San Marcos 15
15
Quicꞌameꞌ li Jesús saꞌ rakleb a̱tin chiru laj Pilato
1Nak quisake̱u eb lix be̱nil aj tij queꞌxchꞌutub cuiꞌchic rib riqꞌuineb laj cꞌamol be saꞌ rochoch li Dios, ut riqꞌuineb laj tzꞌi̱b ut riqꞌuin chixjunileb laj qꞌuehol naꞌleb ut queꞌxcꞌu̱b chanru teꞌxba̱nu. Ut queꞌxcꞌam li Jesús chi bacꞌbo ut queꞌxkꞌaxtesi saꞌ rukꞌ laj Pilato. 2Laj Pilato quixye re li Jesús: —¿Ma la̱at lix reyeb laj judío?— Li Jesús quichakꞌoc ut quixye re: —Ya̱l li xaye nak la̱in.— 3Ut eb lix be̱nil aj tij nabal li cꞌaꞌak re ru yo̱queb cuiꞌ chixjitbal. 4Ut laj Pilato quixpatzꞌ cuiꞌchic re: —¿Ma incꞌaꞌ nacatchakꞌoc? ¿Ma incꞌaꞌ nacacuabi li joꞌ qꞌuial yo̱queb chixyebal cha̱cuix? chan laj Pilato re. 5Aban li Jesús ma̱ jun a̱tin quixye re xcolbal rib ut riqꞌuin aꞌan quisach xchꞌo̱l laj Pilato.
Quiteneba̱c ca̱mc saꞌ xbe̱n li Jesús
6Rajlal chihab saꞌ li ninkꞌe Pascua laj Pilato narachꞌab jun li pre̱x, aꞌ ya̱l bar cuan teꞌraj li tenamit. 7Jun li cui̱nk aj Barrabás xcꞌabaꞌ cuan saꞌ tzꞌalam rochbeneb lix comon xban li camsi̱nc queꞌxba̱nu nak yo̱queb chi pletic chirix li acuabej. 8Ut queꞌchal li qꞌuila tenamit riqꞌuin laj Pilato chixtzꞌa̱manquil chiru nak ta̱rachꞌab junak pre̱x joꞌ cꞌaynakeb xba̱nunquil. 9Laj Pilato quichakꞌoc ut quixye reheb: —¿Ma te̱raj nak tincuachꞌab lix reyeb laj judío?— 10Laj Pilato naxnau nak xban xcakaleb xchꞌo̱l lix be̱nil aj tij nak queꞌxkꞌaxtesi li Jesús saꞌ rakleb a̱tin. 11Aban eb lix be̱nil aj tij queꞌxtacchiꞌi li qꞌuila tenamit re nak aꞌ laj Barrabás li teꞌxtzꞌa̱ma re nak ta̱achꞌaba̱k. 12Ut laj Pilato quixpatzꞌ cuiꞌchic reheb: —¿Cꞌaꞌru nequeye? ¿Cꞌaꞌru te̱raj tinba̱nu riqꞌuin lix reyeb laj judío?— 13Ut eb li qꞌuila tenamit queꞌxjap cuiꞌchic re chixyebal: —¡Qꞌue chiru cruz! chanqueb. 14Aꞌut laj Pilato quixpatzꞌ cuiꞌchic reheb: —¿Cꞌaꞌut? ¿Cꞌaꞌru tzꞌakal xma̱c e̱re? chan. Ut eb aꞌan kꞌaxal cuiꞌchic cau queꞌxjap re chixyebal: —¡Qꞌue chiru cruz!— 15Ut laj Pilato ta̱raj nak sahakeb saꞌ xchꞌo̱l li tenamit riqꞌuin. Joꞌcan nak quirachꞌab laj Barrabás chiruheb. Tojoꞌnak quixtakla xsacꞌbal li Jesús riqꞌuin tzꞌu̱m ut quixkꞌaxtesi saꞌ rukꞌeb li soldado re nak teꞌxqꞌue chiru cruz.
Li Jesús quirahobtesi̱c xbaneb li soldado
16Ut eb li soldado queꞌxcꞌam li Jesús saꞌ li po̱pol ut queꞌxchꞌutub ribeb chixjunileb li soldado. 17Queꞌxqꞌue jun caki akꞌ chirix li Jesús joꞌ nequeꞌrocsi li rey. Ut queꞌxqꞌue ajcuiꞌ jun tzꞌulbil corona qꞌuix saꞌ xjolom. 18Tojoꞌnak queꞌoc chixjapbal reheb chixyebal: —Sahak taxak saꞌ a̱chꞌo̱l, at xReyeb laj judío, chanqueb. 19Ut yo̱queb chixsaqꞌuinquil saꞌ xjolom riqꞌuin cheꞌ. Cuan queꞌchu̱ban re ut cuan ajcuiꞌ queꞌxcuikꞌib ribeb chiru re retzꞌunquil. 20Ut nak ac queꞌxtacuasi, queꞌrisi li caki akꞌ chirix ut queꞌxqꞌue cuiꞌchic li rakꞌ chirix. Tojoꞌnak queꞌxcꞌam re teꞌxqꞌue chiru cruz.
Li Jesús quiqꞌueheꞌ chiru cruz
21Jun li cui̱nk aj Simón xcꞌabaꞌ yo̱ chi cha̱lc saꞌ cꞌaleba̱l. Cirene lix tenamit. Li cui̱nk aꞌan xyucuaꞌ laj Alejandro ut laj Rufo. Eb li soldado queꞌxmin ru laj Simón chixpakonquil lix cruz li Jesús. 22Queꞌxcꞌam li Jesús saꞌ li naꞌajej Gólgota xcꞌabaꞌ. Chi jalbil ru naraj naxye: Xnaꞌaj Xbakel Xjolom Camenak. 23Ut queꞌxqꞌue vino re li Jesús yubil riqꞌuin cꞌahil ban re xcꞌosbal li raylal aban li Jesús incꞌaꞌ quirucꞌ. 24Tojoꞌnak queꞌxqꞌue chiru cruz. Ut eb li soldado queꞌbu̱lic chirix li rakꞌ re rilbal ani na ta̱e̱chani̱nk re li junju̱nk. 25Bele̱b o̱r re ekꞌela queꞌxqꞌue li Jesús chiru cruz. 26Saꞌ xbe̱n li cruz queꞌxqꞌue jun retalil cꞌaꞌut nak queꞌxcamsi ut naxye: Aꞌan aꞌin lix reyeb laj judío. 27Ut cuib laj e̱lkꞌ queꞌqꞌueheꞌ chiru cruz rochben, jun saꞌ xnim ukꞌ ut jun saꞌ xtzꞌe. 28Joꞌcan nak quitzꞌakloc ru li naxye saꞌ li Santil Hu:
Aꞌan quiqꞌueheꞌ saꞌ ajl saꞌ xya̱nkeb laj ma̱c. (Isa. 53:12)
29Ut eb li tenamit nak queꞌnumeꞌ aran queꞌxhob li Jesús. Queꞌrecꞌasi xjolomeb ut queꞌxye: —La̱at peꞌ xatjucꞌuc raj re rochoch li Dios, ut yal chiru oxib cutan raj xayi̱b cuiꞌchic. 30Col a̱cuib anakcuan ut cuben chak chiru li cruz, chanqueb. 31Joꞌcan ajcuiꞌ queꞌxba̱nu eb li xbe̱nil aj tij. Queꞌxhob li Jesús nak queꞌxye chi ribileb rib rochbeneb laj tzꞌi̱b: —Jalan chic xcoleb ut aꞌan incꞌaꞌ naru naxcol rib xjunes. 32Chicubek chak chiru li cruz anakcuan li Cristo lix Reyeb laj judío re nak takil ut takapa̱b, chanqueb. Ut eb li queꞌqꞌueheꞌ chiru cruz rochben queꞌxhob ajcuiꞌ li Jesús.
Lix camic li Jesucristo
33Tuktu li cuaꞌleb nak quikꞌojyi̱noꞌ saꞌ chixjunil li ruchichꞌochꞌ ut oxib o̱r re ecuu quicutanoꞌ cuiꞌchic. 34Ut saꞌ li o̱r aꞌan li Jesús quia̱tinac chi cau ut quixye: —Eloi, Eloi, ¿lama sabactani?— Chi jalbil ru naraj naxye, “At inDios, at inDios, ¿cꞌaꞌut nak xina̱canab injunes?” 35Nak li cuanqueb aran queꞌrabi li ra̱tin, cuan li queꞌxye: —Abihomak, yo̱ chixbokbal li profeta Elías, chanqueb. 36Ut jun saꞌ xya̱nkeb co̱o saꞌ a̱nil ut coxtzꞌa chak jun li esponja saꞌ vinagre ut quixtaksi saꞌ ruꞌuj jun cheꞌ re xqꞌuebal chi rucꞌ li Jesús ut quixye: —Kilak cuan ma ta̱cha̱lk na laj Elías chixcubsinquil, chan. 37Aꞌut li Jesús quixjap re chi cau ut qui-el xchꞌo̱l. 38Ut lix tꞌicrul li rochoch li Dios quikꞌicheꞌ, ut lix pejelal quiticla chak takecꞌ ut toj takꞌa coxrakeꞌ. Caꞌ jachal qui-el. 39Jun li capitán aj Roma cuan aran xakxo chiru li Jesús. Nak quiril chanru nak quicam, li capitán quixye: —Ya̱l nak li cui̱nk aꞌin tzꞌakal Ralal li Dios.— 40Cuanqueb ajcuiꞌ ixk yo̱queb chi iloc chi najt. Saꞌ xya̱nkeb aꞌan cuan lix María aj Magdala, lix Salomé ut lix María xnaꞌeb laj José ut laj Jacobo li i̱tzꞌinbej. 41Eb li ixk aꞌin, aꞌan li queꞌta̱ken re li Jesús nak toj cuan chak Galilea ut queꞌcꞌanjelac chiru. Ut cuanqueb nabal chic li ixk cuotz queꞌcuulac Jerusalén rochben li Jesús.
Nak quimukeꞌ li Jesucristo
42Nak ac oc re li kꞌojyi̱n, ac nachꞌoc chak re li hiloba̱l cutan. Yo̱queb chixcauresinquil ribeb re li hiloba̱l cutan. 43Quicuan jun li cui̱nk aj José xcꞌabaꞌ Arimatea xtenamit. Aꞌan jun xnimal ru cui̱nk saꞌ xya̱nkeb li nequeꞌtzꞌiloc a̱tin ut yo̱ chixyoꞌoninquil lix nimal xcuanquil li Dios. Incꞌaꞌ quixucuac laj José nak quicuulac chixtzꞌa̱manquil chiru laj Pilato nak aꞌan ta̱mukuk re lix tzꞌejcual li Jesús. 44Laj Pilato quisach xchꞌo̱l chirabinquil nak ac xcam li Jesús. Ut quixtakla xbokbal li capitán ut quixpatzꞌ re: —¿Ma ya̱l nak ac xcam li Jesús? chan re. 45Li capitán quixye re nak ac xcam. Tojoꞌnak laj Pilato quixye re laj José nak naru tixcꞌam. 46Ut laj José quixlokꞌ jun cha̱bil tꞌicr lino. Quixcubsi chak li camenak chiru li cruz ut quixlan saꞌ li cha̱bil tꞌicr. Ut quixqꞌue saꞌ jun mukleba̱l yi̱banbil saꞌ jun sako̱nac. Ut quixbalkꞌusi jun nimla pec chire li mukleba̱l. 47Ut lix María aj Magdala ut lix María xnaꞌ laj José queꞌril bar quixmuk.
Currently Selected:
San Marcos 15: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.