Marcos 14
14
Ag tỹ Jesus tén sór
(Mt 26.1-5; Lc 22.1-2; Jo 11.45-53)
1Hã ra fénhta tỹ Páscoa kã tákurã tãgtũ vẽ sir, ẽmĩ jãgja tũ konh ke kã tá. Kỹ Topẽ tũ ki rĩr tĩ ag tóg, Jesus vatánh tá ti se sór mũ, ti tén jé. 2Hã ra ag tóg: “fénhta tag to ẽg tóg mẽnh ke mũ ver,” he mũ. “Ẽg tỹ fénhta kã ti se kỹ vẽnh génh mág hỹn kutẽnh mũ, ha vem nĩ,” he ag tóg.
Maria fi tỹ Jesus gãnh tãg
(Mt 26.6-13; Jo 12.1-8)
3Ẽn kã tóg kejẽn ẽmã tỹ Betânia tá nĩ nĩ, Simão ĩn krẽm, vẽnh kaga tỹ lepra han ja ẽn ĩn krẽm. Ti jẽg nĩ ra ũ fi tóg tá jun mũ, garrafa vyn kỹ. Pó tỹ alabastro tỹ tóg há jẽ, garrafa ti. Ti ki jẽ vỹ tỹ nén ger há nĩ, hã vỹ: nardo, he mũ. Ũn kaja e pẽ vẽ. Garrafa ẽn nunh mranh kỹ fi tóg ti ki jẽ ẽn tỹ Jesus gãnh tãg mũ sir.
4Hã ra ũ tỹ tá nỹtĩ ag kã ũ ag tóg jagnẽ mỹ: “fi tỹ ne jé nén kaja e tag kókén nẽ? 5Ẽg tỹ nén ger há tag fón ke vẽ vẽ, kaja mág to. Ẽg tỹ ũn jagtar ag mỹ vin ke vẽ vẽ,” he mũ. Kỹ ag tóg fi mỹ vĩ tar han mũ.
6Hã ra Jesus tóg ag mỹ: “fi mỹ vĩ tũg! Ãjag tỹ ne jé fi fe kaj han nẽ? Nén ũ há han fi tóg,” he mũ. 7“Ãjag mré sóg nĩg sĩ han mũ, jãvo ũn jagtar ag vỹ ãjag mré nỹtĩg mág han mũ. Isĩg kar kỹ ag mỹ nĩm nĩ, ãjag tỹ ag mỹ nén nĩm ke mũ ti,” he tóg. 8“Fi tỹ nén han sór mũ han fi tóg huri. Inh kãn fi tóg huri, vẽnh kej tá inh fón ke to. 9Ag tỹ vẽnh vĩ sér tugtó kỹ ag tóg fi tỹ nén han mũ tag tónh ke mũ gé, kỹ vẽnh kar vỹ fi tỹ nén han mũ tag mẽgmẽnh mũ sir, ha vem nĩ. Ki hã sóg tó mũ,” he tóg.
Ag tỹ Jesus vatánh tá ti kãgmĩnh ke to jykrén
(Mt 26.14-16; Lc 22.3-6)
10Kar kỹ Judas Iscariotes tóg tĩ mũ, Topẽ tũ ki rĩr tĩ ag mré Jesus to jykrén jé, ũ tỹ 12 (ke) ag kã ũ vẽ, 11Ag tỹ ti vĩ mẽ kỹ tóg ag mỹ sér tĩ sir. “Ã mỹ ẽg tóg jãnkamy vin mũ,” he ag tóg ti mỹ. Kỹ tóg to jykrén kỹ: “inh hỹn hẽ ri kenh mũ, ag tỹ ti kãgmĩ jé?“ he mũ.
Ag tỹ Páscoa ko mũ
(Mt 26.17-25; Lc 22.7-14, 21-23; Jo 13.21-30)
12Ẽmĩ jãgja tũ konh ke kurã ve vẽ sir, mé sĩ tãnh ke kurã vẽ sir, Páscoa kã. Kỹ ti mré mũ tĩ ag tóg Jesus mỹ: “ẽg hỹn hẽ tá ã mỹ carneiro sĩ tãnh mũ, ẽg tỹ kon jé?“ he mũ. 13Kỹ tóg ũn régre ag mỹ: “ha ẽmã mág ra mũjẽg. Tá ãjag tóg ũ tỹ goj vyn kỹ tĩ venh ke mũ. Ẽn nón mũm nĩ,” he mũ. 14“Ti tỹ ĩn kã ra rã kỹ ĩn tãn ẽn mỹ: ẽg Senhor vỹ ã mỹ vẽnh vĩ jẽnẽg mũ. Ti tỹ ã ĩn krẽm Páscoa konh há tóg tĩ, ti mré mũ tĩ ag mré, hem nĩ ti mỹ,” he tóg. 15“Kỹ tóg ãjag mỹ, krogrog tỹ kynhmỹ nỹ ven ke mũ. Éhé ti nĩ. Tá nén kar vỹ kynkar kỹ nỹtĩ. Nĩgja vỹ tá nỹtĩ gé. Tá ẽg jo han nĩ,” he tóg.
16Kỹ ag tóg mũ mũ sir, ẽmã mág ra, kỹ ag tóg sir vég mũ,. Kỹ ag tóg vẽjẽn kãn mũ sir.
17Rã pur ja ra Jesus tóg ũ tỹ 12 (ke) ag mré tá jun mũ sir. 18Ag jẽn kỹ tóg ag mỹ: “ãjag kã ũ tóg inh vatánh tá inh kato vãsãnsãn mũ ag mỹ inh ven ke mũ,” he mũ. “Inh mré jẽg mũ ũ vẽ, ki hã sóg tó mũ,” he tóg. 19Kỹ tóg ag fe kaj tĩ sir. Ti mỹ ag tóg: “inh mỹ vó'? Inh mỹ vó'?“ he kãn mũ. 20Hã ra tóg ag mỹ: “ãjag kã ũ vẽ. Inh mré ẽmĩ tỹ pénky kã ki kã punpun mũ ẽn vẽ mỹr. 21Ter jé sóg ke mũ, isỹ tỹ ẽprã ke fi kósin nĩn kỹ. Hã kỹ iser ke vỹ rán kỹ nĩ, vãsỹ. Hã ra tóg ũ tỹ pã'i ag mỹ inh ven ke mũ ẽn mỹ vĩ kónãn tãvĩ han ke mũ. Ti mur tũ nĩ ran há tĩ vẽ,” he tóg.
Santa Ceia
(Mt 26.26-30; Lc 22.15-20; 1 Co 11.23-25)
22Ag tỹ ver jẽg nỹtĩ ra Jesus tóg ẽmĩ mãg mũ. To tóg Topẽ mré vĩ mũ sir. Kỹ tóg vẽnh kã kupãn kỹ ti mré mũ ti ag mỹ: “té, ha kó,” he mũ. “Inh hã vẽ,” he tóg, ẽmĩ to.
23Kar kỹ tóg kópa vãg mũ gé sir. Uva mé tỹ ki jẽ ẽn to tóg Topẽ mré vĩ mũ gé sir. Kỹ ũn pir tóg kã kron' kron' he kãn mũ sir. 24Kỹ tóg ag mỹ: “inh kyvénh hã vẽ. Vẽnh kar jagfy tóg inh ki kã kutẽnh ke mũ. Topẽ vỹ vẽnh kar to há nĩ sór mũ, inh kyvénh tugrĩn,” he mũ. 25“Ha mẽ, inh pijé vinho kron mãn mũ ha'. Topẽ tỹ tỹ ẽg pã'i nĩ ẽn kã sóg kejẽn kron mãn mũ,” he tóg.
26Ag jẽn kar kỹ ag tóg Topẽ mỹ jãn mũ sir. Jãn kar kỹ ag tóg sir krĩ tỹ Oliveiras ra mũ mũ.
Jesus tỹ Pedro mỹ tó
(Mt 26.31-35; Lc 22.31-34; Jo 13.36-38)
27Kỹ tóg ag mỹ: “ãjag kar vỹ inh ré kỹ mũ kãn ke mũ,” he mũ. “Hã kỹ tóg rán kỹ nĩ, hã mẽ. “Ũ tỹ carneiro ki rĩr tĩ ẽn tãnh jé sóg ke mũ, kỹ ti mẽg vỹ krig ke kãn ke mũ,” he tóg, iso, Topẽ ti, ti vĩ rá ki. Hã ve jé ãjag tóg ke mũ. 28Hã ra sóg iser kar kỹ rĩr mãn ke mũ. Ẽn kã sóg ãjag jo tĩg ke mũ, ga tỹ Galiléia ra,” he tóg.
29Kỹ Pedro tóg ti mỹ: “ag kar tỹ ã ré kỹ mũ mũ ra isóg ã ré kỹ tĩg ke tũ nĩ,” he mũ. 30Hã ra Jesus tóg ti mỹ: “ha vé, ũri, kuty tag kã ã tóg iso: ti ki kagtĩg sóg nĩ, he tãgtũ han ke mũ, galo kyr régre han ke to hã. Ki hã sóg tó mũ,” he mũ.
31Hã ra Pedro tóg vĩ tar han mũ. “Sỹ ã mré ter sór kỹ sóg ã to: ti ki kagtĩg sóg nĩ, henh ke tũ pẽ nĩ,” he tóg. Kỹ ti mré mũ tĩ ag tóg hã tó kãn mũ gé sir.
Getsêmani tá
(Mt 26.36-46; Lc 22.39-46)
32Kỹ ag tóg ka kré ra mũ mũ sir. Ka kré ẽn jijin hã vỹ: Getsêmani, he mũ. Kỹ tóg ti mré mũ tĩ ag mỹ: “nĩgnĩ ra ver, tag ki. Sỹ ver Topẽ mré vẽmén ke vẽ,” he mũ. 33Kỹ tóg Pedro, Tiago, João ag mỹ: “inh mré kãmũ jẽg,” he mũ. Vãhã tóg ti mỹ e tĩ, fe kaj han tóg mũ sir,. 34Kỹ tóg ag mỹ: “inh fe kaj mág tóg tĩ, kỹ tóg inh mỹ tỹ iser ri ke nĩ. Tag ki nỹtĩm nĩ, nũgnũr tũg nĩ,” he mũ. 35Kỹ tóg tĩg sĩ han mãn kỹ mũg ke mũ. Ga kri tóg nỹ mũ sir. Ti jóg mré tóg vĩ mũ sir, “isỹ hẽn ri ke mũn nén venh ke mũ ẽn vég tũ nĩ jé, óra ẽn ki,” he tóg. 36Kỹ tóg: “Aba', panh', nén kar han ki kanhró ã tóg nĩ. Kỹ tóg inh mỹ ã tỹ inh jagtar ke tag tỹ tũ' henh há tóg tĩ vẽ. Hã ra isỹ ã mỹ nén to vĩ mũ tag han tũg nĩ, ã tỹ nén han ke mũ ẽn hã han nĩ,” he mũ. 37Kỹ tóg ti mré mũ tĩ ag venh tĩ mũ, hã ra ag tóg nũgnũr ja nĩ, kỹ tóg Pedro mỹ: “Simão, ã mỹ nũr'? Mỹ ã tỹ óra pir ki nũr tũg jé hẽ ri ke?“ he mũ. 38“Nũr tũg nĩ! Topẽ mré vĩm nĩ, ãjag tỹ ti vĩ mranh tũ nĩ jé, ũ tỹ ãjag kutãn mũ ra. Ãjag tỹ mranh sór tũ vẽ vẽ, hã ra ãjag tóg krój nỹtĩ,” he tóg.
39Kỹ tóg tĩg mãn mũ sir, Topẽ mré vĩ mãn jé. Ti vĩ ẽn hã tó mãn tóg mũ. Kar tóg vỹn ke mũ. 40Kỹ tóg ag tá jun mãn mũ gé sir. Hã ra ag tóg nũgnũr mãn nỹtĩnĩ, ag kanẽ krój nỹtĩn kỹ. Hã kỹ ag tỹ ti mỹ ne tónh ke tóg tũ tĩ. 41Kỹ tóg tá jun tãgtũ han mãn mũ. Kỹ tóg ag mỹ: “ãjag ne tóg nũgnũr ja nĩ'. Vẽnhkán ja ãjag tóg nĩ,” he mũ. “Pétẽm ti huri, óra ti. Ũ tỹ Topẽ vĩ mranh tĩ ag tỹ isenh ke nẽ ha. Tỹ sóg ẽprã ke fi kósin nĩ mỹr. 42Nĩgnĩ ra, ag kato mũ jé ha. Ũ tỹ ag mỹ inh ven mũ tóg kãtĩ ha,” he tóg.
Ag tỹ Jesus se
(Mt 26.47-56; Lc 22.47-53; Jo 18.3-12)
43 Jesus tỹ ver vẽmén jẽ ra Judas Iscariotes tóg jun mũ sir. Ũ tỹ 12 (ke) ag kã ũ vẽ, Ti mré porisa ag tóg kãmũ mũ gé, rógro génh kỹ, ka kykyv génh kỹ ke gé. Topẽ tũ to pã'i ag vỹ ag jẽgnẽ, Topẽ vĩ to ẽg kanhrãn tĩ ag ke gé, kófa ag ke gé. 44Ũ tỹ ag mỹ Jesus ven mũ ẽn vỹ ag mỹ vẽjykre nĩm ja nĩ. “Sỹ ũn ki nhun ke mũ ẽn hã sem nĩ. Ẽn hã pére mũm nĩ,” he ja tóg nĩ. 45Ti tỹ tá jun kỹ tóg vẽsỹmér Jesus to grẽn ke kỹ ti mỹ: “Senhor,” he mũ. Kỹ tóg ti ki nhun ke mũ sir, ón kỹ.
46Kỹ ag tóg ti kãgmĩ kỹ ti ség mũ sir. 47Ti mré tĩ tĩ ũ tóg rógro kunũnh kỹ porisa ũ nĩgrẽg kym mũ sir. Topẽ tũ to pã'i mág mỹ rãnhrãj tĩ vẽ, ti tỹ ũn nĩgrẽg kym mũ ẽn ti.
48Hã ra Jesus tóg ag mỹ: “ãjag ne tóg rógro génh kỹ kãmũ mũ', ka kykyv génh kỹ ke gé'. Inh pijé tỹ bandido nĩ'. 49Kurã kar ki sóg ãjag mré jẽ ja nĩgtĩ, mỹr, Topẽ ĩn krẽm, vẽnh kar kanhrãn kỹ. Hã ra ãjag tóg tá iség tũ nĩ vẽ mỹr. Hã ra vãsỹ iso nén rán kỹ nĩ ẽn hỹn,” he tóg.
50Kỹ ti mré mũ tĩ ag tóg ti ré kỹ pétẽ kãn mũ, vẽnh pigju jé, mỹr, ha mẽ.
51Hã ra kyrũ ũ tóg ti nón tĩ mũ. Vẽnh kãtor tãvĩ ti nĩ. Ti kãgmĩg ag tóg mũ gé. 52Kỹ tóg ti mũmẽg kỹ ti kur ré kỹ vẽnhvãg mũ, ti kator ra.
Pã'i tỹ Jesus mré vĩ
(Mt 26.57-68; Lc 22.54-55, 63-71; Jo 18.13-14, 19-24)
53Kỹ ag tóg Jesus pére mũ mũ, Topẽ tũ to pã'i ĩn ra. Tá Topẽ tũ ki rĩr tĩ ag tóg kófa ag mré vẽnhmãn kỹ nỹtĩ, Topẽ vĩ to ẽg kanhrãn tĩ ag ke gé.
54Hã ra Pedro tóg Jesus nón kãtĩ mũ, kuvar há tá. Kỹ tóg Topẽ tũ to pã'i ĩn vãso ra rã mũ. Kỹ tóg tá porisa ag mré pĩ to tón nĩ nĩ.
55Kỹ Topẽ tũ to pã'i ag tóg, vẽnh jyvẽn tĩ kar ag mré, ũ tỹ ón kỹ Jesus jykre kórég tónh ke mũ jãvãnhvãnh mũ. Ag vĩ tugrĩn ag tóg Jesus tén sór mũ. Hã ra tóg ag mỹ ki krov tũ nĩ. 56Ũ tỹ hẽn ri ke ag tóg ón kỹ Jesus jykre kórég tó mũ, hã ra tóg ag mỹ ki krov tũ pẽ nĩ sir, ag tỹ vẽjykre ũ tó', vẽjykre ũ tó' he mũ ra.
57Kỹ ũ ag tóg vãhã ón kỹ ti jykre kórég ũ kãmén mũ sir. 58“Ti tỹ tó mẽ ẽg,” he ag tóg. “Topẽ ĩn tag kókén jé sóg ke mũ, vẽnh nĩgé tỹ há tag ti, he ja tóg nĩ, hã ra sóg kurã tãgtũ ki ũ han mãn ke mũ. Ẽg tỹ ẽg nĩgé tỹ han vãnh ẽn han jé sóg ke mũ, he ja tóg nĩ,” he ag tóg. 59Ge ra tóg ag mỹ ki krov tũ nĩ. Ti jykre kórég ẽn vég tũ ag tóg nĩ.
60Kỹ Topẽ tũ to pã'i mág tóg jẽgnẽ kỹ ag kuju kã jẽ kỹ Jesus mỹ: “Ã tỹ ne tónh ke mỹ tũ? Ag hã ne tóg ã vĩ kónãn tag tó mũ',” he mũ. 61Hã ra tóg hun ke kỹ jẽ nĩ, nén ũ tó mẽ kã. Kỹ pã'i mág ẽn tóg ti mỹ: “ã mỹ tỹ Cristo nĩ'? Ã mỹ tỹ Topẽ kósin nĩ'?” he mãn mũ.
62Kỹ Jesus tóg ti mỹ: “hỹ, inh hã vẽ,” he mũ. “Ẽprã ke fi kósin ẽn vỹ tỹ inh nĩ. Inh ve jé ãjag tóg ke mũ ha. Ũ tỹ nén kar han mũ ẽn pẽgja tá sóg nĩnh ke mũ. Kanhkã góg kã mĩ sóg kãtérenh ke mũ gé,” he tóg.
63Kỹ pã'i mág ẽn tóg ti kur tỹ jaran' ke mũ sir, jũ kỹ. Kỹ tóg: “ũ tỹ ti jykre kórég tónh ke ũ jãvãnh mãn ke tũ ẽg nĩ ha,” he mũ. 64“Ti tỹ Topẽ kato vĩ kónãn tag mẽ ẽg huri. Ẽg hỹn ti tỹ hẽ ri kenh mũ ha?“ he tóg.
Kỹ ag kar ẽn tóg: “ter jé tóg ke mũ, ti vĩ tag tugrĩn,” he mũ.
65Kỹ ũ ag tóg ti to sugsug mũ sir. Ti kanẽ pãg ag tóg mũ gé sir, kỹ ag tóg ti tãnh kỹ ti mỹ: “ũ nỹ ã tãnh?“ he mũ. Kar kỹ porisa ag tóg ti kakã ki tãnh mũ gé sir.
Pedro tỹ Jesus to ón
(Mt 26.69-75; Lc 22.56-62; Jo 18.15-18, 25-27)
66Hã ra Pedro tóg ver ĩn vãso kã nĩ nĩ, kỹ Topẽ tũ to pã'i mág mỹ rãnhrãj tĩ fag kã ũn pir fi tóg ti to kãtĩ mũ. 67Kỹ fi tóg ti tỹ pĩ to tón nĩ ra ti vég mũ sir. Kỹ fi tóg ti mỹ: “Jesus mré tĩ tĩ ũ vỹ tỹ ã nĩ, Nazaré tá ke ẽn mré,” he mũ.
68Hã ra Pedro tóg: “vó, inh pijé ti ki kanhró nĩ'. Ã tỹ ne tó nẽ'?“ he mũ. Kỹ tóg ĩn jãnkã ra tĩg kỹ ra rã sór mũ sir. Hã ra galo tóg kyr mũ.
69Hã ra fi tóg tá ti ve mãn mũ gé. Kỹ fi tóg tá nỹtĩ ag mỹ: “jẽ ẽn tóg tỹ ag kã ũ jẽ gé,” he mãn mũ.
70Hã ra tóg: “vó',” he mãn mũ. Kar kỹ tá nỹtĩ ag tóg Pedro mỹ: “ã hỹn tỹ ag kã ũ nĩ. Ã vĩ vỹ Galiléia tá ke ag vĩ ri ke nĩ,” he mũ gé.
71Hã ra Pedro tóg ag mỹ: “ãjag tỹ nén tó mũ ẽn ki sóg kagtĩg nĩ mỹr. Inh ón kỹ Topẽ tóg inh vóg kónãn ke mũ, hã kỹ sóg ón ke tũ pẽ nĩ,” he mũ.
72Hã ra vẽsỹmér galo tóg kyr mãn mũ. Kỹ Pedro tóg Jesus vĩ ja to jykrén mũ sir, ti tỹ ti mỹ: “iso ã tóg: ti ki kagtĩg sóg nĩ, he tãgtũ han ke mũ, galo kyr régre han ke to hã,” he ja ẽn mĩ. Vãhã tóg ti mỹ e tĩ. Kỹ tóg vẽnh péju kỹ nĩ kỹ fỹ jagy han mũ sir.
Currently Selected:
Marcos 14: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido