2 Vimyene 2
2
Elinja vamutwala mwilu
1Simbu yetele ngeci Shukulu Kalunga atwale Elinja mwilu mu kakundu-kundu. Elinja na Elisha vatundile ku Ngilingale, 2co a ngila Elinja wendekele kuli Elisha ngwendi, “Sala kuno, Shukulu Kalunga nanjitumu njiye ku Mbetele.”
Oloni Elisha wamukumbulwile ngwendi, “Njilisinga ali Shukulu Kalunga wakuyoya na ali yove ngwange kunjikuseze embwe.” Ngecivene, vaile amo ku Mbetele.
3Co mbunga ya vaka-kwimanena vaje vakele mu Mbetele vaile kuli Elisha vamwihwile ngwavo, “Yove wazivuka ngeci ku litangwa lya lelo Shukulu Kalunga ambata shukulu yove nakumutwala ndi?”
Elisha wakumbulwile ngwendi, “Eyo, njazivuka. Oloni olokeni kuluu.”
4Asinoni Elinja wendekele kuli Elisha ngwendi, “Sala kuno, Shukulu Kalunga nanjitumu njiye ku Yeliko.”
Oloni Elisha wamukumbulwile ngwendi, “Njilisinga ali Shukulu Kalunga wakuyoya na ali yove ngwange kunjikuseze embwe.” Ngecivene, vaile amo ku Yeliko.
5Co mbunga ya vaka-kwimanena vaje vakele mu Yeliko vaile kuli Elisha vamwihwile ngwavo, “Yove wazivuka ngeci ku litangwa lya lelo Shukulu Kalunga ambata shukulu yove nakumutwala ndi?”
Elisha wakumbulwile ngwendi, “Eyo, njazivuka. Oloni olokeni kuluu.”
6Co lalo Elinja wendekele kuli Elisha ngwendi, “Sala kuno, Shukulu Kalunga nanjitumu njiye ku Ndonga ya Yondau.”
Oloni Elisha wamukumbulwile ngwendi, “Njilisinga ali Shukulu Kalunga wakuyoya na ali yove ngwange kunjikuseze embwe.” Ngecivene, vaile amo ku Ndonga ya Yondau, 7vaka-kwimanena makumi atanu vavakavele ku Ndonga ya Yondau. Elinja na Elisha vemanene ku ngenge ya ndonga, co vaje vaka-kwimanena makumi atanu vemanene alyala kamandondo. 8Co Elinja washulwile cikoveyo cendi, wacizengele, wacipupile a mema, co mema alyangunukile akati, co nendi na Elisha vajavukilile musambwa a livu lyakuma. 9#Kwi 21:17 Omo vanajavuka laja, Elinja wendekele kuli Elisha ngwendi, “Njileke viwushaka ngeci njikulingilevyo simbu kanda vanjitwale mwilu.”
Elisha wamukumbulwile ngwendi, “Njitave njitambule mutamba wa nzili yove ije ikanjipwisa shwana yove.”
10Co Elinja wamukumbulwile ngwendi, “Unalombo cuma cacikalu. Oloni ukacitambula nga umona vanjitwala mwilu kulyangunuka nove. Nga kuunjimono, co kuukacitambula.”
11Vakele nakusimutwiya oku valinakwenda, co vwasi-vwasi kwezile litemba lya tuhya lije livakokele tuvalu va tuhya, co Elinja vamutwalele mwilu na kakundu-kundu. 12#2 Vim 13:14 Omo Elisha wamwene evi, co watambekelele Elinja ngwendi, “Tate, tate muka-kwamena wa nzili wa Isalele unai!” Co kamumwene lalo embwe.
Co mu vusiwa, Elisha watavwile cikoveyo cendi vimbazuvwila vivali. 13Asinoni Elisha wanonele cikoveyo ca Elinja cije cawisile, co welukile wemanene ku ngenge ya Ndonga ya Yondau. 14Co wapupile cije cikoveyo a mema wendekele ngwendi, “Shukulu Kalunga Njambi ya Elinja ali kulijo?” Co welukililemo lalo kupupa a mema, mema alyangunukile, co wajavukile nakuya musambwa. 15Vaka-kwimanena makumi atanu vatundile ku Yeliko vamwene vije vyalingiwile, vendekele ngwavo, “Nzili ya Elinja ili ali Elisha!” Co vaile nakuliwana nendi, vatsikamene ku mesho endi nakumulemesa, 16co vendekele ngwavo, “Yetu tunapu makumi atanu, tuvavoshe tunapu vanalume va nzili. Tuye tukashakezeke shukulu yove. Amo munzinzime wa Shukulu Kalunga unamutwala kulyala, co unamuseze a munkinda nambe mu cana.”
Elisha wavakumbulwile ngwendi, “Embwe, kesi muyeko.”
17Oloni vakevo vamusindiiye noo wavatavele, co vaile. Vaje vanalume makumi atanu vaile nakushakezeka Elinja matangwa atatu oloni kuvamuwanene. 18Asinoni velukile kuli Elisha, ikeye wavavandamenene ku Yeliko, co wendekele kuli vakevo ngwendi, “Kuma kunjamilekele ngwange kesi muyeko ndi?”
Vikomokeso vya Elisha
19Vanalume vamo vatundile ku Yeliko vaile kuli Elisha nakwendeka ngwavo, “Mwane, ngwe muuzivuka, ino nganda yapwa yaivwa manene, oloni mema apwa amavi manene, co akajombwesa limbo vaka-kwimita.”
20Ngecivene, Elisha washikile ngwendi, “Akeni mwongwa mu lilonga lyaliha, lineneni kuli yange.” Co valinenele kuli ikeye, 21co waile ku lisima lya kavwelu-vwelu, wetilile mwongwa mu mema, co wendekele ngwendi, “Shukulu Kalunga ngwendi, ‘Njijelesa mema awa, co kuwakanene lalo kutsa nambe kujombwesa limbo kuli vaka-kwimita embwe.’ ” 22Kutunda aje vene mema apwile amavwa, ngwe vene muje mwendekele Elisha.
23Co Elisha watundile ku Yeliko waile ku Mbetele, co a ngila vanike va vanalume vamo vatundile mu nganda vamushendumwine. Vatambekele ngwavo, “Tunda kuno, ove munalume wa lyandya!”
24Co Elisha watengulukile, wavakengele na vukalu, wavasingile mu lizina lya Shukulu Kalunga. Co mu shwata mwatundile vambeya#2:24 VAMBEYA: Vambeya vapwa tusitu vakama vavukalu vakufwa ngwe vindumba. vavali va lwavo, vezile nakusanyozola vanike va vanalume vakupwa makumi awana na vavali. 25Elisha watundile kuje, co walamatele a Munkinda wa Kalemele, asinoni welukile ku Samaliya.
Currently Selected:
2 Vimyene 2: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006