Uan 20
20
3. Uincuenash Esus isadcuenaid
(20.1—21.25)
Esus uincuenaid
(Mat. 28.1-10; Madc. 16.1-8; Duc. 24.1-12)
1Esus chococan daëdec ushash dominco uëshë badiadnuc ënden inchësh inchëshquio icnubi Madia Macdadena Esus chococacno isec nidpanëdash. Nidshun isaquien shëcuë bëtinaid cuënote dapa bëcunnepambuen shëcniacsho istuidpanëdash. 2Aden shëcniacsho istanec titinquianec choquin Simon Petedobëta ubi Esusën tantiabuedquio icsho chiec: Nuquin Icbo padon dada buanaccosh. ¿Mitsimbo dectannun buampash? quepondash Madia Macdadena.
3Adoaquini Petedobëd: Istannu, quianec chococacno nidpondac. 4Adec nidec titinquequin Petedo nianec ubia chococacno nidpondabi. 5Adshumbimbi puduedenquio icquin shëcuë anshuebudshun anispondac. Adshun isaqui Esus datanebued dashcuteuidtsëqui uepondash. 6Aden umbi anisnubien tsiuec choequi Simon Petedo badedi shëcuën puduedpondash. Aidëntsen dashcute dataniaiduidtsëqui uesho istuidpondash. 7Adec abi dataniaid uenubi udictsëc dashcutempi Esus mataniacbued bëdambuen shëbunaid uesho ispondash. 8Aid puduedsho istanec tsiuec puduedshun umbitsen ispondambi. Adash: Ambi chuibocpadequi uincuenac, quequin tantiapondambi. 9Nuquin Papan tantiamiac cun tsusedpabon chuiquin: Uënësacsho uincuenmendac, quequin dada uaquin chiampid tantienquio icbuedëmbi aden tantiapondambi.#20.9 Cuëd. 16.8-11 tantiaquin Uanën nëid dada uapanëdash. 10Aden istanec ubi ushbocnobidi chouapondac.
Esusën Madia Macdadena ismiaid
(Madc. 16.9-11)
11Adnubien Madia ubi chuiuambued Esus chococacnobidi isec niduapanëdash. Nidash shëcuë cuëman tsadec shubiec sedenquepanëdash. Adec tsadec sedenquetanquin shëcuë anshuebudshun isaquien 12Nuquin Papan abëd icquid budmiaido daëd dashcute ushumbo icquid dasiuidquid Esusën dada uebocno tabadpanëdash. Esusën mapi icbocno abentsëc tsadnubi utsi taë icbocno tsadsho ispanëdash. 13Adshobien aidon: ¿Atotsi quiash shubiec sedenquec ne, champi? caquien: Cun Icbo ¿midambo buanac? Istiadquio iquebi. ¿Mitsimbo buanshun dectampash? quetanec 14aucbidi bidiadquin Esusquio bëispanëdash. Utsi danquin abi issobien 15Esusëntsen: ¿Atotsi quiash shubiec sedenquec ne, champi? ¿Tsutsi nibënec ne? caquien tied neshcaquid danquin Madian: ¿Cun Icbo padon dadada buano? ¿Mitsimbo buanshun dectano? Ubi isme. Bednu, capanëdash Madian Esusquiobi chuiquimbi.
16Abi adoshobien Esusën: Madia, cac bëistanequien: Esus Cun Icbombo nec, quetanquin cun onqueten cuënquin: Dabuni, capanëdash. 17Aden abi chuiquin dayunshobien Esusën: Ubi dayunenda. Umbi chuibocpadec Cun Pa yacno nidabi iccobique. Ubëd icbued umbi cun utsi cabuedo umbi chuibuedquio chiec nid. Mibitedishun Nuquin Papa cabued Cun Pabidi nec. Adquid icnuc aid yacno nidendabi, quiosh, quequin chuita, quepanëdash Esus. 18Adoaquien abëd icquido yacno choshon Madia Macdadenan: Nuquin Icbo uincuenacsho isombi, quetanquin abi Esusën chuibambuedtedi Madian chuibampondash.
Uincuenshun Esusën abëd icquido ismiaid
(Mat. 28.16-20; Madc. 16.14-18; Duc. 24.36-49)
19Madian aden chuibued dominco uëshë inchëshbudtsëqui shubu nuntan Esusbëd icbuedobëdi tabadpondabi. Cun matses isadaidbon chuiquido dacuëdënquin umanucuësh utsi puduedtiapimbo icnuc bëdambuen bëtashash tabadnubien shëcuënuësh puduedenquio icbuedi nënantanuëshquio Esus isadcuempondash. Adtanequien: Dacuëdenda, quepondash. 20Aden chuitanquimbi abi bëchun shuin mëtoccaid chiuëbëta abi podo ansiaid Cun Icbon ubitedi ismepondash. Aden ismiac: Cun Icbo uincuenac, quiash ubitedi cuishonquecuededpondabi. 21Adsho istanequien ambi chuibocpadecbidi: Dacuëdenda, quetanec: Tantia. Mibitedi chuinu. Cun Pan: Matses chiec nid, quequin ubi chomiondacpadombuembidi: Ubi chuibennetan, quequin mibitedi nidmendambi, quepondash Esus. 22Adtanquin ubitedi dabushcabampondash. Aden dabushcabanec: Nuquin Papan Mayan Bëda mibëd tabadendac. 23Adquid icnuc mimbi: Nuquin Papa mimbi icsambuen naid tantienquio yec bëshunac, cacpadequi Nuquin Papa aidën icsambuen naid tantienquio yec bëshunendac. Utsi chuiquin mimbi: Nuquin Papa mimbi icsambuen naid tantienquio yec bëshunenquio iquec, cacpadequi Nuquin Papa aidën icsambuen naid bëshunenquio iquendac, quepondash Esus.#20.23 Nuquin Papan matses icsaid bëshunquid nec, quequin chiaid iste bunquin Madc. 2.1-12bëta Duc. 5.17-26 isbanta.
Esusën Tomas ismiaid
24Adtanec Esus isadenquio yambon Esusbëd icbued utsi Tomas abi uëshëmbi anin daëd tishnëdaid chopondash. 25Choshobi: Nuquin Icbo ubitedishun isombi, caquien: ¿Aidquiobida nepash? Utsien niash. Bëchun shuin mëtoccaid shëcuë issun aid shëcuë mëdanten bëmishquinc podo ansiaid bëmishquinc cashumbimbi: Ai, Cun Icbo uincuenac, quequin tantiatsiac. Padambobi: Cun Icbombobien niash, quetiapimbo iquebi, quepondash Tomas. 26Tomas adbon 7tedec ushash shubu nuntambidi Tomasbëd ubitedi tabaduapondabi. Puduedtiapimbo icnuc padpiden shëcuë bëtashash tabaduanubien Esus nënantanuëshquio isadcuenuapondash. Adash: Dacuëdenda, queuapondash. 27Adtanequien: Is cun mëdante, Tomas. Shëcuë bëmishec cho. Në podo ansiaid iqueque. Aidtsen bëmishec cho. Adshun: Uincuenabien icchitash, quequin tantienquio icbuedëmbi: Uincuenac, quequin tantiata, caquien 28mishenquio yec badedi: Ai, Nuquin Papapadquidquiobidi yec Cun Icbombo ma mibi neyoc, quepondash Tomas. 29Adsho tantiashumbien Esusën: Ubi issun: Nuquin Papapadquidquiobidi mibi nec, quequin mimbi ubi tantiec. Utsibombien ubi isambobi: Ai, Nuquin Papa padquidquiobidien Esus nec, quequin ubi tantiasho Nuquin Papan bëdambo icmendac, quepondash Esus Tomas chiec.
Ma Esus tantianu, quequin nëid dada uaombi, quiaid
30Adec uincuenshun Esusën dadpen ismepondashi. Uënësambo icquin dadpenquio nadatiambocquin nabansho abëd icquidobëtan ispondambi. Aden ambi nabanondaidtedi uesquin chuiquin dada uambo iccombi. 31Naden tantiaquin dada uaombi: Nuquin Papan Chomiaid yec Quidistu Nuquin Papan Madombo Esus nec, quequin aiduidtsëqui tantiash ma Nuquin Papa yacno ënëdenquio yec abëd tabadtequido icpanu, quequin aidtedi dada uaombi.
Currently Selected:
Uan 20: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.