Kutuuka 1
1
VaIsalele vavayandesa na muuka mu Ingito
1Awa akewo mazina a vana va Yakomba va vanalume vaje vaaile navo ku Ingito, munu na munu na naanga yendi, mazina avo, 2Luvena, na Simyoni, na Levi, na Yunda, 3na Isakale, na Zembuloni, na Mbenjemani, 4#Kus 46:8-27 na Ndani, na Nafetali, na Ngande, na Ashele. 5Vatekulwila va Yakomba voshe vapwile makumi atanu na avali. Yosefa ikeye wakele laja mu Ingito. 6Omo kwetile simbu, Yosefa amo na vandolome vendi voshe na cisemwa cavo coshe vatsile, 7#Vil 7:17 oloni vatekulwila vavo, vaIsalele, vakitile nakutuma manene, co vapwile vaka-nzili, ngecivene, vatumine mu lifuti lya Ingito mwoshe.
8 #
Vil 7:18
Asinoni mwene wamuhwa, uje kazivukile Yosefa, washwanene mu Ingito. 9Ikeye wendekele kuli vanu vendi ngwendi, “Ava vaIsalele vanakiti nakutuma manene, valinakutuzivisa lyova. 10#Vil 7:19 Ngecivene, tuvakwateleni mana kutewa vakatuma manene, co cikapwa ngeci omo nzita ikaija amo vakalipandakana na vitozi vetu nakutulwisa, co vakavomboloka nakutunda mu lifuti.” 11Ngecivene, vaka-Ingito vaakele vantwama vaka-kupangesa ngeci vayandese vaje vanu nakupangesa mwamuvi vaIsalele. VaIsalele vatungilile mwene vinganda vivali, Pitome na Lamesese kupwa vishete vyakutulikila vyakulya. 12Nameme vaka-Ingito vayandesele manene vaIsalele, oloni vaIsalele vakitile manene nakushandokela mu lifuti mwoshe. Ngecivene, vaka-Ingito vakele na lyova ali vaIsalele. 13Co vaka-Ingito vapangesele vaIsalele na muuka na cikela, 14vavaanene vipangi vyakukaluwa vyakutika vuma nakulinga ndopi, nakupanga mu mahya avo. Voshe vavasindiiye kupanga vipangi vyakama kujeneka kuvazivila mema ku mbunge.
15Asinoni mwene wa Ingito wendekele kuli vifungwizi va vaHevelu mazina avo, Shifela, na Puwa, 16ngwendi, “Omo mulinga vufungwizi ali vanakazi va vaHevelu, nga vakita mwana wa munalume, co mutsiyeni, oloni nga wa munakazi mweceleni ayoye.” 17Oloni vaje vifungwizi vakomokele Njambi, kuvalingile ngwe muje mwashikile mwene, vecelele na vimbututu va vanalume vayoye. 18Co mwene wasanene vaje vifungwizi wavehwile ngwendi, “Omwo vikajo munalingi eci? Omwo vikajo mulinakwecelela vimbututu va vanalume vayoye?”
19Vamukumbulwile ngwavo, “Vanakazi va vaHevelu kuvalifwile ngwe vanakazi va vaka-Ingito embwe, omwo vakevo vatakama. Co vakakiti vwasi-vwasi simbu kanda cifungwizi ete kuli vakevo.” 20Ngecivene, Njambi walingile mwamuvwa kuli vaje vifungwizi vavali, vaIsalele vakele nakukita nakutuma manene. 21Co capwile ngeci omwo vifungwizi vakomokele Njambi, co Njambi wavezikisile vinaanga. 22#Vil 7:19 Asinoni akukotoka mwene washikile vanu vendi voshe ngwendi, “Vana va vaHevelu va vanalume voshe vombileni mu Ndonga ya Nailo, oloni eceleni lika vimbututu va vanakazi vayoye.”
Currently Selected:
Kutuuka 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006