Nahumi 3
3
1Kuvindama kwakama mu nganda muje muli makuli nakulitsiya,
nganda ije inashulu na vufuko vuje vuvasa kupukula nakwiva!
2Tolilileni! Ncumo ya likote,
nakwoya kwa mavalo a matemba, musindo wa tuvalu, nakujombozoka kwa matemba!
3Vanalume vaka-kwendela a tuvalu vaya kulutwe mukulwa,
mikwale ivyakuma, na makunga avyakuma!
Vivimbi vanalundama mutumbo,
ije naumo wai asa kuvalava,
vanalume valinakutanozokao!
4Cikwizi Nenevayi valinakumunyanyamesa.
Wapwile wamuvwa akumukenga, wakele na vyemba vyavushungu
wakokweyeye miyati nakuvapwisa vindungo.
5Shukulu Kalunga Muka-nzili yoshe alinakwendeka ngwendi,
“Njikakunyanyamesa yove Nenevayi!
Njikakushulula wende mutotototo nakutava
miyati ya vanu ngeci vakumone,
vamone shwamwa yove yoshe.
6Njikakukwita mazilo, co njikakupwisa muka-vunyengwe.
Co vanu vakakukenga na vunyengwe.
7Voshe vaje vakakumona vakakutewa na vunyengwe.
Vakendeka ngwavo, ‘Nganda ya Nenevayi vanainyongesa!
Iyajo amuzivilako mema ku mbunge?
Iyajo atava kumuzembeleka?’ ”
8Nenevayi, kuma yove unatuvakana Tevese nganda yakama ya Ingito? Na ikeye lalo wakele na ndonga mukuyinyunga ngwe civumbe, Ndonga ya Nailo yapwile cimpaka cendi. 9Washwanene lifuti lya Sundane#3:9 SUNDANE: Mu ciHevelu lijwi eli Sundane likeyo Etopia. na Ingito, kukwesi na aje ahwililile nzili yendi, Limbiya wapwile muka-kumukwasa. 10Oloni vanu va ku Tevese vavatwalele mu vunzinda. Vana vavo vavapupile nakuvatsiila a masambwa-ngila. Vanalume vavo va kasingimiko vavakutile malyenge nakuvatwala nakulipangezelavo akati ka vaje vavakwatele.
11Nenevayi, nove lalo ukapwa mukupenda! Nove lalo ukavomboloka ku vitozi vove. 12Co vimpaka vyove vyoshe vikapwa ngwe miti ya mikuyu ili na vushuka vwakulivanga kuhya, nga uningangesa muti, co vushuka vuwila mu kanwa kove! 13Mashwalale vove vanapu ngwe vanakazi, co lifuti lyove kulyesi na cimpaka cakulinyunga ku vitozi vove. Tuhya tukanyongesa mikambo inakikasana ku vikolo vyeni. 14Tekwila mema cimweja simbu kanda nganda vaizengeleke, co kolesa vimpaka vyove! Shinga livu ngeci upange ndopi, co vwaesela cimweja mwakutikila ndopi! 15Nameme ulinga cuma cika, anga vene vakakwenyeka nambe vakakutsiila mu nzita. Vakakunyongesa ngwe vimbuto vije vivanali vimbimba. Mwatumine manene ngwe vimbimba! 16Watumisile manene vaka-kulandulula kutuvakana vingongonosi vya mwilu! Oloni ololo voshe vanai, ngwe vimbimba vaje vajangumuna mambava avo, co vapulula vaya. 17Vamyata vove vanafu ngwe njame ya vimbimba vaje vakala a vivumbe omo kunatonola. Oloni omo litangwa lituuka, co vapulula vaya, co naumo wai azivuka kuje kuvanaila!
18Mwene wa Asilya, vanguvulu vove na vanu vove va kasingimiko vanatsi! Vanu vove vanashandokela a munkinda, co naumo wai avelwisa lalo kwimbo. 19Kukwesi cemba cakukwita a vimbandu vyove caiko, co lalo naumo wai asa kusaka vimbandu vyove. Vaje voshe vaziva muzimbu wakunyonga kwove vajolela nakutwa tuwelele. Naumo wai waputumukile ku muuka wove.
Currently Selected:
Nahumi 3: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006