2 Mizimbu 2
2
Solomoni alivwaesela kutunga Njuvo ya Shukulu Kalunga
(1 Vim 5:1-18)
1Mwene Solomoni wayongwele kutunga Njuvo ya Shukulu Kalunga muje mwakumulemesela, nakutunga lalo lipela lyendi. 2Co Solomoni waakele vanalume vakupwa 70,000 ku vipangi vyakututa vivala, co vanalume vakupwa 80,000 ku vipangi vyakushonga mamanya. Co lalo kwakele vanalume vakupwa 3,600 vakulunu va vipangi.
3Co Solomoni watumine lijwi kuli Mwene Hilame wa ku Tile ngwendi, “Njikwase ngwe muwakwasele tate, Mwene Ndaviti, omo wamulandesele viti vya kendale vyakutungisa lipela lyendi. 4Njilinakutunga Njuvo ya Shukulu Kalunga mukusingimika Shukulu Kalunga Njambi yange. Ikeyo ikapwa mwela wakujela kuje vanu vange nange tukalemesela Shukulu Kalunga nakwenyeka insense yakunika lwengo, kuje kukekwo kutukamutwalela vin̄ombelo vya makende akujela a simbu na simbu, kuje kukekwo kutukamukombelela vin̄ombelo vya kwenyeka a mutondo a mutondo na a cingwezi a cingwezi, na a Matangwa Akuhwima, na a Viwano vya Kutenama kwa Ngonde, na a matangwa eka akujela mukusingimika Shukulu Kalunga Njambi yetu. Ikeye nashiki vaIsalele kulinga ngeci ku myaka yoshe. 5Njinayongola kutunga Njuvo ya Shukulu Kalunga yakama, omwo Njambi yetu wapwa wakama kuhyana vinjambi voshe. 6#1 Vim 8:27; 2 Miz 6:18 Nameme ngoco naumo wai asa kutungila Njambi Njuvo, omo lilu lya melu oshe lyapwa lyalindondo. Cooni yange iyajo ngeci njitunge Njuvo ya Shukulu Kalunga, ije ya seo kuvanga lika mwela wakumwenyekela insense? 7Ngecivene, ololo njitumine munalume uje ali na vutongwe vwakushonga mamanya, nakupangesa ngolinde na siliva na vunengu na vutale nakutonga vinanga vyakuzivuluka, nevi vya linyu, nevi vyakuvenguluka. Ikeye akapanga na vatongwe va mu Yunda na va mu Yelusalema vaje vaangwile laja tate Ndaviti. 8Njazivuka vutongwe vwa vanu vove vwakutavula mavaya, ngecivene, njitumineko viti vya kendale na vya sipelese na vya tulipi vya ku Lembanone. Njalivwaesela kutuma vanu vange vakulikwase na vanu vove, 9ngecivene, vanjivwaesele viti vyavingi, omwo Njuvo ya Shukulu Kalunga injinayongola kutunga ikapwa yakama yakukomokesa. 10Co a vyakulya vya vanu vove, njikakutumina vulemu vwakupwa 2,000 vwa tiliku na vulemu vwakupwa 2,000 vwa mbale ya maumwa, na malita akupwa 400,000 a vinyu na malita akupwa 400,000 a mazi a olive.”
11Mwene Hilame wa ku Tile wakumbulwile Solomoni mu mukanda ngwendi, “Omwo Shukulu Kalunga wazema vanu vendi, co ikeye nakupwisa mwene yavo. 12Shangazaleni Shukulu Kalunga Njambi ya Isalele, uje watangele lilu na asi, co naana Mwene Ndaviti mwana wa mana, wakushula nakuzivisisa na vutongwe, uje ali na vutumbe vwakutunga Njuvo ya Shukulu Kalunga Njambi, na lipela lyendi vavenya. 13Ololo njinatumu munalume wakunyanyama wa vutongwe lizina lyendi Hulame. 14Vaina vapwile va ku muyati wa Ndani, co ishe wapwile wa ku lifuti lya Tile. Ikeye azivuka mwamuvwa kupanga vyuma vyakutunga a ngolinde na a siliva na a vunengu na a vutale na a mamanya na a mavaya. Ikeye azivuka kutunga na vwanda vwakuzivuluka na vwakuvenguluka na vwakuvenga na vwa linyu. Ikeye azivuka kulinga vyuma vyoshe vyakuliseza-seza vyakushonga, co asa kukava cimweso coshe civamuleka ngeci acilinge. Mutave apange amo na vatongwe vove vaje vapangele kuli isho Mwene Ndaviti. 15Ngecivene, ololo tutumine tiliku na mbale ya maumwa na vinyu na mazi a olive vije viwatukulaesele. 16Tukateta miti yoshe iwushaka ya kendale ku minkinda ya Lembanone, tukayikuta mikuta, co vikongumuka na mema a kalunga noo viketa ku Yopa. Omo vinete kuje, co mukavitwala oni ku Yelusalema.”
Kushangumuka kutunga Njuvo ya Shukulu Kalunga
(1 Vim 6:1-38)
17Mwene Solomoni walavele vaka-kwija voshe vaje vakele mu lifuti lya Isalele, ngwe muje mwalavele vanu ishe Ndaviti. Vaka-kwija vatungile muje vapwile 153,600. 18Co waangwile vanu vakupwa 70,000 ku vipangi vyakututa vivala, na vanu vakupwa 80,000 kushonga mamanya mu lifuti lya minkinda, co waangwile lalo vakwavo vakupwa 3,600 vaka-kutwamenena ngeci vipangi vyende mwamuvwa.
Currently Selected:
2 Mizimbu 2: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006