1 Kolinte 2
2
Lijwi ali Kilistu wakushukika
1Omo njezile kuli yeni, vasamba vange, nakwambulula vushunga vwa Njambi vwakushweka#2:1 VUSHUNGA VWA NJAMBI VWAKUSHWEKA: Kunungulula kumo ngwavo, vukaleo vwa Njambi. kunjapangesele majwi akama, nambe kumwesa kulilongesa kwange kwakama. 2Omwo simbu njakele neni, njevalele vyuma vyoshe kuvanga Yesu Kilistu, co manene kutsa kwendi a cilindakano. 3#Vil 18:9 Ngecivene, omo njezile kuli yeni, njazeyele nakujaja na lyova, 4co kulongesa kwange na muzimbu wange kuvyakele njavyanene na majwi a vutongwe a mana a vanu, oloni na cizivukiso ca nzili ya Munzinzime wa Njambi. 5Ngecivene, kukulaela kweni kesi kukundame ku mana a vanu oloni a nzili ya Njambi.
Mana a Njambi
6Oloni njambulula muzimbu wa mana kuli vaje vanakolo mu munzinzime. Oloni kesi mana aje anakundama muno mu kaye nambe ku vaka-kushwana va kaye kano, vaka-kushwana vaje nzili yavo ilinakuvatunda. 7Mana awa njambulula anapu mana a Njambi akushweka, aje vanashwekesela vanu, oloni Njambi waangwile laja ku vumpau vwetu simbu kanda vatange kaye. 8Naumo wai muka-kushwana wa ano a kaye wazivukile mana awa. Nga vawazivukile, nga kuvashukikile Mwene wa vumpau. 9#Isa 64:4 Nameme ngoco, ngwe muvyendeka visoneka ngwavyo,
“Vije naumo wai wavimwene nambe kuviziva,
vije naumo wai waviyongwele ngeci vikalingiwa,
vikevyo vyuuma vije vyavwaeselele Njambi vaje vamuzema.”
10Oloni Njambi natusholwela vyakushwekesa ali Munzinzime wendi. Munzinzime akashakezeka vyuma vyoshe, nameme vizango vya Njambi vyakulova. 11Omwo Munzinzime wetu lika uje ali muli yetu ikeye lika azivuka vyetu vyoshe, mu ngila eyi vene, kuvanga Munzinzime wa Njambi ikeye azivuka vyoshe vya ali Njambi. 12Kutwatambwile munzinzime wa ano a kaye embwe, oloni tunatambula Munzinzime uje utunda kuli Njambi, ngeci tuzivuke vyoshe vije vyanatwana Njambi.
13Ngecivene, kutwendeka na majwi a vilongesa vya mana a vanu, oloni na majwi aje atulongesa Munzinzime,#2:13 MAJWI AJE AALONGESA MUNZINZIME: Nambe, kuli vaje vali na Munzinzime. omo tulumbununa vushunga vwa munzinzime kuli vaje vali na Munzinzime. 14Woshe uje kesi na Munzinzime kasa kutambula mavwana aje atunda kuli Munzinzime wa Njambi. Munu wangacije kasa kuwazivisisa, anapu angoco kuli ikeye, omwo seo yawo vanaiseteka na munzinzime. 15Woshe uje ali na Munzinzime asa kuseteka seo ya vyuma vyoshe, oloni naumo wai asa kumuhisa. 16#Isa 40:13 Ngwe muvyendeka visoneka ngwavyo,
“Iyajo azivuka viyongola vya Shukulu Kalunga?
Iyajo asa kumunangula?”
Yetu nameme ngoco, tuli na viyongola vya Kilistu.
Currently Selected:
1 Kolinte 2: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006