Madcos 16
16
Esus uincuenaid
(Mat. 28.1-10; Duc. 24.1-12; Uan 20.1-10)
1Aden isboshic chonoadtemaid uëshë inchëshbudec naimëdnuc Madia Macdadena yec Madia Santiacon tita yec Sadome yec quec nidshun aton piucquid menequin bëdambo nuadnuc: Esus danoshcatannu, quequin danoshcate bedpanëdash. 2Adnubi dominco uëshë badiadnuc uëshë chënquecuntsëcnubi ambi bëdambo nuadte bedbued buanec Esus chocoquiacno nidannequi: 3¿Tsuntsin cuënote dapan bëtashbued nuqui shëcneshumpec? quec onquenidpanëdash.
4Adec onquenidquimbi cuënote dapan bëtashbued shëcniacsho istuidpanëdash. Aid cuënote dapa nuamboshë yec iuëmboshëcquid nepanëdash. 5Aden shëcniacsho isash shëcuën puduedquin isaquien dada cania dashcute ushumboshëcquid dasiuidash abiucquio tsadsho ispanëdash.#16.5 Aid dada cania Nuquin Papabëd icquid nepanëdash. Aid istanec chidobo dacuëdcuededpanëdash.
6Adsho issumbien: Dacuëdenda. Esus Nasaded yacnocquid cueste napotiaidën dectanquin uënës uabued mibitedishun nibënaid uincuenanec nidosh. Nëmbobi nanac uebuedi nibëdeque. Is. 7Abëd icquido naden chiec nid: Nidaid Cadidea yacno abia nidshun mibi cainec. Ashunquio mimbi Esus isendac, quequin Esusbëd icquid utsibobëta Petedo chuituidec nid, quepanëdash chidobo chiec.
8Aden chuisho tantianec Esus chococaid shëcuënuësh puduenanec titinquianec dacuëdec uëdëquequin utsibo chienquio yec chidobo nidannepanëdash.
Esusën Madia Macdadena ismiaid
(Mat. 28.16-20; Duc. 24.13-53; Uan 20.11-18)
9Adnubien uincuenshun dominco badiadnuc Madia Macdadenaba Esusën ismepanëdash. Aidi ambi podobitsi icsa 7ted dapuduedaid icsho dapuduenmiondaid nepanëdash. 10Aden ismiac nidec Esusbëd icquido yacno puduedshun uënësquio icnuc shubiec tabadsho: Nuquin Icbo uincuenacsho isombi, quequin Madian chuituidpanëdash. 11Esus uincuenash capusho isombi, Madia quesho tantiashun: Mua. Aidquio mimbi istiapimbo iquec, quec tantienquio yec tabadcuededpanëdash.
Esusën abi tantiaquid daëd ismiaid
(Duc. 24.13-35)
12Adashic tantienquio yec tabadbued icnubi dada daëd Edusaden yacnouësh podquiedën nidsho Esusën chinuntuidpanëdash. Aden chinuntanec aidobëd nidannec shubun puduedshun ismebempanëdash Esusën. 13Aden ismiac aid daëdi aucbidi Edusaden yacno niduashun ambi isbued chuituidpanëdash. Aden chiac: Muequi nec, queshun tantienquio icuapanëdash utsibon.
Esusën abëd icquido: Chuibenneta, caid
(Mat. 28.16-20; Duc. 24.36-49; Uan 20.19-23)
14Adashic abëd icquidombo 11ted pec tabadte yacno tabadnubi Esus isadcuempanëdash. Adec isadcuenshun: Uincuenaccosh, quequin ubi isquidon chiaqui tantiate bunenquio mibi iccoque. Chobique. Is, capanëdash.
15Aden chuishumbic: Nëbi nidaid utsi utsiec yacno nidanneta. Adec nidshun: Nuquin Papan namiacno tabadte iquendac, quequin Chiaid Bëda chuibenneta. 16Aden chuisho tantiaquid: Ubi cuidenquio icnuen Esusded Nuquin Papan cuidpanëdash. Adoaid tantiaquin: Umbi icsambuen naid ënnu, quequin ismequin acten mentomequid icsho Nuquin Papan abi yacno puduedmendac. Ubi tantiesain Nuquin Papan abi yacno puduedmenquio icquin cuidendac. 17Abi tantiaquid utsi utsien Nuquin Papan nadatiambocquin nabanquid icmendac. Adquid icmiaidën umbi nabanondacpadombuen podobitsi icsa dapuduedaid icsho dapuduenmendac. Adembidi utsibon onquete tantienquio icbuedëmbi abi uëshëmbi tantiashun umbi naid chuibanendac. 18Adembidi nisin piaqui bidisquenquio iquendac.#16.18 Esusën chiacpadombuen Nisi icsan piac Pabado uënësenquio icpampic. E.Ch.N. 28.1-6 isbanta. Adembidi: Uënësmenu, quequin dauë icsa acmiaqui uënësenquio iquendac. Adembidi nënec uënëstiadtsëcquio icquid icsho mishac bëdanendac, quepanëdash Esus.
Esus abuc indote chiaid
(Duc. 24.50-53)
19Aden chuibanquin ënshobi abuc indoac Nuquin Papan dayun abiucquio Esus tsadtuidpanëdash.#16.19 Nuquin Papan tantiamiacpadombuen Esus Nuquin Papabëd tsadte Cuëd. 110.1 dada uapampic, Chotaquën onqueten Cuëd. 110.1 ista. 20Ambo tsadquimbi nadatiambocquin namiac abëd icquidon nidaid utsi utsiec yacno nidanneshun: Nuquin Papan namiacno tabadte iquec, quequin Chiaid Bëda Esusën naid chuibennepanëdash. Aden chuibennesho: Umbi namiaid nec, quequin Nuquin Icbon nadatiambocquin namebampanëdash.
Currently Selected:
Madcos 16: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.