Romanos 16
16
Laj Pablo naxtakla xsahileb xchꞌo̱l
1Nacuaj tinye e̱re nak li kaherma̱n lix Febe, aꞌan tzꞌakal aj pa̱banel ut aꞌan aj tenkꞌanel saꞌ li iglesia li cuan aran Cencrea. 2Ut nak ta̱cuulak aran e̱riqꞌuin, checꞌulak aꞌan saꞌ xcꞌabaꞌ li Ka̱cuaꞌ joꞌ xcꞌulubeb laj pa̱banel. Ut chetenkꞌahak riqꞌuin cꞌaꞌak re ru ta̱raj cuiꞌ tenkꞌa̱c xban nak ac xtenkꞌaheb ajcuiꞌ nabal li herma̱n ut xinixtenkꞌa ajcuiꞌ la̱in. 3Cheqꞌuehak xsahil xchꞌo̱l laj Aquila ut lix Priscila, eb li cuech aj cꞌanjelil saꞌ xcꞌabaꞌ li Jesucristo. 4Usta xiu xiu chokꞌ reheb xcolbal rix lin yuꞌam, aban queꞌxqꞌue xchꞌo̱leb chintenkꞌanquil. Ninbantioxi chiruheb. Ma̱cuaꞌ caꞌaj cuiꞌ la̱in ninbantioxin chiruheb. Nequeꞌbantioxin aj ban cuiꞌ laj pa̱banel li ma̱cuaꞌeb aj judío. 5Cheqꞌue ajcuiꞌ xsahil xchꞌo̱leb li herma̱n li nequeꞌxchꞌutub rib saꞌ li rochoch laj Aquila ut lix Priscila. Cheqꞌue xsahil xchꞌo̱l laj Epeneto, li raro inban. Aꞌan li xbe̱n li quixpa̱b li Jesucristo aran Acaya. 6Cheqꞌue xsahil xchꞌo̱l lix María. Aꞌan kꞌaxal nacꞌanjelac saꞌ e̱ya̱nk la̱ex. 7Cheqꞌue xsahil xchꞌo̱leb laj Andrónico ut laj Junias. Aꞌaneb aj judío joꞌ la̱in. Cuochbeneb nak cocuan chi pre̱xil. Naꞌno ruheb xbaneb li apóstol. Eb aꞌan queꞌxpa̱b chak li Cristo nak toj ma̱jiꞌ ninpa̱ban la̱in. 8Cheqꞌue xsahil xchꞌo̱l laj Amplias. Aꞌan ninra ajcuiꞌ saꞌ xcꞌabaꞌ li Ka̱cuaꞌ. 9Ut cheqꞌue xsahil xchꞌo̱l laj Urbano li kech aj cꞌanjelil saꞌ xcꞌabaꞌ li Cristo, ut laj Estaquis li ninra. 10Cheqꞌue xsahil xchꞌo̱l laj Apeles. Aꞌan incꞌaꞌ quichꞌinan xchꞌo̱l saꞌ lix pa̱ba̱l nak quiyaleꞌ ra̱lenquil. Ut cheqꞌue xsahil xchꞌo̱leb li cuanqueb saꞌ rochoch laj Aristóbulo. 11Cheqꞌue xsahil xchꞌo̱l laj Herodión. Aꞌan cuech tenamitil xban nak aꞌan aj judío ajcuiꞌ. Ut cheqꞌue ajcuiꞌ xsahil xchꞌo̱leb li cuanqueb saꞌ rochoch laj Narciso li ac xeꞌpa̱ban. 12Cheqꞌue xsahil xchꞌo̱leb lix Trifena ut lix Trifosa li yo̱queb chi cꞌanjelac saꞌ xcꞌabaꞌ li Ka̱cuaꞌ. Ut cheqꞌue xsahil xchꞌo̱l lix Pérsida, li nakara saꞌ xcꞌabaꞌ li Cristo xban nak aꞌan naxqꞌue xchꞌo̱l chi cꞌanjelac chiru li Dios. 13Cheqꞌue xsahil xchꞌo̱l laj Rufo, li sicꞌbil ru chi cꞌanjelac chiru li Ka̱cuaꞌ, ut cheqꞌue xsahil xchꞌo̱l lix naꞌ. Aꞌan chanchan ajcuiꞌ innaꞌ chicuu la̱in. 14Cheqꞌue xsahil xchꞌo̱l laj Asíncrito, laj Flegonte, laj Hermas, laj Patrobas, laj Hermes, joꞌqueb ajcuiꞌ chixjunileb laj pa̱banel, li nequeꞌxchꞌutub rib riqꞌuineb chi xlokꞌoninquil li Dios. 15Cheqꞌue xsahil xchꞌo̱l laj Filólogo ut lix Julia, laj Nereo ut li ranab. Ut cheqꞌue xsahil xchꞌo̱l laj Olimpas joꞌ eb ajcuiꞌ chixjunileb laj pa̱banel li nequeꞌxchꞌutub rib riqꞌuineb chixlokꞌoninquil li Dios. 16Qꞌuehomak xsahil e̱chꞌo̱l chi ribil e̱rib riqꞌuin santil utzꞌuc u.#Saꞌ li versículo 16:16 najter kꞌe cutan eb li herma̱n cꞌaynakeb chixqꞌuebal xsahileb xchꞌo̱l riqꞌuin li utzꞌuc u. Aꞌan li santil utzꞌuc u nayeman re xban nak saꞌ xcꞌabaꞌ li Jesucristo queꞌxba̱nu aꞌan. Chixjunileb laj pa̱banel nequeꞌxtakla xsahil e̱chꞌo̱l saꞌ xcꞌabaꞌ li Jesucristo. 17Ut nintzꞌa̱ma che̱ru, ex herma̱n, nak cheqꞌuehak retal li nequeꞌyoꞌoban jachoc ib saꞌ e̱ya̱nk ut nequeꞌraj xpoꞌbal ru le̱ pa̱ba̱l, li tzolbilex cuiꞌ. Me̱junaji e̱rib riqꞌuineb aꞌan. 18Eb aꞌan incꞌaꞌ nequeꞌxba̱nu li cꞌaꞌru naraj li Ka̱cuaꞌ Jesucristo. Caꞌaj cuiꞌ li cꞌaꞌru nequeꞌxrahi ru lix chꞌo̱leb, aꞌan li nequeꞌxba̱nu. Ut riqꞌuin kꞌunil a̱tin nequeꞌkꞌunbesin ut nequeꞌxbalakꞌi li incꞌaꞌ cauheb xchꞌo̱l saꞌ xpa̱ba̱leb. 19Chixjunileb nequeꞌnaꞌoc re nak la̱ex cau e̱chꞌo̱l saꞌ le̱ pa̱ba̱l. Joꞌcan nak nasahoꞌ inchꞌo̱l e̱riqꞌuin. Aban nacuaj nak te̱qꞌue e̱chꞌo̱l chixba̱nunquil li us ut me̱ba̱nu li incꞌaꞌ us. 20Ut li Ka̱cuaꞌ Dios, li naqꞌuehoc li tuktu̱quil usilal, aꞌan tixsach xcuanquil laj tza ut textenkꞌa re nak la̱ex chic texnumta̱k saꞌ xbe̱n. Li rusilal li Ka̱cuaꞌ Jesucristo chicua̱nk e̱riqꞌuin. 21Naxtakla xsahil e̱chꞌo̱l laj Timoteo, li cuech aj cꞌanjelil. Ut nequeꞌxtakla xsahil e̱chꞌo̱l laj Lucio, laj Jasón ut laj Sosípater. Eb aꞌan cuech tenamitil. 22La̱in laj Tercio. Yo̱quin chixtzꞌi̱banquil li hu aꞌin li tixtakla e̱re laj Pablo. Ut nintakla ajcuiꞌ xsahil e̱chꞌo̱l saꞌ xcꞌabaꞌ li Cristo. 23Naxtakla ajcuiꞌ xsahil e̱chꞌo̱l laj Gayo, li naqꞌuehoc cuochochnal. Ut saꞌ ajcuiꞌ li rochoch aꞌan nequeꞌxchꞌutub rib laj pa̱banel. Laj Erasto, laj cꞌulul tumin saꞌ li tenamit, naxtakla xsahil e̱chꞌo̱l. Ut naxtakla ajcuiꞌ xsahil e̱chꞌo̱l laj Cuarto. 24Aꞌ taxak li rusilal li Ka̱cuaꞌ Jesucristo chicua̱nk e̱riqꞌuin che̱junilex la̱ex. Joꞌcan taxak.
Laj Pablo naxlokꞌoni li Ka̱cuaꞌ Dios
25Chikalokꞌonihak taxak li Ka̱cuaꞌ Dios, li cuan xcuanquil re xqꞌuebal xcacuilal kachꞌo̱l saꞌ li kapa̱ba̱l. Ninchꞌolob xya̱lal che̱ru chirix li colba-ib saꞌ xcꞌabaꞌ li Jesucristo. Najter kꞌe cutan mukmu chak lix ya̱lal chiku; aban anakcuan cꞌutbesinbil chic lix ya̱lal chiku. 26Anakcuan xcutanoꞌ xya̱lal chiku xban li Santil Hu li tzꞌi̱banbil chak junxil xbaneb li profeta. Queꞌxtzꞌi̱ba chak li a̱tin joꞌ quiyeheꞌ reheb xban li Dios, li ma̱cꞌaꞌ rosoꞌjic. Ut aꞌin yo̱ xchꞌolobanquil xya̱lal yalak bar saꞌ chixjunil li ruchichꞌochꞌ re nak chixjunileb li tenamit teꞌrabi ut teꞌpa̱ba̱nk. 27Li jun chi Dios, li naxnau chixjunil, chicua̱nk xlokꞌal saꞌ xcꞌabaꞌ li Ka̱cuaꞌ Jesucristo anakcuan ut chi junelic kꞌe cutan. Joꞌcan taxak.
Currently Selected:
Romanos 16: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.