin tantiaquiono, quequin mibitedi chuibantsiambi. 12Chieshtoenquio icquin Esus tantianuna, quec utsibobëd chuinanec bëdambuec tabadec aidobëd bëdambo ictsiabi, quiash mibitedi iste bunebi.
13Tantia. Chuinu, cun utsibo. Mibi yacno caic: Istannu, queuid queuidobi. Ubi nidtsembued mimbi tantiabien icchitec. Aden umbi tantianubi utsi utsimbuec icnuc nidenquio ictenniobi. Adbuedi nidaid utsi utsiec yacnoshon Esusën naid chuibanac dadpenshun tantiabenondacpadombuen ma mimbitsen Esus tantiabennu, quiash mibitedi yacno chuinuec nidte bunebi. 14Esuquidistun chiacpadombuen Ambi naid matses abitedi chuibante bunquiebi. Isadaidbobëta matses utsibo chuibanshumbic cumapenen tantiaquidobëtabi tantienquio icquidotsen chuibannuec nebi. 15Aden chuibennequi shubu dadpen icquid Doma yacno nidshun mibitsen Esusën naid Chiaid Bëda chuibante bunquiebi.
II. NUQUIN PAPAN NAID CHIAMPIDBËTA ATON MADO ESUS CHIAID
(1.16—11.36)
Esusën naid Chiaid Bëda nadatiambocquin tantiametequid
16Esusën naid Chiaid Bëda nadatiambocquin Nuquin Papan tantiametequid nec, quequin chuibanac: Abimbo caic, quequin tantiaquido Nuquin Papa yacno tabadendac. Adquid icnuc Esusën naid dacuëdenquio icquin chuibennec nebi. Aden abia chuibanac: Abimbo caic, quequin tantiaquido isadaidbo icnuc adembidi tantiaquido matses utsibo icsho Nuquin Papan abëd tabadmendac. 17Esusën Chiaid Bëda chuibansho tantiashun Esus tantiaquid icsho Nuquin Papan bëdambuen isec, quequin nuquitedi tantiec. Naden chuiquin Nuquin Papan dada uamiampid iquec: Ambi chiacpadombuen naic tabadquin Abi tantiasho Nuquin Papan abëd tabadtequido icmendac, quequin dada uamepampic.#1.17 Aba. 2.4 isbanta.
1. Esus tantiesabo nadec tabadec
(1.18-32)
Matses icsambuec tabadaid
18Abi tantiesabo yec chieshëmënec tabadquid abucshun isquin cuidquid Nuquin Papa nec, quequin nuqui tantiec. Adec abi tantiesa yec icsambuen naic tabadquin Ambi Chiaid tantiatiapimbocquin utsibotsen tantiametiapimbo icsho nëishshun Nuquin Papan cuidendac. 19Abi tantiametequid ambi uaidtedi isquimbi tantiatiadquidi Nuquin Papa tantiate bunenquio matses iquec. Adquidshenda Nuquin Papa nepec, matses camenuen abitedimbo uapampic. 20Adec Nuquin Papa isadesa icnubi ambi uaidtedi isquin tantiaquin: Nëid uaquidien abitedi uaquidquio Nuquin Papa nadatiambocquin nabanquidquio yec nibëdantiapimbo icquidien nechitec, quetiadquidi adenquio matses iquec. Aden tantienquio icquin icsambuen naquido icsho Nuquin Papan: Aido icsambo iquec, caindac.
21Ambi uaid issumbi Nuquin Papa tantiaquin aidën chiacpadombuen natiapimbo iquec. Nëid uaquid bëdambocquid nec. Aidëmbien ubi nashunchitec, quetiadquidi pamumëdacbimbuecquin Nuquin Papa tantiatiapimbocquin ambembi chiaiduidi tantiaquin nabanquid matses nec. 22Dadpen tantiaquid nebi, quequidobi tantienquiocquid nec. 23Aden nadatiambocquin naquid yec uënëstiapimbo icquid Nuquin Papambo tantiatiapimbo icquimbi uënësquiduidquio tantiaquin matsesbimbuecnuc nacnenshun: Papa, quequin chiannec. Adembidi nëishbimbuecnuc nacnenquinc uicchumbimbuecnuc nacnenquinc tacbidën siuidquid nisibimbuecnuc nacnenquinc caquin ambibi nacnenshun: Ubi nashunta papa, quequin chiannec.
24Adsho isash Nuquin Papa: Ma ambi tantiacpadequi icsambuen nabanec tabadpanu, quiampampic. Adampid icnuc dacuëdtiadquidi abi bunacpaden dadan ambi chudtemaid chudquin icsambuen naic tabadec. Adembidi chidon ambi chudmetemaid chudmec. 25Abitedi uaquidquio Nuquin Papa nec, quequin aidquio tantiatiadquidombi Nuquin Papapenquio tantiabededec. Adoshombic ambi uaidobi utsi utsien chuiquin papa cabededpec. Nuquin Papa abitedi uaquidquio yec bëdamboshë iquec, quequin ënenquio icquin chuitiadquidi aidon padenquio iquec.
26Adsho isash Nuquin Papa: Ma abi bunacpadec icsambuec tabadpanu, quiampampic. Adampid icnuc dacuëdtiadquidi ambi tantiacpadquiec nëbi chidobo icsambuec tabadec dada bunenquio iquequi chido daëdi dachudnanec. 27Adecbidi dadabo chido bunenquio iquequi dada daëdi chichudnante natia bunquiopec. Aden abi bunacpaden naic icsambuec tabadquin Nuquin Papan Chiaid niac niacquin icsaid bedash aton dada daicsabudquin ambibi Nuquin Papa cuidmendac.
28Adec abi tantiate bunenquio icsho isash Nuquin Papa: Ma ambi icsambuen nate bunacpadequi icsambuec ma adequi tabadpanu, quiampampic. Adnëdambi ambi natemaidi naic tabadec. 29Aido nadquido nec. Nëidic utsi icsambuen nambo icquidobi muaquin cuidmequido. Nëidic icsambuecshë tabadquido. Nëidic aton chidopenquio chudquido. Nëidic aton bënëpenquio chudmequido. Nëidic dada aton dada utsibëdi chichudnanquido. Nëidic chido aton chido utsibëdi dachudnanquido. Nëidic dadpen bunquin bedquido. Nëidic chieshëmënquido. Nëidic utsina isash natiambo bunec chieshëmënquido. Nëidic cuessunnianquido. Nëidic chushcananquido. Nëidic muaquido. Nëidic icsamboshë icquido. Nëidic utsibo icsaiduidi chuiquido. 30Nëidic utsibo icsambuen chuishunquido. Nëidic utsibo mua uaquido. Nëidic Nuquin Papa chieshënquido. Nëidic chuiquidon chiaid niac niacquido. Nëidic utsibo nashunenquio icquin atonauidi naquido. Nëidic: Ubiuidtsëqui bëdambo iquebi, quequido. Nëidic abi bunacpadombuen tantiaquin nacnenquin icsambuen naquido. Nëidic amëbëtan anin chiaid niac niacquido. 31Nëidic pamumëdacbimbuecquin Nuquin Papan Chiaid tantiate bunenquio icquido. Nëidic ambi chiacpadombuen nainquio icquido. Nëidic aton matses tantienquio icquido. Nëidic utsibo uënëstiadtsëcquio icsho isash: Uënësquio iquec, quetiapimbo icquido. 32Aidotedi ambi icsambuen naid ëntiapimbo icquido uënësacsho ënenquio icquin cuidacno nësecaindac, quequin Nuquin Papan Chiampid tantiequi ënëdenquio yec icsaded icsadedquiec. Utsibontsen icsambuen nasho isash cuishonquec: Bëdambo iquec, quepec.
Currently Selected:
Doma 1: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.