Udas 1
1
Mibitedi tantiembi, quequin chiaid
1Esuquidistun iuambo nebi. Santiacon utsi Udas nebi.#1.1 Santiaco Santiacon Dada uaid dada uaquiden nechitanëdash. Mibitedi tantiaquioquin Nuquin Papan tantiamiaido icquin abi tantiasho: Ubi tantienquio yannushe, queshun Esuquidistun mibitedi cudasquin dayunuaic, quequin chuiquin mimbi iste dada uanu. 2Nuquin Papan cuidte bunenquio icquin bëdambuen isquin tantiamiaido yec dacuëdenquio icmequin tantiananquid ma mibitedi icmepanuna.
Muaquido iquendac, quequin chiaid
3Tantia, cun utsibo, umbi tantiaido icsho mibitedi chuinu. Abëd tabadmenuen nuqui cuidmenquio icnuec Esus abided cuidadec uënësaid tantiateuidi bunsho mibitedi dadpen chuiquin dadauate bunobi. Adbuedi utsi chuiquin dada uanu. Nëbi mibi yacnoshon ambenquiobi muaquin chuisho tantiashun: Mua. Esusën chiaidpenquio mimbi chiec. Aid tantiatiapimbo iquebi, quequin aidon chiaid tantienda. Nuquin Papan Chiaidquio chuibanac aid tantiondaido mibi neque. Utsi tantienda. 4Esus tantiaquido danmianquiec mibitedi icsambuen namenuec mibi yacno muaquido puduedac caosh. Ambi ëndenquimbo chuiquin dada uamiampicpadombuen Nuquin Papan cuidtequidombo aido nendac. Adquido icquin: Esuquidistu Nuquin Icbopenquio neque. Aidën chiaid nainquio icnuna. Nuquin Papan bëdambuen isaidombi Ambi Chiaid niacniacquin abi bunaiduidi naquin ambi natemaidi nasho issun nuqui cuidenquio iquec, quequin chiec cumapenec muaique. Aden chiec muasho tantienda.
Icsambuen naquido cuidte chiaid
5Tantia. Nuquin Papan cuidampid mimbi tantianëdaidi mibitedi padpiden chuiuanu. Equipito yacnoshon isadaidbotedi buanmepampic. Adoac iuectanquin ambi buanmiaidombi Ambi Chiaid niacniacsho issun Nuquin Papan abi tantiesabotedi uënësmepampic.#1.5 Equipito yacnoshon buanampid istiadquio icquin Buan. 12.51 ista. Isadaidbo cuidampid iste bunquin I.T. 14.29-30bëta 35 isbanta. 6Adecbidi Nuquin Papabëd icquidobi Aidën Chiaid niac niacte buncuenash Nuquin Papabëd icte bunenquio yampampic. Adsho issun aidotedi puduentiapimbo yec inchëshquioshë yacno nidmequin Nuquin Papan bëtashpampic. Mibitedi icsamboshë iquec, queshun abitedi cuidte uëshën cuidquionombi adopampic. 7Adecbidi shubu dadpen icquid Sodoma yacnocquidobëd Comoda yacnocquido chido piucquid bedec chudadquid dadpen icpampic. Adecbidi aton chidopenquio chudquid dada dadpen icpampic. Adecbidi chido aton bënëpenquio chudmequid icnubi aton dada utsibëdi chichudnanquido icpampic. Adecbidi shubu dadpen icquid utsi utsiec anoentsëc icquido icsambuecbidi tabaduapampic. Adec tabadsho issun cuidquin Nuquin Papan natiamequin uesquin nëdëncapampic. Aden cuidampid tantiaquin: Icsambuen naquidotedi chian annëdënquiacno nësecaquin cuidquidquio Nuquin Papa nec, quequin nuqui tantiec.#1.7 Cuidquin nëdëncampid iste bunquin Ene. 19.1-24 isbanta.
Nuquin Papan Chiaid niac niacquido cuidte chiaid
8Aden aido cuidampid icnubi abi cuidte tantienquio yec matses icsambuenshë nabanec tabadquin aton dadabi icsa uaquiendac. Aton chuiquid tapabon chiaid niacniacquin Nuquin Papan Chiaid niac niaquendac. Adembidi Nuquin Papabëd icquido icsambuen chuishunec. 9Nuquin Papabëd icquidon chuiquid tapa icquin Miquedën adotiapimbo icpampic. Aidi Moises uënësacsho isash: Chococanu, quesho tantiashumbien Mayan Icsa Satanasën: Umbiquien bednu, catuidpampic. Adoac: Icsambocquid mibi neque. Cuidnu, cainquiocquin Miquedën: Nuquin Papambi ma mibi chushcapanu, capampic.#1.9 Miquedën naid aden chiaid iste bunquin Dan. 10.13, 21 issun Dan. 12.1 isbanta. 10Padnuen muaquidon ambi tantienquio yaidi icsambuen chuishunec. Aido nëishën tantienquio yacbimbuec tabadquin ambi tantiaiduidi naic tabadec. Aden nabanec tabadquin ambibi Nuquin Papa cuidmendac.#1.10 Nuquin Papabëd icquidobëta Satanas icsambuen chuishunec, quequin chiaid nec.
11Aido cuidtequido icsho tantiac uënësquioshë iquec. Cain campidbimbuecquid aido nec. Nuquin Papan Chiaid niacniacquin abi bunaid naiqui icsaic. Aido piucquid dadpen bedteuidi bunquido yec Badan caidbimbuecquido nec. Adembidi Nuquin Papan Ambi Chiaid niacniacsho Code uënësmepampic.#1.11 Cainën icsambuen naid iste bunquin Ene. 4.1-16 isbanta. Badanën naid iste bunquin I.T. 22.4-35 isbanta. Coden naid iste bunquin I.T. 16.1-35 isbanta. 12Esus uënësaid tantiec tabadquin actequidbëta petempi pec tantiananec tabadquin pebededacno puduedshun mibëdtambi muaquidon piac caosh. Aido: Nuquin Papa tantiesa nebi, quiash dacuëdtiadquidi padenquio yec tabadec. Adquid yec aton iua obeca bëdambuen tantienquio yacbimbuen abiuidtsëqui datantiadquin nabanquido nec. Adecbidi abu chëshë acte nibëdquid icsho cunquequidën uanno tsidunacbimbuecquido nec. Adecbidi cute ambi nitsinaid bacuëenquio yec uënësacsho istuidshun icbon chichicshunniacbimbuen Nuquin Papan cuidtequidombo nendac.#1.12 Muaquin chiacbimbuen chiampid iste bunquin Ese. 34.8 ista. 13Aido acte dapa cumapenec bocquec tëccuasquequidën cuëmano nushanuaquin icsa uacbimbuen icsambuen naquido nec. Aido uispa chënquebuedi bënnudacbimbuen bëdambuen tantiamenquiocquido nec. Adec muasho cuidquin Nuquin Papan puduentiapimbo yec inchëshquimboshë yacno nidmendac.
14Adquido icsho cun tsusedpa Enoc caidën chuipampic. Aidi abia matses uaid Adanën madon baban tishmiaidën baba Enoc nepampic. Aidëmbi naden chuipampic: Nuquin Papabëd icquido dadpenquioshë tamëdtiapimbo icquido Nuquin Icbobëd chosho issun#1.14 Enoquën nampid iste bunquin Ene. 5.21-24 isbanta. 15matses abitedi icsambocquido icquin icsambuenuidi naic tabadsho cuidnuec Nuquin Icbo choendac. Abi oncaquin icsambuen chuishunquidobëta Ambi Chiaid niac niacquido cuidnuec choendac, quequin Enoquën chuipampic. 16Aido cuidtequido iquec aton chuiquid tapabon chiaid tantienquio yec: Icsambo iquec, quiash icsambuen chuishunquin abitedi chieshënec tabadec. Ubiuidtsëqui bëdambuen naquidquio nebi, queuidequi iquec. Ubi bunacpadombuen ma nanu, quiash matses utsibo chiec: Umbi tantiaidquio mibi nec, quec muaic.
Chieshtoenquiocquin Esus tantiaquionona, quiaid
17Tantia. Cun utsibo, umbi tantiaidombo icsho mibitedi chuinu. Nuquin Icbo Esuquidistun: Ubi chuibenneta, caidon chiondaid mibi padpiden chuiuanu. 18Aidon naden chuipondash: Esus chote nëbi yannuc matses abi bunacpadombuen naic icsambuec tabadendac. Adquido icquin Esus chieshënquin abi tantiaquido icsambuen chuishunquin mamënshunendac, quepondash aido. 19Adquido yec chieshëmënec cuësh cuëshëdmianquido nec. Adec abi bunacpadec tabadquid icnuc Nuquin Papan Mayan aidobëd tabadenquio iquendac.
20Cun utsibo, umbi tantiaidombo mibitedi neque. Chieshtoenquio icquin Esus tantiaquiota. Adquid icquin aton Mayan Bëdan tantiamiacpadombuen Nuquin Papa chianneta. 21Ënenquio icquin Nuquin Papan ubi tantiec, quequin tantiaquiota. Abi chote uëshën Nuquin Icbo Esuquidistu chosho isnuen aid cainec tabadnuna. Aidëmbi nuquitedi cuidte bunenquio icquin abi tantiameshun ënëdenquio icnuc abëdi tabadmendac. 22Nuquin Papan Chiaid chuibansho tantiash: ¿Mitsipaden chiec nepec? quequid icsho tantiashun chieshënenquio icquin bëdambuen chuiquin tantiamenuna. 23Bacuëmpi cute nëdënquiacno nidsho: Baded bed. Pichiquenushe, quiacbimbuen Nuquin Papan chian annëdënquiacno nësecaquin cuidnushe, queshun utsibo tantiamequin Esus chuibannuna. Icsaquidotsen bëdambuen isnuna. Esus tantiamenuen aido bëdambuen isec: Ubitsen icsamane, quiash aido icsacpadec icsainda.
Nuquin Papa bëdambo iquec, quequin ënquin chiaid
24-25Nuquin Papa abentsëcquiobi iquec. Abi tantiasho dayun uaquin nuqui icsamenquio iquendac. Adshumbic: Icsambocquid mibi nec, utsibo quetiapimbo icnuc bëdambocquid icmeshun bëdamboshë yacno abëdi nuqui tabadmendac. Adoac nuqui cuishonquequiendac. Adquid tantiaquin nadonona. Abipadquid utsi nibëdnuc Nuquin Papa abentsëcquiobi iquec. Nuquin Icbo Esuquidistuded cuidshun abi tantiaquido cuidenquio icquid Nuquin Papa nec. Abitedishun Icbombo icquin nadatiambocquin nabanquidquio Nuquin Papa nec. Abitedishun Icbombo icquin abitedimbo namequidquio nec. Aidi ëndenquimboshë yampidi nëbi nibëdantiapimbocquid yec abi iquec. Adquid icsho: Mibi bëdamboshë iquec, canuna ënenquio icquin, Amen. Aidted chuiquin dada uaombi.
Currently Selected:
Udas 1: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.