Kutuuka 2
2
Kusemuka kwa Mosesa
1A simbu ije kwakele munalume wa ku muyati wa Levi ikeye wambatele munakazi wa ku muyati wendi. 2#Vil 7:20; VaHe 11:23 Co uje munakazi wakele na kafumba, wakitile mwana wa munalume. Omo wamwene vuvwa vwa uje mbututu, co wamushwekele vingonde vitatu. 3Oloni omo kasele oni kumushweka simbu yakama, wanonele mutonga wakutunga na mahongo, wausatele na lipombosiwa ngeci mema kesi akovelemo. Co waakelemo mbututu, asinoni waumbwatekele ku ngenge ya ndonga mu cihongo. 4Co ndokazi ya mbututu wemanene alyala kamandondo mukukengelela vika vikalingiwa ali mbututu. 5Omo muna vamwene wezile ku ndonga nakujwela, vangamba vendi vendele ku ngenge ya ndonga. Co ikeye wamwene mutonga mu cihongo, co watumineko mumbanda wa ndungo ngeci akaunone. 6Muna mwene waufukwile, wamwene muli mbututu wa munalume alinakulila, co wamuzivilile mema ku mbunge, wendekele ngwendi, “Ou ikeye umo wa vimbututu va vaHevelu.”
7Asinoni ndokazi ya uje mbututu washwenyele kuyehi wehwile ngwendi, “Mutava njiye njikamisanene munakazi umo wa kaHevelu ngeci akumilelele ou mbututu ndi?”
8Co muna mwene wamukumbulwile ngwendi, “Eyo zambula.” Co uje mumbanda waile wakashakele vaina ya mbututu vene. 9Muna mwene walekele uje munakazi ngwendi, “Ambata ou mbututu ukanjileleleye, njikakufweta.” Ngecivene, uje munakazi wambatele uje mbututu wakamulelele. 10#Vil 7:21 Co omo mwanike wakolele, wamutwalele kuli muna mwene, wamupwisile munendi. Muna mwene wamulukile lizina lya Mosesa ngwendi, “Njamujavulwile mu mema, ngeci njamuluku lizina lyendi Mosesa.”#2:10 MOSESA: Lizina eli linalifu na lizina lya mu ciHevelu ngwavo, kujavulula.
Mosesa avombolokela ku Mindyani
11 #
VaHe 11:24
Litangwa limo omo Mosesa nakolo laja, waile nakusikamesa vavushoko vwendi vaHevelu, wamwene tuyando twavo omo vakele nakuvasindiya nakuvapangesa vipangi vyavikalu. Co wamwene lalo umo kaIngito alinakupupa kaHevelu ka vushoko kendi. 12Mosesa wakengele noku-noku, kamwene munu naumo wai, co watsiile uje kaIngito washitikile muvila wendi mu lishen̄avu. 13Alikaki lalo welukilileko, wamwene vaHevelu vavali va vanalume valinakulwa. Co wendekele kuli uje waviisile ngwendi, “Omwo vikajo ulinakupupanga mukweni kaHevelu ngacije?”
14 #
Vil 7:23-28
Co uje munalume wamukumbulwile ngwendi, “Iyajo nakupwisa muka-kushwana nambe muka-kusompa akati ketu? Kuma yove ushaka kunjitsiya ngwe muje muunatsiile uje kaIngito ndi?” Co Mosesa wakele na lyova, co walyendekesele ikeye vavenya ngwendi, “Kuma vanu vanazivuka eci njinalingi.” 15#Vil 7:29; VaHe 11:27 Co omo mwene wazivile vije vyalingiwile, washakele kutsiya Mosesa, oloni Mosesa watewele, wakakele ku lifuti lya Mindyani.
Mosesa watumbamene ku lisima. 16Co muka-kukombelela wa ku Mindyani wakele na vana vendi vatanu na vavali va vanakazi. Co vaje vambanda vezile nakutekula mema. Vashulisile mato muje vakele nakunwila vimanga na vimembe va ishavo. 17Co tunyungi vamo vezile nakusheka vana va Yetolo, oloni Mosesa wakatukile nakuvamena, co wanwisile vutanga vwa vana va Yetolo. 18Omo velukile kwimbo, co ishavo wavehwile ngwendi, “Omwo vikajo muneluka vwasi litangwa lya lelo?”
19Co vamukumbulwile ngwavo, “KaIngito umo natwamena kuli vaje tunyungi vaka-kutuvindika. Ikeye natutekwilako mema nakunwisa vimuna vetu.”
20Yetolo wehwile vana vendi va vanakazi ngwendi, “Ikeye ali kuli? Vikajo munasezela owo munalume? Yeniko mukamusane twakulye nendi.”
21Ngecivene, Mosesa watavele kukala na Yetolo, co Yetolo wamwanene munendi wa munakazi Zipola ngeci amwambate. 22Co wakitile nendi mwana wa munalume wamulukile lizina lyendi Ngeleshome ngwendi, “Yange nji muka-kwija mu lifuti lya vungenzi.”
23Co omo kwetile myaka yaingi, mwene wa Ingito watsile. Oloni vaIsalele vakele nakukemanga omwo ya vundungo vwavo, vakele nakutambeka ngeci vavakwase. Co mutambi wavo wetele kuli Njambi. 24#Kus 15:13-14 Njambi wazivile kukemanga kwavo, wanukile cikumiiyo cendi na Avilahama, na Isake, na Yakomba. 25Ngecivene, Njambi wamwene vundungo vwa vaIsalele, co wavazivilile mema ku mbunge.
Currently Selected:
Kutuuka 2: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006