1 Vimyene 2
2
Mashiko a Ndaviti akumanesela kuli Solomoni
1Omo Ndaviti wakele kuyehi na kutsa, wasanene munendi Solomoni, wamushikile mashiko endi akumanesela ngwendi, 2“Simbu yange ya kutsa inete. Pwa muka-kusimpa, co kala na nzili, 3linga vije vyakushika Shukulu Kalunga Njambi yove. Enda mu vingila vyendi nakunyunga vizilika vyendi, na mashiko endi, na vilongesa vyendi, na vukaleo vwendi ngwe muvavisoneka mu Lishiko lya Mosesa, ngeci ukavezike mu vyoshe viwukalinga kwoshe kuukaya. 4Nga umwononoka, co Shukulu Kalunga akanyunga cikulaeso cije walingile omo wanjilekele ngeci vatekulwila vange vakashwana Isalele nga vakanyanyama nakwononoka mashiko endi na mbunge yavo yoshe na mwonyo wavo woshe.
5 #
2 Sam 3:27; 20:10 “Solomoni munange anuka vije vyalingile Yowave kuli yange akutsiya vaka-kushika nzita ya Isalele vavali, Avinele muna Nele, na Amasa muna Njetele. Wavatsiile ngwe vitozi vendi va mu nzita, oloni wacilingile a simbu ya kwoloka. Ali na mulonga, co cili kuli yove kumuhisa. 6Uzivuka mwakulinga, kuwapandele kumwecela ngeci atse mwamuvwa embwe.
7 #
2 Sam 17:27-29
“Oloni mwesa ngozi kuli vana va Mbazilai wa ku Ngilyande nakuvanyunga, vakele na ngozi ali yange omo njatewele ndolome yove Avisalome.
8 #
2 Sam 16:5-13; 19:16-23 “Co kwali lalo Shimei muna Ngela, wa ku limbo lya Mbahulime mu lifuti lya Mbenjemani. Ikeye wanjisingile mwamuvi litangwa lije njaile ku Mahanaime, oloni omo wanjiwanene ku Ndonga ya Yondau, njalingile cikumiiyo ca cikulaeso mu lizina lya Shukulu Kalunga ngwange kunjikamutsii. 9Oloni kuwapandele kumwecela ngoco kujeneka kumunyanyamesa embwe. Uzivuka mwakulinga, co unapande kumona a n̄anda eyi ngeci nendi lalo vamutsiye.”
Kutsa kwa Ndaviti
10Mande ya Mwene Ndaviti yatavukile, co vamutsindile mu Nganda ya Ndaviti. 11#2 Sam 5:4-5; 1 Miz 3:4 Ikeye wapwile mwene wa mu Isalele a myaka makumi awana, washwanene myaka itanu na ivali mu Hevelone na myaka makumi atatu na myaka itatu mu Yelusalema. 12#1 Miz 29:23 Co Solomoni washwanene a litanda lya ishe Ndaviti kupwa mwene, co vumwene vwendi vwakolele manene.
Kutsa kwa Andoniya
13Andoniya, muna Hangite, waile kuli Mbateshemba, vaina ya Solomoni. Co Mbateshemba wamwihwile ngwendi, “Unaija mu kwoloka ndi?”
Co wamukumbulwile ngwendi, “Eyo, njinaija mu kwoloka.” 14Co wendekele lalo ngwendi, “Njili na cuma cimo cakwendeka nove.”
Co Mbateshemba ngwendi, “Cuma mukajo?”
15Co Andoniya wamukumbulwile ngwendi, “Yove wazivuka ngeci yange njapandele kupwa mwene, co munu woshe mu Isalele navandamenene eci. Oloni kucalingiwile, co shongo yange ikeye napu mwene omwo eci cinapu cizango ca Shukulu Kalunga. 16Ololo njili na cuma cimo cakulomba, shukulu kesi unjivyane embwe.”
17 #
1 Vim 1:3-4
Mbateshemba wamwihwile ngwendi, “Vikajo ulomba?”
Co wamukumbulwile ngwendi, “Shukulu njihwile kuli Mwene Solomoni, njazivuka ngwange kasa kukuvyana embwe, ngeci anjitave njambate Avishange, mumbanda uje wa ku Shuneme, apwe munakazi wange.”
18Mbateshemba wamukumbulwile ngwendi, “Mwamuvwa, njikakwendekelako kuli mwene.”
19Ngecivene, Mbateshemba waile kuli mwene nakwendeka vyakwimanena Andoniya. Co mwene wemanene nakukandelela vaina. Asinoni watumbamene mu litanda lyendi, vanenele litanda likwavo muje vatumbamene vaina ku livoko lyendi lya cilyo. 20Vaina vendekele ngwavo, “Kuli koma kamo kakandondo njinaija nakulomba, kesi unjivyane embwe.”
Co mwene wehwile ngwendi,
“Koma mukajo nana? Kunjasa kumyuminako.”
21Co wamukumbulwile ngwendi, “Tava munyanyoko Andoniya ambate Avishange apwe munakazi wendi.”
22Mwene wamukumbulwile ngwendi, “Omwo vikajo ulombela Andoniya kumwana Avishange? Kuma yove wasa kumulombela lino litanda lya vumwene. Co a vyoshe evi, ou munu lalo wapwa mukulunu wange, Aviyatale muka-kukombelela na Yowave vakevo vanamwimanena!” 23Solomoni walisingile mu lizina lya Shukulu Kalunga ngwendi, “Njambi anjihise njitse nga kunjitsii Andoniya omwo nalombo cuma eci! 24Shukulu Kalunga nanjikolesa ngo a litanda lya tate Ndaviti, co nanyungu cikulaeso nakunjana vumwene yange na vatekulwila vange. Njalisingi a lizina lya Shukulu Kalunga wakuyoya ngeci Andoniya napande kutsa ku litangwa lya lelo vene!”
25Ngecivene, Mwene Solomoni washikile Mbenaya kutsiya Andoniya, co Andoniya watsile.
Aviyatale vamusheka, co Yowave atsa
26 #
1 Sam 22:20-23; 2 Sam 15:24 Asinoni Mwene Solomoni wendekele kuli Aviyatale muka-kukombelela ngwendi, “Ya ku lifuti lyove ku Anatote. Unapandele kutsa, oloni kunjikutsii ololo embwe, omwo yove wambatele Cikasa ca Cikumiiyo ca Shukulu Kalunga amo na tate Ndaviti, co wayandele amo nendi mu vukalu vwendi vwoshe.” 27#1 Sam 2:27-36 Ngeci Solomoni watundisile Aviyatale mu vipangi vya vuka-kukombelela kuli Shukulu Kalunga, ngwe muje mwendekele Shukulu Kalunga ku Shilo ali Eli muka-kukombelela na vatekulwila vendi cipwe ca vushunga.
28Co Yowave wazivile vije vyalingiwile. (Ikeye wemanenene Andoniya, oloni kesi Avisalome embwe.) Ngecivene, watewelele ku Mbalaka Mwakuliwanena, co wakwatele ku vimbinga vya ku mutula. 29Omo muzimbu wetele kuli Mwene Solomoni ngeci Yowave natewela ku Mbalaka, ali kumukulo wa mutula, co Solomoni watumine muluwa nakumwihula omwo vikajo natewela ku mutula. Yowave wamukumbulwile ngwendi natewela kuli Shukulu Kalunga omwo nazivi lyova lya Solomoni. Ngecivene, Mwene Solomoni watumineko Mbenaya mukutsiya Yowave. 30Mbenaya waile ku Mbalaka Mwakuliwanena wendekele kuli Yowave ngwendi, “Mwene nashiki ngeci utuukemo.”
Oloni Yowave wamukumbulwile ngwendi, “Embwe, njikatsila muno vene.”
Mbenaya welukilile lalo kuli mwene nakumuleka vije vyendekele Yowave.
31Co Solomoni wamukumbulwile ngwendi, “Linga mwanendeka. Mutsiye, co umutsinda. Cooni nambe yange nameme vatekulwila vakwavo va Ndaviti kuvakakala na mulonga ali evi vyalingile Yowave omo watsiile vanu vakujeneka mulonga. 32Shukulu Kalunga akahisa Yowave omwo watsiile vanu kwakujeneka tate Ndaviti kuzivuka. Yowave watsiile vanu vavali vakujeneka mulonga vaje vapwile vanu vavavwa kutuvakana ikeye, Avinele, muka-kushika nzita ya Isalele, na Amasa, muka-kushika nzita ya Yunda. 33Cihiso ca monde yavo cikale a mutwe wa Yowave na vatekulwila vendi myaka yoshe. Oloni Shukulu Kalunga simbu yoshe akakwasa vatekulwila va Ndaviti vaje vatumbama a litanda lyendi.”
34Ngecivene, Mbenaya waile ku Mbalaka Mwakuliwanena nakutsiya Yowave, co vakamutsindile kwimbo lyendi mushandangala yangoco. 35Co mwene wengisile Mbenaya kupwa muka-kushika nzita mu mwela wa Yowave, co wengisile lalo Zandoke kupwa muka-kukombelela mu mwela wa Aviyatale.
Kutsa kwa Shimei
36Asinoni mwene wasanene Shimei wamulekele ngwendi, “Tunga njuvo yove muno mu Yelusalema, ngeci ukalemo, co kesi utunde muno mu nganda. 37Nga utundamo nakuya musambwa ya muna ndonga Kindelone, mwa vushunga vene ukatsa, co mulonga ukapwa wove vavenya.”
38Co Shimei wakumbulwile ngwendi, “Mwamuvwa manene, shukulu, njikalinga vene ngwe muunendeka.” Ngecivene, Shimei wakele mu Yelusalema simbu yakama.
39Co capwile ngeci, omo myaka itatu yetile, vangamba vavali va Shimei vatewelele kuli Akishe muna Maka mwene wa ku Ngate. Omo Shimei wazivile ngeci vali mu Ngate, 40co walondele a cimulu cendi waile kuli Mwene Akishe ku Ngate, mukutonda vindungo vendi. Co wavawanene, wavelwisile kwimbo. 41Omo Solomoni wazivile vije vyalingile Shimei, 42co wamusanene wendekele ngwendi, “Njakusingisile mu lizina lya Shukulu Kalunga ngeci kesi utunde muno mu Yelusalema. Co njakunangwile ngeci nga ulingamo, co mwa vushunga ukatsa. Kuma kesi yove watavele nakwendeka ngeci unapande kunjononoka ndi? 43Ngecivene, omwo vikajo wapokwela cisingo cove kujeneka kwononoka mashiko ange? 44Wazivuka mwamuvwa vuvi vwoshe vuje vuwalingile kuli tate Ndaviti. Shukulu Kalunga akakuhisa a eci. 45Oloni akanjivezikisa, nakunyunga vumwene vwa Ndaviti ku myaka yoshe.”
46Co Mwene washikile Mbenaya kuya mukutsiya Shimei. Cooni vumwene vwa Solomoni vwakolele manene.
Currently Selected:
1 Vimyene 2: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006