Hechos 28
28
Acte nënantan nidaid nacnëdquid Madta caid yacno Pabadobëd abëd nidquido choaid
1Adec nidaid yacno choash pudundocuededshun: Nëid acte nënantan nidaid nacnëdquid Madta, quequin cuënaid nec, quequin chuisho ubitedishun tantiapondac. 2Ambo icquidon ubitedi bëdambuen ispondash. Iquenuampambuec ue sequenubi Madta caid yacnocquido cute cuëtsiadoash: Cuëec cho, quequin ubitedi chuipondash. 3Adnubic Pabadontsen cute tanunquiocquid bedtanquin masandopondash. Aden masandoaid nëdënquec chumbo yannuc puduenquin nisin Pabado mëpepondash. 4Aden mëpiash ëcchiquidenquio yec mëdiadsho isashien ambocquido utsi utsiec nadpondash: Nëid dada cuessunnianquid icsho nisin piac uënëstequid nepanui. Mentoadenquio yec actenuësh pudundoacsho nuqui tita quequin tantiaidën icsambuen naquid icsho cuidquimbien nachitec, quecuededpondash.
5Adec onquecuedednubien Pabadon cumapenen uiccaquin nisi cute nëdënquequid nënepondash. Adoash Pabado: Paëmbo iquec, quenquio yec bëdambo icpondash. 6Aden mëpebocsho issun: Pabado mëbidisquesho isnu, quequin caimbededpondash. Adembidi mëbidisquenquio yec uebudec uënësso isnu, quequin caimbededuapondash. Aden tantiaquin iuen cainquin isnubi mëbidisquenquio yec uënësenquio icsho isash: Nisin mëpebued utsibon papa quequin tantiaid nepanui, quecuededpondash Madta caid yacnocquido.
7Madta caid yacnocquidon chuiquid tapan shubu anoentsëqui icpondash. Chuiquid tapa Pubedio cuëmëdquid icpondash. Ambo aton tied uanun nidaid bedaid anoentsëqui icpondash. Aidëmbi aton shubu yacno ubitedi iuedshun daëdec ushquin ubitedi bëdambuen nashumpondash. 8Adnubien Pubedion papa chumbo yec pienec aton madon shubu nuntan ueten uepanëdash. Adec Pubedion papa uec, quesho tantiash Pabado aid isec nidshun ashunquiobi Nuquin Papa chuitanquin Pubedion papa damishquin Pabadon bëdanmepondash. 9Aden: Aidën bëdanmiosh, quesho tantiash Madta caid yacnocquido nënquidobëd daicsaido chochopondash. Ubitsen bëdanmetsiash, quiash chochoacsho aidotsen bëdanmepondash. 10Adosho issun cano dapan chochoquido bëdambuen nashumpondash ambocquidon. Nidnu, quesho tantiashun: Mitsana nibëdec, queshun nidquido atona menebampondash.
Doma yacno Pabado choaid
11Adashic uëshë 3ted nidmiash Madta yacnouësh ubitedi puduampondabi. Adnubien cano dapa utsin icbo: Iquenuampambuec iqueque. Nëmbobi tabadnuna, quiash tabadashic: Nidnunid, quianec aton cano antabëdtosho issun Pabadobëta abëd icquido sondado chuiquidën antabëdtomepondash. Aid cano shubu dadpen icquid Adejandedia caid yacnocquid nepondash. Cano icbon ambi papa cain cuënaidbimbuecnuc nacnenaid daëd ambi tantiaid cano dëdectanaid icpondash. Aidi abentsëc Castod cuënaid icnuc utsi Podus cuënaid icpondash. 12Aidën puduanec nidequi acte nënantan nidaid nacnëdquid tapa Sidisia caidën shubu dadpen icquid Sidacusa caid yacno choash daëdec ushec ambo tabadpondabi. 13Ambo tabadash puduanec nidquin aid acte nënantan nidaid nacnëdquid cuëma anoentsëqui potequi nidaid Itadia caid cuëman shubu dadpen icquid Dequio caid yacno chopondash. Ambo choash ushash badiadash puduanec nidec cano dapa tsitsumishun cunquequidën buanac badiad utsin shubu dadpen icquid Poteodi caid yacno chopondash. 14Ambo choacsho istuidshun ambocquid Esus tantiaquidon Pabado abëd icquidobëta: 6tedec ushec ubëd tabadec cho, cac: Ai, quesho iuedpondashi. Aidted ushec Esus tantiaquidobëd tabadash auëshquio puduanec podquiedën nidequi shubu dadpenquio icquid Doma yacno ubitedi chopondabi. 15Doma yacnocquid Esus tantiaquido: Pabado chedo choec, quesho tantiash utsi utsiec shubu daëdpactsëcquid Podo Apio caid yacno nidshun ubitedi bëquedec chopondash. Adecbidi utsi utsiec shubu dadpen icquid udi icquid 3Tabednas quequin cuënaid yacno chochoshon Pabadobëta ubitedi bëquedpondash. Adec Esus tantiaquido chochoacsho isashien: Ubi bëdambo icmenuen nëidtedi mimbi chomioc, Papa. Aden chomiacsho isash bëdambo iquebi, quequin Pabadon Nuquin Papa chuipondash. 16Aden aido bëquedash aucbidi choec Pabadobëd Doma yacno chochopondash. Ambo choacshobien chuiquidon Pabado quënën tsadunmenquio icquin shubu utsin tabadmepondash sondado abentsëcshun abëd tabadquin isnubi.
Doma yacnoshon Pabadon chuibanaid
17Adec Doma yacno choash daëdec ushec tabadshun: Isadaidbon chuiquido chuinu. Chome, capondambi. Adoac chomiacsho issun Pabadon naden chuipondash: Tantia. Chuinu, cun matsesën chuiquido. Nuquin matses icsambuen chuishunambo iccombi. Adembidi nuquin tsusedpabon: Naden nata, quequin chiaid niacambo iccombi. Aden nainquio icshobi Edusaden yacnoshon nuquin matsesën bedshun Doma yacnoquidon chuiquid menequin buanmiondashi. 18Aden meniac aid chuiquidën: Mimbi naid chuiban, cac chuibanondambi. Aden chuibansho tantiash: Cuessunnemenquio ictiadquidi mimbi naic, quepondash Doma yacnocquidon chuiquid ubi caic. 19Aden chuiquidën chuinubi nuquin matses isadaidbon chuiquidon: Uënës uaquimbien ictiad, quequin chuisho tantiash: Empedadod Sesad yacno nidshun umbi naid chuite bunebi, quequin chuipondambi: Cun matses isadaidbo icsambo iquec, quenquio icquin. 20Aden naoshi, quequin mibi chuinuen mibitedi chochomiombi. Uënësash uincuente iquec, quequin tantiaquin nuquin matses isadaidbon cainacpaden cainquid icsho bedshun mëtaniaid nebi, quepondash Pabado isadaidbon chuiquido chiec.
21Adoaquien: Nidaid Udea caid yacnoshon mimbi icsambuen naid chuiquin dada uaid bësho bedambo iccombi. Adembidi Edusaden yacnouësh choquidon: Pabado icsambocquid nec, quequin chienquio iccosh. 22Padnueni mimbi tantiaid mimbi chuisho tantiate bunec. Utsiboen nidaid utsi utsiec yacno tabadquido: Quidistubo icsambocquid nec, quepec, quepondash Doma yacnocquid isadaidbon chuiquido Pabado caic.
23Aden Pabadon tantiaid tantianuec: Nëidted ushash padpidec chouaindabi, quianec nidannepondash chuiquido. Adec nidanniash ambi chiactedec ushash Pabado tabadacno isadaidbon chuiquidobëd utsibo dadpen chochopondash. Adec chochoash tabadsho issun aido tantiamequin: Nuquin Papan namiacno tabadte iquec, quequin Esus tantiaquid icmenu, quequin Nuquin Papan: Naden nata, quequin Moises dada uamiampidbëta Nuquin Papan oncamiaido chuiquin dada uampid chuibampanëdash. Aden chuibanquin badiadnuc chuiquin bedanshun inchëshbudtsëqui chuibanquin Pabadon ëmpondash.
24Aden chuibansho tantiash utsi utsiec: Abimbo caic, queshun Esus tantiabennubi utsi utsiec: Aidën chiaid tantiatiapimbo iquebi, quepondash. 25Aden tantiashun abentsëcshun tantiacbimbuen tantiatiapimbo yec cumapenec cuëdcuededec: Nidnu, quesho tantiashien Pabado nadpondash: Nuquin Papan Mayan Bëdan Isayas dada uamequin nuquin tsusedpabo mibi padquido naden chuipampic:
26Min matses isadaidbo yacno nidshun naden chui:
Chiac tantiaboshombi tantienquio iquendac.
Ismiac isboshombi: Ai, aidi nec, cainquio iquendac.
27Umbi chiaid tantiashumbi natiapimbo iquec.
Min matses pamumëdacbimbuen tantiate bunenquio iquec.
Bëchicqueshun isenquio yacbimbuembidi isquin tantiatiapimbo iquec.
Umbi chiaid tantiaquin umbi nabansho isquimbi padpiden ubi tantiabente bunenquio iquec.
Aden tantiabenquin ambi icsambuen naid ënsho issun bëdambuen ismane, quec Nuquin Papa chushquiaid Isayasën chuipampic.#28.25-27 Isa. 6.9-10 tantiaquin nëid dada uapanëdash.
28Aden chiampicpadquid mibitedi icnuc Nuquin Papa yacno tabadmianquid iquec, quequin isadaidpembo chuibennendac. Adoac aidon tantiabenendac, quepondash Pabado. 29Aden ënquin chuibansho tantiash isadaidbon chuiquido cuëdcuededash nidannepondash.
30Adembidi seta daëd matanmec ambi piucquid meniaid shubun tabadquin abi isec chochoquidtedi Pabadon iuedpondash. 31Utsibon: Aid chuibanenda, cadtiapimbo icquin dacuëdenquio icquin: Nuquin Papan namiacno tabadte iquec, quequin chuibampondash. Adembidi Nuquin Icbo Esuquidistu tantiamenuen Pabadon chuibampondash.
Aidtedi Esusën: Ubi chuibenneta, caidon naid chuibanquin dada uaombi, Teopido.
Currently Selected:
Hechos 28: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.