San Marcos 16
16
Li Jesús quicuacli cuiꞌchic chi yoꞌyo saꞌ xya̱nkeb li camenak
1Nak quinumeꞌ li hiloba̱l cutan, lix María aj Magdala ut lix Salomé ut lix María xnaꞌ laj Jacobo queꞌxlokꞌ li sununquil ban re teꞌxic chixqꞌuebal saꞌ xbe̱n li camenak. 2Toj ekꞌela queꞌco̱eb saꞌ li xbe̱n li cutan re li xama̱n. Ac x-el chak li sakꞌe nak yo̱queb chi xic saꞌ li mukleba̱l. 3Ut yo̱queb chixyebal chi ribileb rib: —¿Ani ta̱isi̱nk re li pec li cuan chire li mukleba̱l? chanqueb. 4Ut nak queꞌcuulac cuan cuiꞌ li mukleba̱l, queꞌril nak ac isinbil chic li nimla pec chire li mukleba̱l. 5Ut nak queꞌoc saꞌ li mukleba̱l queꞌril jun li sa̱j cui̱nk chunchu chak saꞌ li mukleba̱l saꞌ xnim ukꞌeb. Li sa̱j cui̱nk aꞌan tikto riqꞌuin jun saki tꞌicr nim xbas ut eb li ixk cꞌajoꞌ nak queꞌxucuac chirilbal. 6Ut li cui̱nk quixye reheb: —Mexxucuac. La̱in ninnau nak yo̱quex chixsicꞌbal li Jesús aj Nazaret li queꞌxcamsi chiru cruz. Aꞌan ma̱ ani chic arin. Ac xcuacli cuiꞌchic chi yoꞌyo. Ilomak lix naꞌaj li xcuan cuiꞌ li camenak. 7Ayukex, yehomak chak reheb lix tzolom, joꞌ ajcuiꞌ re laj Pedro, nak aꞌan xbe̱n cua ta̱xic Galilea che̱ru la̱ex. Aran toxe̱ril ru joꞌ quixye e̱re, chan. 8Ut eb li ixk queꞌel aran ut queꞌco̱eb saꞌ a̱nil ut nequeꞌsicsot xbaneb xxiu. Ut ma̱ ani aj e queꞌxye xban nak teꞌxucuak.
Li Jesucristo quixcꞌutbesi rib chiru lix María Magdala ut cuib lix tzolom
9Toj ekꞌela saꞌ li xbe̱n li cutan re li xama̱n quicuacli li Jesús chi yoꞌyo saꞌ xya̱nkeb li camenak. Li xbe̱n li quixcꞌutbesi cuiꞌ rib li Jesús, aꞌan lix María aj Magdala. Aꞌan li ixk li qui-isi̱c li cuukub chi ma̱us aj musikꞌej riqꞌuin xban li Jesús. 10Li ixk aꞌan co̱ chixyebal reheb lix tzolom li Jesús. Nak quicuulac riqꞌuineb, coxtauheb chi ya̱bac xban xrahil xchꞌo̱leb. 11Ut lix María quixserakꞌi reheb nak yoꞌyo li Jesús ut nak quiril ru. Abanan eb aꞌan incꞌaꞌ queꞌxpa̱b li cꞌaꞌru quixye. 12Ut chirix aꞌan, li Jesús quixcꞌutbesi cuiꞌchic rib chiruheb cuib lix tzolom nak yo̱queb chi xic saꞌ cꞌaleba̱l. Jalan chic rilbal nak quixcꞌutbesi rib chiruheb. 13Eb aꞌan queꞌco̱eb ut coxeꞌxye resil reheb li jun chꞌol chic. Ut chi moco li cuib aꞌan queꞌxpa̱b.
Li Jesucristo quixtaklaheb lix tzolom chixyebal resil li colba-ib
14Mokon chic eb li junlaju chi xtzolom cuanqueb saꞌ me̱x nak quixcꞌutbesi rib li Jesús chiruheb. Ut quixkꞌuseb xban nak incꞌaꞌ queꞌpa̱ban ut xban xcacuil lix chꞌo̱leb. Incꞌaꞌ queꞌxpa̱b li cꞌaꞌru queꞌxye li queꞌiloc ru li Jesús xbe̱n cua nak ac xcuacli cuiꞌchic chi yoꞌyo saꞌ xya̱nkeb li camenak. 15Ut li Jesús quixye reheb: —Texxic saꞌ chixjunil li ruchichꞌochꞌ ut te̱chꞌolob xya̱lal li colba-ib chiruheb chixjunileb li tenamit jun sut rubel choxa. 16Li ani ta̱pa̱ba̱nk ut ta̱cube̱k xhaꞌ, aꞌan ta̱colekꞌ; aꞌut li ani incꞌaꞌ ta̱pa̱ba̱nk, aꞌan ta̱xic saꞌ tojba ma̱c. 17Aꞌan aꞌin li retalil li talajeꞌxba̱nu li teꞌpa̱ba̱nk. Saꞌ incꞌabaꞌ la̱in teꞌisi̱nk ma̱us aj musikꞌej ut teꞌa̱tinak saꞌ jalan a̱tinoba̱l. 18Cui teꞌxchap cꞌantiꞌ chi rukꞌeb, ma̱cꞌaꞌ teꞌxcꞌul ut cui teꞌrucꞌ li cꞌaꞌak re ru nacamsin, ma̱cꞌaꞌ teꞌxcꞌul. Cui teꞌxqꞌue li rukꞌ saꞌ xbe̱neb li yaj, teꞌqꞌuira̱k, chan li Jesús.
Li Jesucristo co̱ saꞌ choxa
19Nak ac xra̱tinaheb lix tzolom li Ka̱cuaꞌ Jesucristo, quicꞌameꞌ saꞌ choxa xban li Dios, ut quicꞌojla saꞌ xnim ukꞌ li Acuabej Dios. 20Ut eb lix tzolom queꞌco̱eb saꞌ chixjunil li naꞌajej chixchꞌolobanquil xya̱lal li colba-ib. Ut li Ka̱cuaꞌ yo̱ chi tenkꞌa̱nc reheb. Ut qꞌuebil xcuanquil li ra̱tineb xban li Dios riqꞌuin li milagro quilajeꞌxba̱nu chiruheb li tenamit. Joꞌcan taxak.
Currently Selected:
San Marcos 16: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.