2 Timoteo 2
2
Tento xcuybal xnumsinquil li raylal saꞌ xcꞌabaꞌ li Jesucristo
1Aꞌut anakcuan, at Timoteo, cauhak a̱chꞌo̱l riqꞌuin li usilal qꞌuebil ke xban nak reho chic li Cristo Jesús. 2Li xya̱lal li xincꞌut cha̱cuu chiruheb nabaleb li cristian, aꞌan ajcuiꞌ chajultica chiruheb li cui̱nk li ti̱queb xchꞌo̱leb re nak eb aꞌan chic teꞌcꞌutuk re chiruheb jalaneb chic. 3Chattzꞌako̱nk riqꞌuin li raylal li nakacꞌul ut chacuyak xnumsinquil chixjunil li raylal joꞌ jun xcha̱bil soldado li Jesucristo. 4Junak soldado incꞌaꞌ naru naxsicꞌ jalan xcꞌanjel xban nak ac sicꞌbil ru chokꞌ soldado. Naxqꞌue ban xchꞌo̱l chixba̱nunquil li nacuulac chiru li nataklan re. 5Ut joꞌcan ajcuiꞌ li naxyal xkꞌe chi a̱linac, incꞌaꞌ naxcꞌul lix ma̱tan cui incꞌaꞌ naxba̱nu chi tzꞌakal re ru. 6Laj cꞌalom li nacꞌanjelac chi cau tento nak aꞌan li xbe̱n li ta̱tzꞌak ru li racui̱mk. 7Cꞌoxlan chirix li oxib chi naꞌleb li xinye a̱cue ut aꞌ taxak li Ka̱cuaꞌ Jesucristo chitenkꞌa̱nk a̱cue chixtaubal ru lix ya̱lal. 8Chijulticokꞌ a̱cue nak li Jesucristo, aꞌan xcomoneb li ralal xcꞌajol li rey David ut aꞌan li quicuacli cuiꞌchic chi yoꞌyo saꞌ xya̱nkeb li camenak. Aꞌan aꞌin li resilal li evangelio li yo̱quin chixyebal la̱in. 9Saꞌ xcꞌabaꞌ li evangelio yo̱quin chixcꞌulbal li raylal aꞌin, ut bacꞌbo̱quin chi cadena. Chanchan na-ux re junak kꞌaxal nim xma̱c. Usta bacꞌbo̱quin, abanan li resil li evangelio ta̱yema̱nk yalak bar xban nak li ra̱tin li Dios incꞌaꞌ naru xmukbal. 10Joꞌcan nak nincuy xnumsinquil chixjunil li raylal li nincꞌul saꞌ xcꞌabaꞌeb li sicꞌbileb ru xban li Dios re nak eb aꞌan naru teꞌxtau li lokꞌlaj colba-ib li naxqꞌue li Jesucristo ut teꞌxtau ajcuiꞌ lix lokꞌal chi junelic. 11Li a̱tin aꞌin li oc cue xyebal a̱cue, aꞌan tzꞌakal ya̱l: Cui cocam kochben li Cristo, ta̱cua̱nk ajcuiꞌ kayuꞌam kochben. 12Cui takacuy xnumsinquil li raylal, ta̱qꞌuehekꞌ ajcuiꞌ kacuanquil xban li Dios kochben li Cristo. Ut cui la̱o nakatzꞌekta̱na, aꞌan toxtzꞌekta̱na ajcuiꞌ la̱o. 13Cuan nak la̱o incꞌaꞌ nakaba̱nu li cꞌaꞌru nakaye, abanan li Dios ti̱c xchꞌo̱l ut junelic naxba̱nu li cꞌaꞌru naxye. Aꞌan incꞌaꞌ nacuiban xchꞌo̱l.
La̱atak jun cha̱bil aj cꞌanjel chiru li Dios chi ma̱cꞌaꞌ cꞌaꞌru tatxuta̱na̱k cuiꞌ
14Chajultica lix ya̱lal chiruheb laj pa̱banel. Saꞌ xcꞌabaꞌ li Ka̱cuaꞌ Dios chayehak reheb nak cheꞌxcanabak xcuechꞌinquil ribeb chirix a̱tin xban nak aꞌan ma̱cꞌaꞌ na-oc cuiꞌ. Caꞌaj cuiꞌ xpoꞌbaleb xchꞌo̱l li nequeꞌabin re naxba̱nu. 15Chaqꞌuehak a̱chꞌo̱l chi cꞌanjelac chiru li Dios joꞌ junak tzꞌakal aj cꞌanjel ma̱cꞌaꞌ cꞌaꞌru ta̱xuta̱na̱k cuiꞌ. Chachꞌolobak chi tzꞌakal resil li colba-ib chiruheb. 16Mat-oquen riqꞌuin joꞌ ma̱joꞌil serakꞌ, li ma̱cꞌaꞌ na-oc cuiꞌ. Li nequeꞌba̱nun re chi joꞌcan kꞌaxal cuiꞌchic nequeꞌxqꞌue xchꞌo̱l chixba̱nunquil li ma̱usilal. 17Naniman ru li tijleb li nequeꞌxcꞌut. Chanchan nak naniman ru junak yajel joꞌ li cáncer xcꞌabaꞌ. Joꞌcan queꞌxba̱nu laj Himeneo ut laj Fileto. 18Eb aꞌan queꞌxcanab xpa̱banquil li tzꞌakal ya̱l ut queꞌxpa̱b li ticꞌtiꞌ. Nequeꞌxye nak ac queꞌcuacli chi yoꞌyo eb li camenak, chanqueb. Ut riqꞌuin aꞌan cuan li yo̱queb chixpoꞌbal ruheb lix pa̱ba̱leb. 19Abanan lix ya̱lal qꞌuebil ke xban li Dios incꞌaꞌ naru najalman ru. Joꞌcaꞌin tzꞌi̱banbil saꞌ li Santil Hu: li Dios naxnau ruheb li ralal xcꞌajol, ut chixjunileb li teꞌxcꞌabaꞌin xcꞌabaꞌ li Ka̱cuaꞌ, tento nak teꞌxcanab chi junaj cua li ma̱usilal. 20Saꞌ junak xnimal ru cab cuan li secꞌ yi̱banbil riqꞌuin oro ut plata. Ut cuan li chꞌochꞌ secꞌ ut cuan ajcuiꞌ li secꞌ yi̱banbil riqꞌuin cheꞌ. Cuan li cha̱bil xcꞌanjel ut cuan li yalak cꞌaꞌru nacꞌanjelac cuiꞌ. 21Cui junak aj pa̱banel naraj ta̱qꞌuehekꞌ re jun lix cha̱bil cꞌanjel xban li Dios, tento nak li jun aꞌan tixcanab chi junaj cua chixjunil li ma̱usilal. Cui tixba̱nu chi joꞌcan, li jun aꞌan kꞌaxtesinbilak chic chi cꞌanjelac chiru li Ka̱cuaꞌ ut cauresinbilak chic chixba̱nunquil li cha̱bil cꞌanjel. 22Joꞌcan utan chatzꞌekta̱na chi junaj cua li incꞌaꞌ us li nequeꞌxrahi ru li toj sa̱jeb. Ut qꞌue a̱chꞌo̱l chicua̱nk saꞌ ti̱quilal ut chatpa̱ba̱nk chi tzꞌakal. Charahakeb la̱ cuas a̱cui̱tzꞌin ut chatcua̱nk saꞌ usilal riqꞌuineb chixjunileb. La̱akat jun saꞌ xya̱nkeb li ti̱queb xchꞌo̱l li nequeꞌtijoc chiru li Dios. 23Ma̱cuaꞌakat jun saꞌ xya̱nkeb li nequeꞌxcuechꞌi rib chirix to̱ntil a̱tin li ma̱cꞌaꞌ aj e. La̱at ac nacanau nak li cuechꞌi̱nc ib junes ra xi̱cꞌ naxqꞌue. 24Junak aj cꞌanjel chiru li Ka̱cuaꞌ ma̱cuaꞌak aj sicꞌol ra xi̱cꞌ. Tu̱lanak ban riqꞌuineb chixjunileb. Cua̱nk xnaꞌleb re xcꞌutbal lix ya̱lal chiruheb li ras ri̱tzꞌin ut nimak xcuyum. 25Ut saꞌ tu̱lanil chixchꞌolobak xya̱lal reheb li nequeꞌcuechꞌin rix lix ya̱lal. Ma̱re chan nak li Dios ta̱tenkꞌa̱nk reheb chixyotꞌbal xchꞌo̱leb, chixjalbal xcꞌaꞌuxeb re teꞌxnau ru li ya̱l. 26Ut teꞌrisi rib saꞌ rukꞌ laj tza li yo̱ chi a̱le̱nc reheb re nak incꞌaꞌ chic teꞌxba̱nu li cꞌaꞌru naraj aꞌan. Ut teꞌsukꞌi̱k taxak saꞌ li tzꞌakal xya̱lal.
Currently Selected:
2 Timoteo 2: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.