Marcos 15
15
Pilatos tỹ Jesus mré vĩ
(Mt 27.1-2, 11-14; Lc 23.1-5; Jo 18.28-38)
1Tỹ vaj kỹ vẽnh jyvẽn tĩ kar ẽn ag tóg kusãg ki Jesus to jykrén mũ jagnẽ mré, Topẽ tũ to pã'i ag, kófa ag mré hã, Topẽ vĩ to ẽg kanhrãn tĩ ag mré hã ke gé. Kỹ ag tóg ti mrĩnh kỹ ti pére mũ mũ, Pilatos mỹ ti fẽg jé. 2Kỹ tóg ti mỹ: “ã mỹ tỹ Judeu ag pã'i nĩ'?“ he mũ. Kỹ tóg: “ki hã ã tóg tó mũ,” he mũ.
3Hã ra Topẽ tũ to pã'i ag tóg ti kato vĩ tỹ hẽn ri ke han mũ sir. 4Kỹ tóg ti mỹ ke mãn mũ. “Mỹ ã tỹ ag mỹ nén ũ tó jãvãnh? Ha mẽ, ã to ag tóg vĩ kónãn mũ,” he tóg. 5Hã ra tóg vĩ mãn tũ nĩ, kỹ tóg Pilatos mỹ e tĩ sir.
Ag tỹ Jesus to: “ter jé tóg ke mũ,” he
(Mt 27.15-26; Lc 23.13-25; Jo 18.39–19.16)
6Hã ra Pilatos tóg ag mỹ vẽse ag kã ũn pir kavãg tĩ, fénhta tỹ Páscoa kar ki. Ag tỹ ũ to vĩ mũ ẽn kavãg tóg tĩ. Ti jykre vẽ. 7Hã ra ũ tóg se kỹ nĩ, ti jijin hã vỹ: Barrabás, he mũ. Vẽnh génh kutẽm tĩ ag mré tóg se kỹ jẽ nĩ. Vẽnh génh kỹ ag tóg ũ kãgtén ja nĩgtĩ, hã kỹ ag tóg sigse kỹ nỹtĩ. 8Kỹ vẽnh e ẽn ag tóg Pilatos to mũ mũ sir, ti mỹ: “ẽg mỹ ã tỹ nén han tĩ ẽn han nĩ,” he jé.
9Kỹ tóg ag mỹ: “mỹ sỹ Judeu ag pã'i kavãn há?“ he mũ. 10Pã'i ag tóg Jesus to jũ nỹtĩ, hã kỹ ag tóg nén ũ tũ to ti se ja nĩ. Hã ra Pilatos tóg ki kanhró nĩ, hã kỹ tóg ti kavãn sór mũ. 11Hã ra pã'i ag tóg vẽnh kar krĩn ja nĩ, ag tỹ ti mỹ: “Barrabás hã kava ra,” he jé.
12Kỹ Pilatos tóg ag mỹ: “kỹ inh ãjag tỹ ũ to: Judeu ag pã'i, he mũ ẽn tỹ hẽ ri kenh mũ?“ he mũ. 13Kỹ ag tóg prẽnprẽr mũ sir. “!..Krunh to ti sã..!“ he ag tóg mũ sir, prẽnprẽr kỹ.
14Kỹ tóg ag mỹ: “hẽ ri ken kỹ? Ti kórég tỹ ne han ti?“ he mũ. Hã ra ag tóg prẽr mãn', prẽr mãn' he mũ sir. “!..Krunh to ti sã..!“ he ag tóg, prẽnprẽr kỹ.
15Kỹ tóg ag mỹ Barrabás kavãg mũ sir. Jesus mrãnmrãn tóg mũ sir, mrãn ke jafã tỹ, kỹ tóg ag mỹ ti fẽg mũ sir, ag tỹ ka to ti sa jé.
Soldado ag tỹ Jesus vóg kónãn
(Mt 27.27-31; Jo 19.2-3)
16Kỹ soldado ag tóg pã'i mág ĩn kã ra ti pére ge mũ sir, ag vẽnh jyvẽn jafã ẽn kã ra. Kỹ ag tóg soldado kar ag jé prẽr mũ sir. 17Ti kri ag tóg kur kusũg fón mũ. Kỹ ag tóg sónh pirĩn kỹ tỹ ti krĩ tógfĩg mũ sir. 18Kỹ ag tóg ti nyg kỹ ti mỹ: “viva, Judeu ag pã'i,” he mũ sir. 19Kỹ ag tóg vãn tỹ ti krĩ mĩ mrãnmrãn mũ sir. Ti to ag tóg sugsug mũ sir. Kỹ ag tóg ti jo grĩnhgrĩnh ke mũ sir, ag tỹ ón kỹ ti to: “ẽg Senhor,” hen kỹ. 20Ag tỹ ti nyg kar ag tóg ti ki kur kusũg ẽn kunũnh kỹ ti kur pẽ tỹ ti kã ra rãg kỹ ti pére mũ mũ, ag tỹ krunh to ti sa jé.
Jesus tỹ krunh to sa
(Mt 27.32-34; Lc 23.26-43; Jo 19.17-27)
21Hã ra ũ tóg vãnh kã tákãtĩ mũ, ti jiji hã vỹ: Cirene tá Simão, he mũ. Ti krẽ ag vỹ tỹ Alexandre mré Rufo nỹtĩ. Ẽn mỹ ag tóg vĩ tar han mũ, ti tỹ Jesus krunh vỹn jé.
22Kỹ ag tóg ti mré Gólgota tá junjun mũ sir. Gólgota to ken hã vẽ, hã vỹ: vẽnh krĩ kuka, he mũ. 23Kỹ ag tóg ti mỹ vinho ven mũ, ka tỹ mirra jẽnjo mré, hã ra tóg kron jãvãnh nĩ, vẽnh kagta ti. 24Kỹ ag tóg krunh to ti sãg mũ sir. Ti kur tỹ ag tóg jagnẽ mỹ vẽnh kãpãm mũ sir, to joga hen kỹ. 25Kusã ki 9 óra vẽ sir.
26Ag tỹ nén tỹ ti kato vĩ mũ vỹ ti kri rán kỹ sa, hã vỹ: “Judeu ag pã'i mág vẽ,” he mũ. Ti tỹ nẽji vẽsỹ pã'i mág han mũ to ag tóg ti tén mũ. 27Ti kóm ag tóg krunh to bandido régre ag sãg mũ gé, Ũ vỹ ti pẽgja tá sa, jó ũ vỹ ti jakãnh tá sa. 28Hã kỹ Jesus tóg nén tỹ ti to rán kỹ nĩ ẽn vé, hã vỹ: “ag mỹ tóg tỹ ũn jykre pãno ag mré ke nĩ,” he mũ, Topẽ vĩ rán ki.
29Kỹ ũ tỹ mĩ mũ mũ ag tóg ti nyg' he mũ gé, vỹn vỹn he kỹ. “Ó', ã ne tóg: Topẽ ĩn kókén jé sóg ke mũ, he gé',” he ag tóg. “Kurã tãgtũ ki sóg ũ han mũ, he ã tóg mũ gé'. 30Vẽnh kren han ra kema'. Krunh to kãtére kema',” he ag tóg, ti to é he kỹ.
31Kỹ Topẽ tũ to pã'i ag tóg ti nyg mũ gé. Jagnẽ mỹ ag tóg: “ũ krenkren han tóg, hã ra tóg vẽnh hã kren han ki kagtĩg nĩ,” he mũ. 32“Cristo jé krunh to kãtére kema', Judeu ag pã'i ti, ẽg tỹ ve jé, ẽg tỹ ti vĩ kri nĩm jé,” he ag tóg. Kỹ ti kóm krunh to nỹtĩ ẽn ag tóg, ti nyg mũ gé.
Jesus ter
(Mt 27.45-56; Lc 23.44-49; Jo 19.28-30)
33Rã tỹ ẽg nĩno kã sa ra tóg kuty' he mũ sir, ga kar mĩ hã. Kỹ kuty ẽn tóg óra tãgtũ tũg mũ. 343 óra ki Jesus tóg prẽr mũ sir, jamã há ra, kỹ tóg: “Eloí, Eloí, lemá sabactani?“ he mũ. Ẽg vĩ ki ẽg tóg tag to: “Topẽ, Topẽ, ã tỹ ne jé isovãnh nẽ?“ he mũ.
35Kỹ tá nỹtĩ ũ ag tóg ti vĩ tag mẽ kỹ jagnẽ mỹ: “ha vé, Elias jé tóg prẽr mũ,” he mũ. 36Kỹ ũ tóg vẽnhvãg tĩ mũ. Kỹ tóg ka jurỹn kỹ tỹ esponja kusón kỹ vinho kã ra rãg mũ sir. Kỹ tóg ti mỹ ven mũ sir, ti tỹ ki ũnh' ũnh' he jé. “Toreg',” he tóg. “Hẽn ri ke mũn Elias kãtĩg mũ, ti kãtérem jé,” he tóg, ag mỹ.
37Hã ra Jesus tóg prẽr mág pẽ han kỹ hun ke mũ sir. 38Kỹ Topẽ ĩn krẽm kur tỹ jãnkã nĩfe tóg jaran ke mũ. Hã tóg vẽnh kãkym ke kãn mũ sir.
39Hã ra capitão tóg ti vég jẽ nĩ. Ti prẽr mẽg tóg mũ. Ti tỹ hun ke ẽn vég tóg mũ. Kỹ tóg: “vẽnh vĩ há ja vẽ,” he mũ. “Topẽ kósin ja vẽ“ he tóg.
40Kỹ ũn tỹtá fag tóg tá nỹtĩ gé. Kuvar há tá nỹtĩ kỹ fag tóg ti vég nỹtĩ nĩ. Fag kã ũ fi vỹ tỹ Maria Madalena fi nĩ, kỹ ũ fi tóg tỹ Salomé fi nĩ gé, kỹ ũ fi tóg tỹ Maria fi nĩ gé, José mré Tiago sĩ mỹnh tag fi. 41Ũn tỹtá ẽn fag tóg ti nón mũ ja nĩgtĩ, ti tỹ Galiléia tá tĩ mũn kã. Tá fag tóg ti ki rĩr ja nĩgtĩ gé. Kỹ ũn tỹtá tỹ hẽn ri ke fag tóg ti vég nỹtĩ gé, ti tỹ krunh to sa kỹ, ti mré Jerusalém ra mũ ja ẽn fag.
Ag tỹ vẽnh kej tá ti fi
(Mt 27.57-61; Lc 23.50-56; Jo 19.38-42)
42Rãké tóg nỹ ha, vẽnh kán ke kurã to hã. 43Hã kỹ Arimatéia tá José tóg Pilatos mỹ Jesus fár to vĩ mũ. Tỹ tóg vẽnh jyvẽn tĩ ag kã ũ nĩ. Jykre kuryj tóg nĩ. Topẽ tỹ tỹ ẽg pã'i nĩ ve sór tóg tĩ gé. Ẽn hã vỹ mũmẽg vãnh nĩ kỹ ti fár to vĩ mũ.
44Kỹ tóg: “kỹ ti mỹ ter huri'?“ he mũ. Kỹ tóg capitão jé prẽr kỹ ti ki jẽmẽg mũ. 45Kỹ tóg: “hỹ, ter ti huri,” he mũ. Kỹ tóg José mỹ ti fár ti fig mũ sir.
46Kỹ tóg kur kupri kaja e kym mũ. Kỹ tóg ti kãtérem mũ. Kur ẽn tỹ tóg ti pãg mũ. Kỹ tóg vẽnh kej kã táti finh tĩ mũ sir, ag tỹ pãró nor han ja kã kã. Kỹ tóg pó tỹ ti jy nĩfénh mũ sir. 47Hã ra Maria Madalena fi tóg vég mũ, Maria tỹ José mỹnh fi ke gé.
Currently Selected:
Marcos 15: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido