1 Corintios 1
1
Xqꞌuebal xsahileb xchꞌo̱l
1La̱in laj Pablo. Sicꞌbil chak cuu xban li Dios re nak tincꞌanjelak chokꞌ x-apóstol li Jesucristo xban nak joꞌcan quiraj li Dios. Cuochben laj Sóstenes li cuech aj pa̱banelil. 2Yo̱quin chixtzꞌi̱banquil li hu aꞌin e̱riqꞌuin la̱ex aj pa̱banel li cuanquex saꞌ li tenamit Corinto. Santobresinbilex saꞌ xcꞌabaꞌ li Jesucristo ut sicꞌbil e̱ru xban li Dios chokꞌ ralal xcꞌajol. Ut sicꞌbil ajcuiꞌ ruheb chixjunileb li cuanqueb yalak bar li nequeꞌxya̱ba xcꞌabaꞌ li Jesucristo. Aꞌan li kaDios chikajunilo la̱o li nocopa̱ban re. 3Chicua̱nk taxak e̱riqꞌuin li usilal ut li tuktu̱quilal li nachal riqꞌuin li Dios li kaYucuaꞌ ut riqꞌuin li Ka̱cuaꞌ Jesucristo.
Li rusilal li Dios nequecꞌul saꞌ xcꞌabaꞌ li Cristo
4Junelic ninbantioxi chiru li Dios nak nintijoc che̱rix la̱ex ut ninbantioxi ajcuiꞌ chiru li Dios nak xema̱tani li rusilal li Dios saꞌ xcꞌabaꞌ li Jesucristo. 5Xban nak junajex chic riqꞌuin li Cristo, xema̱tani li rusilal li Dios. Cha̱bil chic nequex-a̱tinac ut cha̱bil chic le̱ naꞌleb xban nak nequenau chic lix ya̱lal. 6Ac xema̱tani li rusilal li Dios ut nacꞌutun nak ya̱l li quinye e̱re chirix li Cristo. 7Ac xema̱tani li usilal li naxqꞌue li Santil Musikꞌej ut ma̱cꞌaꞌ chic nequeroybeni. Caꞌaj chic lix cꞌulunic li Ka̱cuaꞌ Jesucristo nequeroybeni. 8Li Dios yo̱k chixqꞌuebal xcacuub le̱ chꞌo̱l chalen toj saꞌ rosoꞌjic li cutan re nak ma̱cꞌaꞌak e̱ma̱c saꞌ li cutan nak tol-e̱lk li Ka̱cuaꞌ Jesucristo. 9Li Dios junelic naxqꞌue li naxyechiꞌi ut aꞌan ajcuiꞌ li quisicꞌoc e̱ru re nak texcua̱nk chi sum a̱tin riqꞌuin li Ralal, aꞌ li Ka̱cuaꞌ Jesucristo.
Xqꞌuebal xnaꞌlebeb laj pa̱banel re nak junajakeb xchꞌo̱l
10Ex inherma̱n, saꞌ xcꞌabaꞌ li Ka̱cuaꞌ Jesucristo nintzꞌa̱ma che̱ru nak junajak le̱ naꞌleb. Ma̱cꞌaꞌak li jachoc ib saꞌ e̱ya̱nk. Junajak ban le̱ cꞌaꞌux ut junajak le̱ chꞌo̱l. 11Ninye e̱re chi joꞌcaꞌin xban nak lix comoneb lix Cloé xeꞌyehoc resil cue nak cuan cuechꞌi̱nc ib saꞌ e̱ya̱nk. 12¿Cꞌaꞌut nak jalan jala̱nk nequecꞌoxla che̱ju̱nkal? Cuan nequeꞌxye: La̱o xtzolom laj Pablo. Ut cuan nequeꞌxye: La̱o xtzolom laj Apolos. Ut cuan ajcuiꞌ li nequeꞌxye: La̱o xtzolom laj Pedro ut cuan cuiꞌchic nequeꞌxye: La̱o xtzolom li Cristo. 13Abanan la̱in tinpatzꞌ e̱re, ¿ma nabal ta biꞌ li Cristo? Incꞌaꞌ. Jun ajcuiꞌ. ¿Ma quinqꞌueheꞌ ta biꞌ la̱in chiru cruz saꞌ e̱cꞌabaꞌ la̱ex? ¿Ma saꞌ incꞌabaꞌ ta biꞌ la̱in quecꞌul li cubi haꞌ? 14Ninbantioxi chiru li Dios nak ma̱cuaꞌ la̱in quincubsin e̱haꞌ. Caꞌaj cuiꞌ laj Crispo ut laj Gayo quincubsi xhaꞌeb. 15Cui ta la̱in quincubsin e̱haꞌ, ma̱re raj quecꞌoxla nak quinba̱nu saꞌ incꞌabaꞌ la̱in. 16Ut quincubsi ajcuiꞌ xhaꞌeb li cuanqueb saꞌ rochoch laj Estéfanas. Incꞌaꞌ chic jultic cue ma cuan chic quincubsiheb xhaꞌ. 17Li Cristo incꞌaꞌ quinixtakla chak chi cubsi̱nc haꞌ. Quinixtakla ban chak chixjulticanquil resil li colba-ib. Abanan ma̱cuaꞌ riqꞌuin a̱tin chꞌaꞌaj xtaubal ru xya̱lal quina̱tinac. Cui ta riqꞌuin a̱tin chꞌaꞌaj xtaubal ru quina̱tinac, cuan raj incꞌaꞌ queꞌtaꞌoc ru ut ta̱cana̱k raj chi ma̱cꞌaꞌ rajbal xcamic li Cristo chiruheb.
Xjulticanquil xcamic li Cristo
18Nak nequeꞌrabi resil lix camic li Cristo chiru li cruz, ma̱cꞌaꞌ na-oc cuiꞌ chiruheb li teꞌxic saꞌ xbalba. To̱ntil naꞌleb aꞌan chanqueb. Aban chiku la̱o li ac xocoleꞌ kꞌaxal lokꞌ aꞌan xban nak aꞌan xcuanquil li Dios. 19Joꞌcaꞌin tzꞌi̱banbil retalil saꞌ li Santil Hu:
Tinsacheb xcuanquil li cuanqueb xnaꞌleb xjuneseb rib. Tintzꞌekta̱na xcꞌaꞌuxeb li nequeꞌrecꞌa rib nak cuanqueb xnaꞌleb. (Isa. 29:14)
20Chiru li Dios ma̱cꞌaꞌ nequeꞌoc cuiꞌ li cuanqueb xnaꞌleb xjuneseb. Ma̱cꞌaꞌ nequeꞌoc cuiꞌ laj tzolonel. Ut ma̱cꞌaꞌ nequeꞌoc cuiꞌ li nequeꞌxnau a̱tinac chirix lix naꞌleb li ruchichꞌochꞌ. Lix naꞌleb li ruchichꞌochꞌ to̱ntil naꞌleb ut ma̱cꞌaꞌ na-oc cuiꞌ chiru li Dios. 21Li Dios naxnau chixjunil. Ac cuan saꞌ xchꞌo̱l li Dios nak li cuanqueb saꞌ ruchichꞌochꞌ ma̱ jaruj teꞌxtau ru xnaꞌleb li Dios yal xjuneseb rib. Joꞌcan nak quiraj xcolbaleb li teꞌpa̱ba̱nk re li resil li colba-ib usta cuan li nequeꞌyehoc re nak to̱ntil naꞌleb li yo̱co chixjulticanquil che̱ru chirix li Cristo. 22Aꞌin to̱ntil naꞌleb chiruheb laj judío xban nak teꞌraj nak ta̱cꞌutekꞌ junak milagro chiruheb. To̱ntil naꞌleb chiruheb li ma̱cuaꞌeb aj judío xban nak caꞌaj cuiꞌ xnaꞌleb li ruchichꞌochꞌ nequeꞌxqꞌue xcuanquil. 23Aban la̱o nakachꞌolob xya̱lal nak li Cristo quicam chiru li cruz re kacolbal. Abanan li ca̱mc chiru cruz xuta̱nal chiruheb laj judío ut incꞌaꞌ nequeꞌraj xtaubal xya̱lal lix camic li Cristo. Joꞌcan nak chiruheb laj judío lix ya̱lal lix camic li Cristo chanchan jun li pec nequeꞌxtich rokeb chiru. Joꞌcan ajcuiꞌ chiruheb li ma̱cuaꞌeb aj judío, lix ya̱lal lix camic li Cristo to̱ntil naꞌleb chiruheb. 24Abanan chiku la̱o li sicꞌbil ku xban li Dios, usta la̱o aj judío usta ma̱cuaꞌo aj judío, riqꞌuin xcamic li Cristo chiru cruz nakil xcuanquil li Dios nak coxcol ut nakanau chic chanru xnaꞌleb li Dios. 25Kꞌaxal cuiꞌchic cuan xnaꞌleb li Dios chiruheb li cui̱nk usta yal to̱ntil naꞌleb chiruheb li incꞌaꞌ nequeꞌpa̱ban. Usta nequeꞌxye nak ma̱cꞌaꞌ xcuanquil li Dios, kꞌaxal cuiꞌchic nim xcuanquil chiru xcuanquileb li cui̱nk. 26Ex herma̱n, cheqꞌue retal chanru cuanquex nak quisiqꞌueꞌ e̱ru xban li Dios. Moco nabalex ta cuan e̱naꞌleb joꞌ xnaꞌleb li ruchichꞌochꞌ. Moco nabalex ta li cuan e̱lokꞌal ut incꞌaꞌ nabaleb saꞌ e̱ya̱nk cuanqueb xcuanquil saꞌ xcꞌabaꞌeb lix naꞌ xyucuaꞌ. 27Li ma̱cꞌaꞌeb xnaꞌleb chiruheb li cui̱nk, li Dios quixsiqꞌueb ru re nak teꞌcꞌutekꞌ xxuta̱neb li cuanqueb xnaꞌleb saꞌ ruchichꞌochꞌ. Ut li ma̱cꞌaꞌeb xcuanquil saꞌ ruchichꞌochꞌ li Dios quixsiqꞌueb ru re nak teꞌcꞌutekꞌ xxuta̱neb li cuanqueb xcuanquil saꞌ ruchichꞌochꞌ. 28Li Dios quixsiqꞌueb ru li tzꞌekta̱nanbileb li ma̱cꞌaꞌeb xlokꞌal ut li incꞌaꞌ nequeꞌqꞌueheꞌ xcuanquil xbaneb li cuanqueb saꞌ li ruchichꞌochꞌ. Quixsiqꞌueb ban ru re xcubsinquil xcuanquileb li cuanqueb xnaꞌleb saꞌ ruchichꞌochꞌ. 29Quixba̱nu chi joꞌcaꞌin re nak ma̱ ani tixnimobresi rib chiru li Ka̱cuaꞌ. 30Yal xban rusilal li Dios nak junajex chic riqꞌuin li Jesucristo. Li Jesucristo quixakaba̱c xban li Dios re xqꞌuebal kanaꞌleb. Quixakaba̱c chixti̱cobresinquil li kachꞌo̱l chiru li Dios ut chikasantobresinquil. Ut saꞌ xcꞌabaꞌ li Cristo cuybil sachbil li kama̱c. 31Joꞌcan nak caꞌaj cuiꞌ li Ka̱cuaꞌ takanimobresi. Joꞌcaꞌin tzꞌi̱banbil retalil saꞌ li Santil Hu: Mikanimobresi kib. Chikanimobresihak ban xcuanquil li Ka̱cuaꞌ.
Currently Selected:
1 Corintios 1: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.