Uan 21
21
Chian cuëmanuësh Esus isaduaid
1Edusaden yacnouësh isadboshic chian Tibedias caid cuëmanshuntsen abëd icquido padpiden ismec Esus isadcuempondash, quequin mibi chuinu. 2Esus uincuenash isadbon cun nidaid Cadidea caid yacno nidannepondabi. Nidanniash nëidtedi tabadpondabi. Nëidic Simon Petedo. Nëidic Tomas anin abi uëshëmbi daëd tishaid. Nëidic shubu dadpen icquid Cana yacnocquid Natanaed. Nëidic Sebedeon mado ubëta tishaid cun utsi Santiaco. Nëidic ubi. Nëidic Esusbëd icbued utsi daëd. Aidted icpondabi. 3Adnubien Simon Petedo: Nëshaidën nuëcquid bedtannu, quepondash. Adsho tantiash ubitedi: Nuquitedi nanu nid, capondac. Adash chian yacno nidash cano antabëdtoanec nënantan nidpondabi. Inchëshbudtsëc bedanquin nëshaid nënebennequin nuëcquid bedambobi ambi badiadpondabi.
4Badiadec uëshëmboshë yannubi acte cuëman masi yacno Esus nidsho ispondambi. Adsho issun ubitedishun: Esus nec, quequin tantienquio icpondambi. 5Adshobini Esusën cuëmpondash: Caniabo ¿tedtsi nuëcquid bedo? cac: Padambo. Nibëdec, capondambi. 6Adsho tantiashun: Mimbi nëniauc nënenquio icquin cano utsiuc abiuc nëshaid nëne. Auc nënequin mimbi nuëcquid bedec, cac ambi chiauc nëshaid nënetanquin: Indono, cac nuëcquid dadpenquioshë bedadash nëshaid indoadtiapimbo yec iuëmboshë icpondash.
7Adsho issumbimbi Esusën tantiabuedquio icquin: Ma Nuquin Icbo Esus nepayoc, Petedo, capondac. Adoaquien aton tsitsumi icquiduidtsëqui icnuc abi dachiquidbued aton dashcute utsi badedi dasiuidtanec acte nëpudunash tantannidec Esus isnuec Petedo nidpondash. 8Adnubini utsibobëd canombi tsiuec nëshaid shoyombanec nidpondac. Cuëma anoentsëqui nuëcquid bedash 100 metodo cactiontsëc icnuc adec nidpondabi. 9Tsiuec nidash pudundoshon isaquien pambëdi nuëcquid cuten shëadpec. 10Adnubien Esusën: Mimbi bedbued daëdpactsëc bec cho penun, cac 11Simon Petedon: Ai bedtannu, quianec nidshun cano annidtoshon nëshaid shoyombëpondash. Adshumbic acte cuëman tsindoshon isac dadpenquioshë 153ted nuëcquid icpondash. Nua nuaic tsadquido icnuc nëshaid tësëdtiadtsëcquiocquidi tësëdenquio icpondash.
12-13Adshobien Esusën: Pec cho, capondash. Adoac chochoash tabadsho pamba menebantanquin nuëcquidtsen menebampondashi. Adoac: ¿Tsutsi ne? quenquio icquin: Nuquin Icbo Esus nec, quequin tantiondambi ubitedishun. 14Adec uincuenash shubu nuntan tabadnuc daëdec isadondashic chian cuëmanuështsen Esus isaduapondash.
Esusën Petedo chiaid
15Aden chian cuëmanshun Esusbëtan pebededpondambi. Adshumbic Simon Petedo Esusën naden chuipondash: Onasën mado Simon, tantia. Mibi chuinu. Nëidon ubi bëdiactsëc tantianuc ¿ada ubi tantiaquie? caquien: Ai, Icbo, mibi tantiaquiembi. Aden umbi tantiaid mimbi tantiec, quepondash Petedo. Adsho tantiashun: Ubi tantiaquin cun obecabimbuecquido ubi dayun uashunta, capondash Esusën. 16Adshumbic padpiden: ¿Ada ubi tantiaquie, Onasën mado Simon? caquien: Ai, Icbo, mambi mibi tantiaquieyoc. Aden umbi tantiaid mimbi tantiec, quesho tantiashumbien padpiden: Ubi tantiaquin cun obecabimbuecquido ubi dayun uashunta, cauapondash Esusën. 17Aden daëden chuishumbic padpiden Esusën: ¿Ada ubi tantiaquie, Onasën mado Simon? cac uënësquio yanec shubiantiadtsëcquio Petedo yampondash. Adashic: Mibi cun Icbo nec. Ma mimbi abitedimbo tantieyoc. Petedon ubi tantiaquiec, quequin ma mimbi tantieyoc, quepondash Petedo. Adsho tantiash Esus padpidec: Ubi tantiaquin cun obecabimbuecquido ubi dayun uashunta, queuapondash.#21.17 Petedon: Umbi isacmaid Esus nec, quequin chiactedbidi Esusën Petedo chiannepanëdash. Esusën: Ubi tantiaquin cun obecabimbuecquido ubi dayun uashunta, quequin abi tantiaquido dayunuashunte chuipanëdash. Ambi Esus chiacpadombuen Petedo Esus tantiaquidon chuiquid tapa yampanëdash.
18Adshumbic Petedobidi chuiuaic: Tantia. Utsitsen abimbo chuinu. Cania yec min dashcute mibibi tsisiuidtennec. Adanec mibi bunacno mibi nidtenniondac. Tsësiobudtsacshoen tsiumeshun utsibon ëquë mëdimbudcuentsëcshun mibi nidte bunacmanombo mibi buanendac, quepondash Esus. 19Aden chuiquin Nuquin Papan chiacpadombuenuidi mimbi nabansho ubi chieshënquidon mibitsen cuessunnendac. Adoacsho isash matses: Petedo namequid Nuquin Papa bëdamboshë iquec, quendac, quequin tantiec Esus adpondash. Adashic: Ënenquio icquin ubi tantiata, quetanec: Cho. Nidnu, cac ubitedi puduanec nidpondabi.#21.18-19 Esus uënësan iuecshun Doma yacnocquidon Petedo bedshun uënës uaquin andëctsincabudquin cueste napotiaidën dectampanëdash, quepanëdash.
Esusën Uan chiaid
20Tsiuec choshobini Petedon bidiadquin ispondash. Esusën tantiaidquio ubi icsho abi bedmete inchëshën Esusën cachoctsëqui pec uequin: ¿Mibi bedmequid tsutsi cai, Icbo? quequin chuibuedquio niondabi. 21Adec ubi chosho issun: Ma nëid, Icbo. ¿Mitsipadec uënëspec? capondash Petedon ubi uënëste Esus chuimenuen. 22Adoaquien Esusën: Mimbi tantiatepenquio neque. Umbi chiacpadombuen nata, Petedo. Umbi tantiacpadequi aidi uënësendac. Ubi Nuquin Papa yacnouësh choabi yacpadec ma aid uënësenquio icnu, ubi quenuc uënësenquio ictsiash, quepondash Esus. 23Adec: Uënësenquio ictsiash, Esus quesho tantiash ubi caic: Esusën tantiaidquio yec Uan uënësenquio iquendac, quecuededpanëdash Esus tantiaquido. ¿Adenda Esusën chuidiondash? Ma adempenquio chiondac. Ubi Nuquin Papa yacnouësh choabi yacpadequi ma uënësenquio icnu, ubi quenuc uënësenquio ictsiash. Mimbi tantiatepenquio nec, quequimbien chuipondash.
24Aden Esusën nabanondaid umbi isondaidbëta ambi chiondaidquio chuiquin: Abimbo iquec, quequin aidtedi dada uaombi. 25Esusën naid abitedimbo chuiquin dada uambo iccombi. Ambi naidbëta ambi chuibanaid abitedimbo chuiquin dada uaquin dadauate dadpenquioshë naimbudnequin dada uaid icnuc matses ¿mitsimbo tabadtiapimbo ictsiash? Aidted chuiquin dada uaombi.
Currently Selected:
Uan 21: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.