2 Timoteo 1
1
Laj Pablo naxtakla xsahil xchꞌo̱l laj Timoteo
1La̱in laj Pablo. La̱in x-apóstol li Jesucristo xban nak joꞌcan quiraj li Dios. Taklanbilin chixyebal resil li acꞌ yuꞌam li yechiꞌinbil ke xban li Dios, li yuꞌam li naxqꞌue ke li Jesucristo. 2Yo̱quin chixtzꞌi̱banquil li hu aꞌin a̱cuiqꞌuin, at Timoteo. Raro̱cat inban ut chanchanat tzꞌakal cualal chicuu nak cuancat. Chicua̱nk taxak a̱cuiqꞌuin li usilal, li uxta̱n, ut li tuktu̱quilal, li nachal chak riqꞌuin li Dios li kaYucuaꞌ ut riqꞌuin li Ka̱cuaꞌ Jesucristo.
Incꞌaꞌ toxuta̱na̱k chixyebal resil li evangelio
3Junelic ninbantioxi chiru li Dios nak nacatinjultica saꞌ lin tij chi kꞌek chi cutan. Ut ma̱cꞌaꞌ nachꞌiꞌchꞌiꞌin cue saꞌ li cua̱m nak nincꞌanjelac chiru li Dios joꞌ queꞌxba̱nu lin xeꞌto̱nil yucuaꞌ. 4Nacuaj raj rilbal cuiꞌchic a̱cuu. Jultic cue chanru nak xatya̱bac xban xrahil a̱chꞌo̱l ut nacuaj nak ta̱sahokꞌ cuiꞌchic inchꞌo̱l nak tincuil a̱cuu. 5Nak nintijoc najulticoꞌ cue nak chi anchal a̱chꞌo̱l xatpa̱ban. Junxil la̱ naꞌchin lix Loida joꞌ ajcuiꞌ lix Eunice la̱ naꞌ queꞌpa̱ban chi anchaleb xchꞌo̱l ut ninnau nak joꞌcan ajcuiꞌ nak xatpa̱ban la̱at. 6Joꞌcan nak ninjultica cha̱cuu nak chaqꞌuehak chi cꞌanjelac la̱ ma̱tan qꞌuebil a̱cue xban li Dios nak quinqꞌue li cuukꞌ saꞌ a̱be̱n. 7Ma̱cuaꞌ li xucuac li xkama̱tani chak riqꞌuin li Dios. Kacuanquil ban xkama̱tani riqꞌuin. Li Dios nocoxtenkꞌa chixra̱baleb li kas ki̱tzꞌin ut aꞌan naqꞌuehoc ke li cha̱bil naꞌleb. 8Joꞌcan ut nak matxuta̱nac chixchꞌolobanquil resil li Ka̱cuaꞌ Jesucristo chi moco tatxuta̱na̱k inban la̱in xban nak cuanquin chi pre̱xil xban xyebal resil li Ka̱cuaꞌ. Chaqꞌue ban a̱cuib chi tzꞌako̱nc riqꞌuin li raylal nacꞌulman saꞌ xcꞌabaꞌ li evangelio. Ut li Dios ta̱qꞌuehok a̱cuanquil chixcuybal. 9Aꞌan quicoloc ke ut quixsicꞌ chak ku re nak tocꞌanjelak saꞌ ti̱quilal. Ma̱cuaꞌ xban kayehom kaba̱nuhom nak quixsicꞌ ku. Yal xban li rusilal ban, xban nak joꞌcan quiraj. Saꞌ xcꞌabaꞌ li Jesucristo nak quiruxta̱na ku, xban nak ac joꞌcan chak saꞌ xchꞌo̱l junxilaj nak toj ma̱jiꞌ quixyi̱b li ruchichꞌochꞌ. 10Li usilal aꞌin quicꞌutbesi̱c chiku riqꞌuin lix cꞌulunic saꞌ ruchichꞌochꞌ li Ka̱cuaꞌ Jesucristo laj Colol ke. Ut aꞌan qui-isin re xcuanquil li ca̱mc ut quixcꞌut chiku li acꞌ yuꞌam li ma̱cꞌaꞌ rosoꞌjic. 11Li Dios quixakaban cue chi cꞌanjelac chokꞌ apóstol ut chokꞌ aj tzolol reheb li ma̱cuaꞌeb aj judío re nak tinye resil li colba-ib reheb. 12Joꞌcan nak nincuy chixjunil li raylal ut incꞌaꞌ ninxuta̱nac xban nak cꞌojcꞌo inchꞌo̱l riqꞌuin li Ka̱cuaꞌ. Aꞌan li ninpa̱b ut xinkꞌaxtesi cuib saꞌ rukꞌ. Ninnau nak aꞌan ta̱tenkꞌa̱nk cue tojaꞌ yal nak ta̱cꞌulu̱nk cuiꞌchic li Jesucristo. 13Chicua̱nk saꞌ a̱chꞌo̱l li tijleb li tzꞌakal ya̱l li xincꞌut cha̱cuu. Ut chicua̱nk la̱ pa̱ba̱l ut chatrahok xban nak rehat chic li Cristo. 14Riqꞌuin xcuanquil li Santil Musikꞌej li cuan a̱cuiqꞌuin, chacꞌu̱lahak saꞌ a̱chꞌo̱l lix ya̱lal li lokꞌlaj colba-ib kꞌaxtesinbil a̱cue xban li Dios. 15La̱at nacanau nak chixjunileb laj pa̱banel li cuanqueb Asia xineꞌxcanab injunes. Saꞌ xya̱nkeb aꞌan cuanqueb laj Figelo ut laj Hermógenes. 16Caꞌaj chic laj Onesíforo qꞌuila sut colinril saꞌ tzꞌalam ut quixcꞌojob inchꞌo̱l ut incꞌaꞌ quixuta̱nac xban nak bacꞌbo̱quin chi cadena. Aꞌ taxak li Ka̱cuaꞌ Dios chi-osobtesi̱nk re li jun cabal aꞌan. 17Nak quicꞌulun arin Roma, laj Onesíforo quinixsicꞌ chi anchal xchꞌo̱l toj retal quinixtau. 18La̱at nacanau chi tzꞌakal nak quixqꞌue xchꞌo̱l chi tenkꞌa̱nc aran Éfeso. Aꞌ taxak li Ka̱cuaꞌ Dios chi-uxta̱na̱nk ru saꞌ xkꞌehil xcꞌulunic li Ka̱cuaꞌ Jesucristo.
Currently Selected:
2 Timoteo 1: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.