Esusën Uan ismiaid 1
1
I. BEDANQUIN CHIAID
(1.1-8)
1Esuquidistubëd iccondaid Uan nebi. Nuquin Papan tantiamiac Esuquidistun: Nadquid iquendac, quequin abi ismebuedquio dada uaic nebi. Esus tantiaquidon ma tantianu, queshun Nuquin Papan chiac Esuquidistun: Ma ismenu, quequin abëd icquid ambi budmiaidën ismeposhi. 2Adoac Nuquin Papan Chiaidbëta Esuquidistun ismebuedquio abimbo chuibanquin dada uaic nebique. Tantia. Chuinu. 3Nëid dada uaid isquin Esus tantiaquido chuibanquido Nuquin Papan bëdambo icmendac. Aidën chuibanac tantiaquidotsen: Ambi chiacpadombuen Nuquin Papan: Aden naindambi, quequin chiaid nëbi nanushe. Nëidën chiacpadombuen nanuna, quequid Nuquin Papan bëdambo icmendac.
Esus tantiaquidon iste dada uaid
4Nidaid cuëshë utsi Asia caid yacno tabadquin Esus tantiec iccuededquidon iste dada uaic nebi. 7tedi shubu dadpen icquid yacno yacnombuec Esus tantiec iccuededquido icsho mibi tantiembi, quequin chuiquin dada uaic nebi. Ambi chiampicpadombuen Nuquin Papan bëdambuen isquin mibi bëdambo icmendac. Nidaid uabi iquequi ëndenquimboshë icpampidi nëbi abi icquid yec nibëdantiapimbo icquid Nuquin Papa nec. Nëbi adquid iquequi choendac.#1.4 Ëndenquimboshë Nuquin Papa: Adquid nebi, quequin Moises chuipampic. Buan. 3.14-15 isbanta. Adembidi aton Mayan 7tedshun aton tsadte dapan tsadsho abi bëisec tabadquidën ma mibitedi bëdambo icmepanuna, quequin tantiembi.#1.4 Nuquin Papan Chiaid tantiaquidonquio naden chiec: Aton Mayan 7 ted quequin aton Mayan Bëdabidi chiec nepec. 5Adembidi Esuquidistun mibi bëdambuen isquin bëdambo icmendac. Nuquin Papan bëdambuen iste tantiamequidquio aidi nec. Abia aton dada uënëstiapimbo icquid icmequin uincuenmiaidquio nec. Adquid yec abitedishun Icbombo nec. Aidënuidtsëqui nidaidën tabadquidën chuiquid tapa abitedimbo namendac. Aidi nuqui tantiaquidquio yec nuqui cuidmenquio icnuec nuqui icsambuen naid bedshunash abided cuidadec intac chididiquec uënëspondash.#1.5 Tauambuen Nuquin Papan Moises abided cuidadaid tantiamequin nëish iua obecaded cuidaid chuipampic. Buan. 12.13bëta 23 isbanta. 6Abi tantiasho issun Esuquidistun namiaido yec nëish iua cuessunneshun pichicaquidon nacbimbuen Nuquin Papa nashunquido nuqui nendac. Nuqui adomequid icsho: Esus bëdamboshëcquid nec. Abitedishun Icbombo icquin abitedimbo namequidquio nec, quequin ma ënenquio icquin tantiapanuna. Amen.
7Esuquidistu abu ushu yacno choendac.
Adec chosho matses abitedishunquio isendac.
Aden cun matsesën ambi mëyanquin uënës uameshun ambi podo ansebuedquio Esus chosho isendac.
Padtemboshë, ashibi cuidpec, quetanec abi cuidte tantiec dacuëdec natiaquiec shubiendac.
Esus tantiesabo utsibotsen adecbidi abi cuidte tantiec natiaquiec sedenquec shubiquiendac.
Adtequidquio iquendac. Amen.#1.7 Sac. 12.10 tantiaquin nëid dada uapanëdash. Aid ista.
8Adshumbic Nuquin Papa nadatiambocquidën naden chuiposhi: Ëndenquimboshë icpampid iquequi nibëdantiapimbocquid nebi. Nidaid uabi yec icpampid yequi nëbi abi icquid iquequi choendabi, queposh Nuquin Papa nadatiambocquidquio.#1.8 Aden Nuquin Papan Isayas dada uamepampic. Isbanta. Isa. 44.6 ista.
II. 7TED SHUBU DADPEN ICQUID UTSI UTSIEC YACNO TABADQUID ESUS TANTIAQUIDO CHIAID
(1.9—3.22)
Dacuëdampambuecnuc Esusën ismiaid
9Esusbëd iccondaidquio Uan nebi. Mibëtan Esus tantiaquid yec min utsi nebi. Esus tantiaquid icsho Nuquin Papan namiaido yec aidbëd tabadtequido nuqui nec. Esus tantiasho mibi natiamequin chieshënacpadembidi Esus tantiesabon chieshëmpondashi. Adoaqui Esusën namiacpadec chieshtoenquio icquin abi Esus chuibenniondambi. Adsho issun Esus chieshënquidon quënën tsadunacbimbuen cuenmenquio icnuen acte dapa mad caid nidaid nacnëdquid tapa Padmos caidën tsadunondac abi tsadec nebi. 10Dominco uëshën Esus tantiec tsadshobini Nuquin Papan Mayanën tantiameposh. Adoac cun cachocuësh shoncate shoncacbimbuec cumapenec onquesho tantiapombi. 11Naden chuiposhi: Umbi ismiac mimbi isaidbëta Umbi Chiaidtedi dada uabanta. Adoshombic nidaid Asia caidën icquid shubu dadpen icquid 7ted icquid uanno uannombuec tabadquin Esus tantiaquidtedishun iste nëidtedi yacno dada uashun buanmeta. Nëidic Epeso yacno. Nëidic Esmidna yacno. Nëidic Pedcamo yacno. Nëidic Tiatida yacno. Nëidic Saddes yacno. Nëidic Pidadedpia yacno. Nëidic Daudisea yacno. Aidted yacnocquidon iste dada uashun buanmeta, quec cumapenec onquequin chuiposhi.
12Adec onquesho tantiatanec: ¿Tsutsimbo neque? Isnu, quec bidiadquin isaquien tabote taboshon manitsinaid 7ted icposh. Aid manitsintequid shocosh bëshpiu bëshpiucquid odo caid nacnenaidquio neposh. 13Aidted nënantanquio Matsesën Tishaidbimbuecquid icsho ispombi.#1.13 Esusien nechitosh, quequin tantiaposh. Aidi dashcute ënapen icquid abitiombi dasiuidpaccosh. Abi shictonquiaid shocosh bëshpiu bëshpiucquid odo caid nacnenaid aton shicdiadquid yacno cuësquec icposh. 14Aton manëdaid ushumboshë icposh. Nëish iua obecan bubimbuec icposh. Adecbidi iquenuanquid icnuc ue ushumboquid yacbimbuec icposh. Aton ëshë cute nëdënquequidbimbuec isquid isquidquio icposh.#1.14 Daniedtsen manëdaid ushumboshë icsho ismepampic. Dan. 7.9 ista. Cun ëshën ompodtiapimbo icnuc abitedimbo isembi, quequin aden Esusën ismepanëdash. 15Aton taë shocosh piumbocquid bëdonsebimbuec nacnacquio icposh. Aidi acte nua cuëdec chododoquiacbimbuec cumapenec onqueposh.#1.15 Esequiedëntsen Nuquin Papa isampic. Ese. 1.24 ista. 16Aton mëdante abiucshun uispa 7ted sanamposh. Chështe aucbidaëdi cuënumbo icquid ana shëcuënuësh cueshqueposh. Aton bëtantete badiadën uëshë chënquec bëchamauanquiacbimbuec isadposh.#1.16 Adembidi Isayasën chuipampic. Isa. 49.2 ista. Utsi utsien caic: Cuidquid nebi, quequin aden chuishumbic: Nuquin Papan Chiaidquio chiec nebi, quequin aden Esusën ismepanëdash.
17Adec dacuëdampambuecsho istanequini aton tayumbi uënësacbimbuec uebudpaccoc. Adshobini aton mëdante abiucshun camishquin naden chuiposhi: Dacuëdenda. Ëndenquimboshë nidaid uabi yec icpampidi nebi. Adquid iquec nibëdantiapimbo icquidquio nebi.#1.17 Adecbidi Nuquin Papan namiaid icnuc Danied uebudpampic. Dan. 10.9-11 ista. 18Nëbi adquid iquec abi iquebi. Adquid iquequi uënëspobi. Adbuedi nëbi uincuenash uënëstiapimbo icquid nebi. Adquid yec uënëstequidën Icbombo nebi, queposh.
19Adashic abi onquec: Umbi: Nëbi nadquid iquendac. Nadquid utsi iuecash iquendac, quequin umbi chuibuedbëta umbi ismebuedtsen chuiquin dada uata. 20Tantia. Umbi mibi tantiamiabi icbued umbi uispa 7ted icquid cun mëdante abiucshun sanambuedbëta tabote taboshon manitsintequid shocosh bëshpiu bëshpiucquid odo caid nacnenaid 7ted tabëcaid mibi chuiquin tantiamenu. Nidaid Asia caid yacno 7ted shubu dadpen icquid yacno yacnombuec ubi chuibanquido 7tedbidi icuaindac, quequin tantiaquin uispa 7ted mibi ismiombi. Tabote taboshon manitsintequid 7ted icquidic ubi tantiec matses iccuededquido yacno yacnombuec iquendabi, quequin Esusën chuiposhi.
Currently Selected:
Esusën Uan ismiaid 1: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.