Romanos 15
15
Chikatenkꞌaheb li kas ki̱tzꞌin
1La̱o, li ac cau kachꞌo̱l saꞌ li kapa̱ba̱l, chikacuyeb xma̱c li toj kꞌuneb xchꞌo̱l saꞌ xpa̱ba̱leb ut takatenkꞌaheb saꞌ li chꞌaꞌajquilal. Incꞌaꞌ chikasicꞌ li us caꞌaj cuiꞌ chokꞌ ke la̱o. 2Tento takaba̱nu li us reheb li kech aj pa̱banelil re nak teꞌqꞌui̱k saꞌ lix pa̱ba̱l ut re nak sahak saꞌ xchꞌo̱leb. 3Li Cristo incꞌaꞌ quixba̱nu li quiraj xjunes rib. Quixba̱nu ban li naraj li Dios. Quixtenkꞌaheb chixjunileb. Joꞌcan nak quixcꞌul joꞌ tzꞌi̱banbil saꞌ li Santil Hu:
Saꞌ inbe̱n quinak la̱ majecuanquil li queꞌxba̱nu eb li queꞌhoboc a̱cue. (Sal. 69:9)
4Chixjunil li cꞌaꞌak re ru quitzꞌi̱ba̱c chak najter saꞌ li Santil Hu, re katzolbal nak quitzꞌi̱ba̱c chak. Nocoxtenkꞌa re nak incꞌaꞌ ta̱chꞌina̱nk li kachꞌo̱l ut naxcꞌojob li kachꞌo̱l re nak takacuy roybeninquil nak ta̱tzꞌaklok ru li kacolbal. 5Li Dios chitenkꞌa̱nk e̱re re nak incꞌaꞌ ta̱chꞌina̱nk e̱chꞌo̱l ut aꞌan chiqꞌuehok xcacuil le̱ chꞌo̱l. Aꞌan chitenkꞌa̱nk e̱re chi cua̱nc saꞌ usilal chi ribil e̱rib ut junajak le̱ chꞌo̱l joꞌ naraj li Jesucristo. 6Li Dios chitenkꞌa̱nk e̱re re nak junajak le̱ chꞌo̱l nak te̱lokꞌoni li Acuabej Dios, lix Yucuaꞌ li Jesucristo.
Li colba-ib reheb ajcuiꞌ li ma̱cuaꞌeb aj judío
7Checꞌulak saꞌ e̱ya̱nk chi sa saꞌ e̱chꞌo̱l le̱ rech aj pa̱banelil joꞌ nak li Cristo coxcꞌul la̱o. Joꞌcan cheba̱nuhak re xqꞌuebal xlokꞌal li Dios. 8La̱in ninye e̱re nak li Cristo quicꞌulun chi cꞌanjelac chiku la̱o aj judío. Riqꞌuin aꞌin naxcꞌutbesi chiku nak li Dios xqꞌue li quixyechiꞌi chak reheb li kaxeꞌto̱nil yucuaꞌ. 9Quicꞌulun ajcuiꞌ chixtenkꞌanquileb li ma̱cuaꞌeb aj judío re nak teꞌxlokꞌoni li Dios xban nak kꞌaxal nim li ruxta̱n. Tzꞌi̱banbil chi joꞌcaꞌin saꞌ li Santil Hu:
Joꞌcan nak la̱in tatinlokꞌoni saꞌ xya̱nkeb li ma̱cuaꞌeb aj judío. Ut tinbicha̱nk ajcuiꞌ re a̱lokꞌoninquil. (Sal. 18:49)
10Ut naxye ajcuiꞌ saꞌ li Santil Hu chi joꞌcaꞌin:
Chisahokꞌ taxak e̱chꞌo̱l, la̱ex li ma̱cuaꞌex aj judío, e̱rochbeneb laj judío lix tenamit li Dios. (Deut. 32:43)
11Ut naxye cuiꞌchic saꞌ li Santil Hu:
La̱ex li ma̱cuaꞌex aj judío, chelokꞌoni li Ka̱cuaꞌ ut chixjunileb taxak li tenamit cheꞌxnima̱k ru li Dios. (Sal. 117:1)
12Tzꞌi̱banbil ajcuiꞌ saꞌ li Santil Hu li quixye laj Isaías:
Saꞌ xya̱nkeb li ralal xcꞌajol laj David li ralal laj Isaí ta̱cꞌulu̱nk laj Colonel, li xakabanbil xban li Dios. Ut aꞌan ta̱cua̱nk xcuanquil saꞌ xbe̱neb li ma̱cuaꞌeb aj judío. Ut aꞌan li yo̱keb chixyoꞌoninquil. (Isa. 11:10)
13Li Dios aꞌan li kayoꞌon. Aꞌan taxak chiqꞌuehok xsahil e̱chꞌo̱l chi nabal ut tixqꞌue ajcuiꞌ e̱re li tuktu̱quil usilal xban nak nequexpa̱ban. Xban nak cuan xcuanquil li Santil Musikꞌej e̱riqꞌuin, cauhak taxak e̱chꞌo̱l chi oybeni̱nc. 14Ex herma̱n, la̱in ninnau nak cha̱bilex ut nequenau lix ya̱lal ut nequeqꞌue ajcuiꞌ e̱naꞌleb chi ribil e̱rib. 15Abanan saꞌ li hu aꞌin cau caꞌchꞌin li a̱tin xintzꞌi̱ba e̱riqꞌuin re nak incꞌaꞌ ta̱sachk saꞌ e̱chꞌo̱l li xinye. Ninba̱nu aꞌin saꞌ xcꞌabaꞌ lin cꞌanjel li quixqꞌue cue li Dios. 16La̱in nincꞌanjelac chiru li Jesucristo saꞌ xya̱nkeb li ma̱cuaꞌeb aj judío. Lin cꞌanjel aꞌan xchꞌolobanquil xya̱lal li colba-ib re nak eb li ma̱cuaꞌeb aj judío teꞌxkꞌaxtesi rib chiru li Dios. Ut li Dios ta̱sahokꞌ saꞌ xchꞌo̱l riqꞌuineb, ut teꞌsantobresi̱k xban li Santil Musikꞌej. 17Ninqꞌue xlokꞌal lin cꞌanjel xban nak aꞌan xcꞌanjel li Dios. Moco injunes ta nincꞌanjelac. Aꞌ li Cristo natenkꞌan cue. 18Ma̱cꞌaꞌ inxiu chixyebal resil li cꞌanjel xinba̱nu saꞌ xcꞌabaꞌ li Cristo nak xincꞌanjelac saꞌ xya̱nkeb li ma̱cuaꞌeb aj judío xban nak ma̱cuaꞌ injunes xincꞌanjelac. Li Jesucristo xtenkꞌan cue nak xincꞌameb xbe re nak teꞌxpa̱b li Dios riqꞌuin lin yehom inba̱nuhom. 19Xinjultica resil li Jesucristo chiruheb riqꞌuin li milagros ut li sachba chꞌo̱lej ut riqꞌuin xcuanquil li Santil Musikꞌej. Yalak bar quinbeni xyebal resil li colba-ib. Quintiquib Jerusalén, ut quinsuti chixjunileb li naꞌajej toj retal quincuulac Ilírico. 20Joꞌcan nak quinqꞌue inchꞌo̱l chixyebal resil li Jesucristo bar toj ma̱jiꞌ rabiomeb resil xban nak incꞌaꞌ nacuaj cꞌanjelac saꞌ li naꞌajej ac tiquibanbil cuiꞌ cꞌanjelac junxil. 21Joꞌcaꞌin tzꞌi̱banbil saꞌ li Santil Hu:
Li ma̱ jun sut yebil resilal li Cristo reheb, teꞌrabi. Ut nak teꞌrabi resil, teꞌxtau xya̱lal. (Isa. 52:15)
Laj Pablo naxcꞌoxla xic saꞌ li tenamit Roma
22Qꞌuila sut xcuaj raj xic e̱riqꞌuin abanan xban nak nabal incꞌanjel toj ma̱jiꞌ naxqꞌue rib chicuu. 23Ac cuan nabal chihab cuoquic chixcꞌoxlanquil xic e̱riqꞌuin. Ut anakcuan xinchoy lin cꞌanjel arin saꞌ li naꞌajej cuanquin cuiꞌ. 24Nincꞌoxla nak toxinnumekꞌ che̱rilbal nak tinxic España. Nacuaj rilbal e̱ru re nak ta̱sahokꞌ inchꞌo̱l ut nacuaj ajcuiꞌ nak tine̱tenkꞌa re nak ta̱ru̱k tinxic España. 25Ut anakcuan xic cue chi rilbaleb laj pa̱banel li cuanqueb aran Jerusalén. Ut tincꞌam jun ma̱tan re xtenkꞌanquileb. 26Eb laj pa̱banel li cuanqueb aran Macedonia ut Acaya x-ala saꞌ xchꞌo̱leb xtaklanquil jun li ma̱tan chokꞌ reheb li nebaꞌ li cuanqueb saꞌ xya̱nkeb li herma̱n aran Jerusalén. 27Qui-ala saꞌ xchꞌo̱leb xtenkꞌanquileb ut us ajcuiꞌ nak teꞌxba̱nu xban nak eb aꞌan ma̱cuaꞌeb aj judío ut saꞌ xcꞌabaꞌeb laj judío nak queꞌxcꞌul li colba-ib. Joꞌcan nak us nak teꞌxtenkꞌaheb laj pa̱banel aj judío riqꞌuin xqꞌuebal reheb li cꞌaꞌak re ru nacꞌanjelac chiruheb. 28Ut caꞌaj cuiꞌ toxinkꞌaxtesi li tumin aꞌin, toxinnumekꞌ e̱riqꞌuin ut tinxic España. 29Nak tincuulak e̱riqꞌuin, ninnau nak numtajenak li kosobtesinquil takacꞌul xban li Cristo. 30Ex herma̱n, nintzꞌa̱ma che̱ru nak tine̱tenkꞌa saꞌ le̱ tij saꞌ xcꞌabaꞌ li Jesucristo ut saꞌ xcꞌabaꞌ ajcuiꞌ li rahoc ib li qꞌuebil ke xban li Santil Musikꞌej. 31Chextijok chicuix re nak li Dios ta̱colok cue chiruheb li incꞌaꞌ nequeꞌraj pa̱ba̱nc aran Judea. Ut chextijok ajcuiꞌ re nak eb laj pa̱banel aran Jerusalén teꞌxcꞌul lix tenkꞌanquileb chi saheb saꞌ xchꞌo̱l. 32Cui li Dios naraj, chincuulak ta e̱riqꞌuin chi sa saꞌ inchꞌo̱l. Ut chisahokꞌ taxak kachꞌo̱l saꞌ comonil riqꞌuin xjulticanquil li Cristo nak toxincua̱nk e̱riqꞌuin. 33Aꞌ taxak li Dios, li naqꞌuehoc tuktu̱quil usilal, chicua̱nk e̱riqꞌuin che̱junilex. Joꞌcan taxak.
Currently Selected:
Romanos 15: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.