Madcos 15
15
Chuiquid tapa Pidato Esus meniaid
(Mat. 27.1-2, 11-14; Duc. 23.1-5; Uan 18.28-38)
1Badiadbudnubi isadaidbon chuiquido nëidted iccuededpanëdash. Nëidic Nuquin Papa ismequin nëish iua cuessunneshun pichicaquidon chuiquido. Nëidic Moisesën chiampid tantiamequido. Nëidic isadaidbon chuiquid tsësiobo. Aidtedi iccuededec onqueshun Esus mëtaneshun buanshun Doma yacnocquidon chuiquid cobednadod caid Pidato cuëmëdquid menepanëdash.#15.1 Pidato chiaid iste bunquin Mat. 27.2 istuidshun aid chiaid bëca taëmicquid isbanta. 2Aden meniac: ¿Isadaidbon chuiquid tapada ne? capanëdash Pidaton Esus chuiquin.
Adoaquien: Mimbi chiacpadquid nebi, capanëdash Esusën.
3Adnubien nëish iua cuessunneshun pichicaquidon chuiquidon: Esusën icsambuen nabanosh, quequin dadpen chiec onquecuededpanëdash. 4Adsho tantiashun padpidembuen Pidaton: ¿Ëcbedenquio yecta tsade? Ma mimbi icsambuen naid dadpen nëidon chuibampayoc, caqui 5ëcbedananenquio yec Esus tsadpanëdash. Adec tsadsho isash tantiadempambo yec Pidato tsadpanëdash.
Esus cueste napotiaidën dectan, quec cumapenec cuëdaid
(Mat. 27.15-31; Duc. 23.13-25; Uan 18.38—19.16)
6Adshumbic: Tsusedpabon: Ma cun mado uënësmenquio icnu, queshun obeca caniactsëc cuessuniampid tantiate uëshën setan setanquien Pidaton: Quënën tsadunmiaid abentsëc chicquin puduenmenu. ¿Mitsicquidimbi chicpe? cac isadaidbon: Nëid chic, cac Pidaton chicquin puduenmedednepanëdash. 7Adoaid ictednenubi quënën tsadunmenëdaid Badabas cuëmëdquid icpanëdash. Aidi utsibobëtan Doma yacnocquidobëd icte bunenquio icquin cuessunnianquid icsho issun bedmeshun quënën tsadunmenëdaid nepanëdash. 8Adnubien: Pidaton setan setanquien quënën tsadunmiaid abentsëc ambi chictedniondacpaden nëbi adquid utsi chictsiash, quequin tantiec Pidato yacno isadaidbo chochopanëdash. Adec chochoshon: Quënën tsadunmiaid chictedniondacpaden abentsëc chicquin puduenme, cabededpanëdash Pidato chuiquin.
9Adsho tantiashumbien Pidaton: Isadaidbon chuiquid tapa nebi, quebuedtambi ¿nidmepe? capanëdash. 10Ubi chuiquid tapa icmenquio icquin Esus chuiquid tapa icmenushe, queshun chieshënquin nëish iua cuessunneshun pichicaquidon chuiquido Esus uënës uamete bunec, quequin tantiaquin Pidaton aden chuipanëdash. 11Adnubien Nuquin Papa ismequin nëish iua cuessunneshun pichicaquidon chuiquidon ambo tabadquido chuiquin: ¿Adambi Esus nidmepe? quequin Pidaton chiac: Padi. Badabas chicquin puduenmeta, quequin chuidoneta, quequin chuipanëdash. Adoac aden chuibededpanëdash. 12Aden chuibededac padpiden chuiuaquin: Mibitedishun: Isadaidbon chuiquid tapa nec, cabued icsho ¿atotsimbi nape? capanëdash Pidaton.
13Adoaquien cumapenec cuëdcuededec: Cueste napotiaidën dectanme, quecuededpanëdash.
14Adoaquien Pidaton: ¿Atotsi icsambuen nasho mimbi adope? caquien buëdanquiec cuëdcuededec: Cueste napotiaidën dectanme, quecuededuapanëdash.
15Adsho tantiash: Isadaidbon: Bëdambocquid nec, ma ubi canu, queshun Badabas chicpanëdash. Adshumbic: Cueshcaten Esus cacuesmetanquin cueste napotiaidën dectanquin uënës uatan, quequin sondado buanmepanëdash Pidaton.
Sondadon Esus mamënshunaid chiaid
(Mat. 27.27-31)
16Adoac Esus bedshun abi tabadtenniacno shubu dapa tsicatequin daquënë uacno nuntan sondadon buampanëdash. Adoshombic sondado utsibo dadpen chochomepanëdash. 17Chochoshon dashcute dapa piu piumbocquid chuiquid tapa dasiuidacbimbuecnuc dasiuinshun mauete pinchuc pinchucpambo icnuc nacnenaid Esus mauemepanëdash. 18Adshumbic chuiquid tapa cuënacbimbuen cuënquin: Mibi isash bëdambo iquebi, isadaidbon chuiquid tapa, quequin Esus oncaquin mamënshumbededpanëdash sondadon. 19Adotanquimbic ambi cueste sananmiaid bedshundednequin sondado abentsëcshun abentsëcshunquien macuestanquin bëpishtucatanec dannëshën sebudec shuebudshun: Chuiquid tapa nec, quequin mamënshumpanëdash. 20Aden oncaquin mamënshumbededtanquin dashcute dapa piu piumbocquid ambi dasiuimbued dachictanquin aton dashcutebidi dasiuinuapanëdash. Adoshon: Ma uënësnu. Cueste napotiaidën dectanec nidnu nid, quianec nidquin Esus buampanëdash.
Esus cueste napotiaidën dectanaid
(Mat. 27.32-44; Duc. 23.26-43; Uan 19.17-27)
21Aden abi dectante cueste napotiaid Esusën buanquin iuënmenubi abi datanquid dada Simon cuëmëdquid icsho issun sondadon cueste chiadtometanquin buanmepanëdash. Aid dada shubu dadpen icquid Sidene yacnocquid yec aton tied yacnouësh choquid nepanëdash. Aidbidi Adejandobëtan Dupon papa nepanëdash. 22Aden cueste napotiaid buanmec macuësh tapa mapi canitebimbuec isadquid yacno chopanëdash. Aidi cun onqueten mapi canite quequin Codcota quequin cuënaid nepondash. 23Ambo choshon uba chinaid paë uaid dauë mida caid nëcushtanquin meniac Esusën aquenquio icpanëdash. 24Aden isuidsho istanquin cueste napotiaidën dectampanëdash. Aden dectanshun: Aton dashcute bednu, quequin sondadobon abi cuëmëdquidtedi dada uabanshun tëchun sandoshon cadotannequin dada uaidëmpi abia puduenquid isbanquin Esusën dashcute bedpanëdash.#15.24 Aden Cuëd. 22.18 dada uampidën Esusën dashcute nate chuipampic. Chotaquën onqueten Cuëd. 22.18 ista.
25Uëshë abuctoec 9 yannuc Esus cueste napotiaidën dectampanëdash. 26Esus dectanaid mapino: Isadaidbon chuiquid tapa icsho cuidaid nec, quequin cueste pada uaidën dada uaid diadpanëdash. 27Cuesanquid yec ampequid daëd ëquë dectambudcuenquin dectantanquin nënantanquio Esus dectampanëdash. 28Icsambocquidbëta dectanendac, quequin Nuquin Papan chiampicpadembi napanëdash.#15.27-28 Isa. 53.12 tantiaquimbien nëid dada uachitanëdash. Aidquio ista. 29Aden dectanac Esus diadsho aid isbidannequin mapi tacuquequin mamënshunquin naden chuipanëdash: Nuquin Papa tabadte shubu dapa chic chictanquin daëdec ushquin chuca uaimbi, quec mibi onquiondac.#15.29 Chotaquën onqueten dada uaid Cuëd. 22.7bëta 109.25 isbanta. 30Nadatiambocquid yec: Nëbi uënëstiapimbo iquebi, quianec mibibi bud, cabidannepanëdash.
31Aden chuinubi adembidi nëish iua cuessunneshun pichicaquidon chuiquidobëtan Moisesën chiampid tantiamequidon naden chuipanëdash: Utsi utsien bëdanmequimbi utsi uënësacsho uincuenmebued yec abibi budtiapimbo iquec, quepanëdash Esus caic. 32Quidistu Nuquin Papan Chomiaid isadaidbon chuiquid tapa nebi, quebued yec mibibi bud. Adec budacsho issun: Quidistu nec. Mesias, quequin tantiendambi, quepanëdash. Aden aidon chuinubi abëta dectanaidon adembidi icsambuen chuishunuapanëdash.
Esus uënësaid
(Mat. 27.45-56; Duc. 23.44-49; Uan 19.28-30)
33Adnubien uëshë cuembo yannuc inchëshpondash. Uëshë cuembo icnuc bedanec uëshë budambi 3 icnuc cuësquec nidaid abichobimbo inchëshquio icpondash. 34Adec uëshë budec 3 yannubien Esus cumapenec cuëdec nadpanëdash: Edoi, Edoi, dama sabactani, quec cun onqueten: ¿Atotsi queshun ubi isenquio icquin niano? Papa, quec adpanëdash.#15.34 Ëndenquimbo Nuquin Papan tantiamiacpadombuen Esus cuëdte Cuëd. 22.1 chuipampic. Chotaquën onqueten Cuëd. 22.1 isbanta.
35Adec cuëdsho tantiash isquido utsi utsiec: Tantia. Nuquin Papan oncamiampid Edias cuënec neque, quecuededpanëdash.
36Adnubien Esus isec nidbuedi badedi titinqueshun uba chinaid mucambocquid nëcushtanquin shapu shapupactsëcquid puntanquin cueste dëdectanshun acmenu, quequin ëccuëscadonequimbi: Isbono. Edias Esus bedec chonoshe, capanëdash.#15.36 Chotaquën onqueten dada uaid Cuëd. 69.21 isbanta. Esusën nate chuimiampicpadombuen sicaid mucambocquid menepanëdash.
37Adnubien cumapenec cuëdtanec Esus uënëspanëdash.
38Adec uënësnubien Nuquin Papa tabadte shubu dapa yacno quënë uaid nuntan dectanaid dashcute dapa ënapen icquid abucuësh budec tembi daëdquio yec canchedbudcuempanëdash.#15.38 Ëndenquimbo Equipito yacnouësh cuenacsho Nuquin Papan adquid dashcute dectante isadaidbo abi tabadte shubu nuntan dectamepampic. Aid isnu, queshun Buan. 26.31-36 ista. Nëish iuaded uënës uatanquin aton intac quënë bëdamboshëcquidën nëish iua cuessunneshun pichicaquid abentsëc puduedshun: Ma Nuquin Papan cun matses bëdambuen isnu. Nëid intac Nuquin Papa yacno daseccanu, quequin napampic. Esusded uënësso issun Nuquin Papan: Ma Esus tantiaquidtedi ubi yacnombo puduednu, quequin aid dashcute canchedbudcuempanëdash. 39Aden bëisec nidnubi Esus cumapenec cuëdec uënësso isash: Abimbo chuiquid niosh. Ma nëid dada Nuquin Papan Madombobi nepayoc, quepanëdash Doma yacnocquid sondadon chuiquid capitan caid.
40Adnubien ambobi uannoshon isec nëidted chidobo tabadpanëdash. Nëidic Madia Macdadena. Nëidic Madia utsi Osen tita. Aidi Ose tsibanquid Santiacon titabidi nepanëdash. Nëidic Sadome. Aidtedshun Esus ancuenquio diadsho isbededpanëdash. 41Aido Esus tsibanshun nidaid Cadidea yacno capusho issun abi nashumbuedo uënësso isec tabadpanëdash. Adecbidi chido utsibo dadpen Edusaden yacno Esusbëd chobuedo Esus uënësso isec tabaduapanëdash.
Esus chococaid
(Mat. 27.57-61; Duc. 23.50-56; Uan 19.38-42)
42Adashic biednes caid uëshë inchëshbudtsëqui: Chonoadtemaid uëshë yaneque. Esus chococatannu, quianec Esus tantiaquid utsi nidpanëdash. 43Aidi isadaidbon chuiquid tapa utsibobëd iccuededquid abentsëc Ose cuëmëdquid shubu dadpen icquid Adimatea caid yacnoshon tishaid yec: Ubi uënësabicnubi ma Nuquin Papan abitedishun Icbo icquin ambi namiacnoshon chomiaidën abitedi namete iquec, quequin cainquid yec dacuëdenquio iquec Pidato chiec nidpanëdash. Adec nidshun: Esusën dada bedshun chococate bunebique. ¿Ada ubi buanme? 44caquien: ¿Badedquioda uënëspash? quequin tantiaquin sondadon chuiquid capitan caid chomeshun Pidaton: ¿Ada Esus uënësaccosh? capanëdash.
45Adoac sondadon chuiquidën: Ai. Uënësaccosh, quesho tantiashun: Ai, bedshun buanta, capanëdash Pidaton Ose chuiquin.
46Adoac nidshun Osen piucquid menequin uënësaid chococanun dabidicate dashcute cuëshë bëdamboshëcquid bedshun Esusën dada imbudshun dataneshun buampanëdash. Adoshombic macuësh tapa cuënote shëcuë uaquin ambi ënden nacnenmiaidën nauedshun cuënote dapan bëtashpanëdash. 47Aden Esus chococasho Madia Macdadenabëtan Madia utsi Osen titan ispanëdash.
Currently Selected:
Madcos 15: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.