Loma 16
16
Viindu vya Paulu kuli vanu vamo va mu Loma
1Njikundika ndokazi yetu Fwivi kuli yeni, muka-kupangela cikungulukilo ca ku Senkili, 2ngeci mumutambule mu lizina lya Mwene, ngwe muje muvakalingi vanu va Njambi, co mukwaseni vyoshe vije ashaka kuli yeni, omwo ikeye vavenya wapwa musamba wamuvwa kuli vanu vavangi na kuli yange lalo.
3 #
Vil 18:2
Njilinakutuma viindu kuli Pilisila na Akwila, vaka-kupanga nange mu vipangi vya Kilistu Yesu, 4vakevo vecelele myonyo yavo omwo yange. Njinavakandelela, kesi yange lika, oloni lalo na vikungulukilo vyoshe vya vaje kesi vaYunda. 5Viindu lalo ku cikungulukilo ca vaje vakakungulukila mu njuvo yavo.
Viindu kuli musamba wange Epaenetase, uje wapwile munalume wakulivanga kukulaela kuli Kilistu mu lifuti lya Asiya. 6Viindu kuli Maliya, uje wamipangelele manene. 7Viindu lalo kuli Andolonikase na Njuniyase,#16:7 NJUNIYASE: Nambe, Njuni, kunungulula kumo ngwavo, Njulya. vakwetu vaYunda vaje mutwakelelele mu kamenga, vapwa vakutsimana akati ka miluwa, co vapwile vaka-Yesu simbu kanda yange njikulaele.
8Viindu kuli Ampilyatase, musamba wange a kulitombola muli Mwene. 9Viindu lalo kuli Ambanase, mukwetu mu vipangi vya Kilistu, na kuli Sitachise musamba wange. 10Viindu kuli Apelese, uje kulongwa kwendi kuli Kilistu vanacishangala. Viindu kuli vaje vanakundama ku naanga ya Alisitombolase. 11Viindu kuli Helondyone, mukwetu kaYunda, na kuli vakwetu muli Yesu mu naanga ya Nasisase.
12Viindu vyange kuli Talafaena na kuli Talafosa vaje vapanga mu vipangi vya Mwene, na kuli musamba wange Pelesise, uje nalingi manene vipangi vya Mwene. 13#Mak 15:21 Viindu kuli Lufase, wakwangula mu vipangi vya Mwene, amo na vaina, vaje vakele nakunjinyunga ngwe nji munendi. 14Viindu kuli Asinikilitase na Felengone na Helemese na Patolombase na Helemase na vakwetu voshe muli Yesu vali amo navo. 15Viindu kuli Filolongase na Njulya na Nelyase na ndokazi yendi na kuli Olimpase na kuli vanu voshe va Njambi vaje vali amo navo.
16Liindwiseni umo na mukwavo nakulitsemba kwa kwoloka. Vikungulukilo vyoshe vya Kilistu vanatumu viindu vyavo kuli yeni.
Vilongesa vyakumanesela
17Njimilambelela vakwetu ngwange, nyanyameni kuli vaje vanena kulyangunuka nakutanganesa kukulaela kwa vanu nakulwisa vilongesa vije vimwatambwile. Vashondolokeni! 18Omwo voshe vaje valinga vyuma evi kuvesi nakupangela Kilistu Mwene yetu embwe, oloni sholovya yavo lika. Co na majwi avo akukokweya na endekesi yavo yakuseveleka vakwisa vanu vakujeneka mulonga. 19Omwo vanu voshe vanazivi kulongwa kweni ku muzimbu wauvwa, co a cuma eci njilinakuvwaelela ali yeni. Njishaka mupwe vaka-mana ku vyuma vyavivwa, oloni pweni mu vangoco ku vyuma vyavivi. 20Asinoni Njambi, nsina yetu ya kwoloka, ololo akatsena Satana mwisi ya myanja yeni.
Kutetela kwa Mwene yetu Yesu kukale amo neni.
21Timateo, mukwetu mu vipangi, alinakutuma viindu kuli yeni, na Lusiyasi na Njasone na Sosipata vakwetu vaYunda.
22Yange Teshase muka-kusoneka mukanda ou njamitumu viindu muli Mwene.
23Ngayase, muka-kunjijumbula, uje mu njuvo yendi cikungulukilo cikaliwanena, namitumu viindu vyendi, Elasitase muka-kutulika vimbongo vya mu nganda, na ndolome yetu Kwatase, vanatumu viindu vyavo kuli yeni.
24Kutetela kwa Mwene yetu Yesu Kilistu kukale amo neni voshe. Ewa.
Lilombelo lyakushangazala lyakumanesela
25Vumpau vukale kuli Njambi! Ikeye asa kumilingisa ngeci mwimane mbe mukukulaela kweni, ngwe ku Vin̄anda Vyavivwa vinjikambulula vya Mwene Yesu Kilistu, ngwe lalo kukujomboloka kwa vushunga vwakushweka vuje vuvashwekele tunde ku san̄ulu. 26Oloni nameme ngoco ololo vushunga vuje vanavusholola mutanya mwelu mu visoneka vya vaka-kwimanena, nakushika kwa Njambi wa myaka yoshe vanavusholola ku miyati yoshe, ngeci voshe vakulaele nakwononoka.
27Kuli Njambi umolika, uje ikeye lika muka-mana oshe, kukale vumpau ali Yesu Kilistu ku myaka yoshe! Ewa.
Currently Selected:
Loma 16: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006