Hebreos 3
3
1Jex wuẍtaj, jex wanabꞌ, sicꞌbꞌil jex xa el yu Dios. Jix jex oc can yetoj Dios yutol jaꞌ Dios jix jex awteni. Naꞌwej yin Naj Cristo Jesús. Jaꞌton Naj ẍejabꞌ Dios cꞌal Yaawil yakꞌomal xaambꞌal yin masanil tzettaj yetal chi kaoc yin cu cꞌul. 2Jaꞌ Naj Jesús, sicꞌbꞌil el Naj yu smulnail yu Dios. Caw jijem jix yute sbꞌa Naj yin smulnail, jaxca cꞌal jix yute sbꞌa naj Moisés, jijem jix yun smulna naj xol masanil ebꞌ yuninal Dios. 3Jaꞌ Naj Jesús tiꞌ, yel miman yeloc apnoj Naj yintaj naj Moisés, jaxca junoj naj chi waꞌnen junoj na, yel miman yeloc apnoj naj yintaj jun na tuꞌ. 4Junjun na, sowalil ey mac chi waꞌneni. Jaꞌ pax masanil tzettaj yetal ey, jaꞌ cu Mam Dios jix waꞌneni. 5Jaxca cꞌal tuꞌ, naj Moisés, jijem jix yute sbꞌa naj chejabꞌil xol masanil ebꞌ yuninal Dios. Jaꞌ tzet jix yun naj Moisés, txꞌoxbꞌanile yeoc naj yin tzettaj yetal oj juloj. 6Jal pax Naj Cristo xin, jijem chi yute sbꞌa Naj jaxca junoj Cꞌaale yin ebꞌ yuninal Dios. Jaon tiꞌ yuninal jon Dios ta jijem chi kute cu bꞌa, catuꞌ chi kaoc cu cꞌul yin Dios yin junelne. 7Yu jun tuꞌ, yuxan chi yal Santo Espíritu yul An Juun jaxca tiꞌ:
Jaꞌ yet jun tiempoal tiꞌ xin, ta che yabꞌ tzet chi yal Dios,
8man caw oj che yute je naꞌbꞌal jaxca jix yun ebꞌ yet peyxa tuꞌ. Ma sjije ebꞌ tzet chi yal Dios, catuꞌ chi yoche ebꞌ chi yotajne eloj jantaj spenail chi skeꞌ chi yun ebꞌ yet cꞌamto chi jul syaꞌtajilal yibꞌan ebꞌ yu Dios bꞌey jun cusiltaj txꞌotxꞌ tuꞌ.
9Caxcꞌal jix yil ebꞌ je yichmam tzet jix wun yin cawinaj abꞌil an, jix jin yakꞌ cꞌal pax porobꞌal ebꞌ bꞌey jun txꞌotxꞌ tuꞌ an.
10Yuxan jix tit jin jowal yin ebꞌ an, catuꞌ jix walon can yin ebꞌ: Txꞌoj cꞌal bꞌey jix yaoc snaꞌbꞌal ebꞌ yin tobꞌalkꞌinal. Catuꞌ cꞌam chi yoche ebꞌ chi yotajne el jin bꞌeybꞌal an.
11Yuxan jix tit jin jowal yin ebꞌ an. Jix walon can yin ebꞌ an, tol cꞌam bꞌakꞌin oj octej ebꞌ xew wetoj an, ẍi Yespíritu Dios yin ebꞌ.#Salmos 95:7-11.
12Che yil cꞌal je bꞌa jex wuẍtaj, jex wanabꞌ, yet watxꞌ cꞌam junoj mactxequel snan je xol, tol cꞌam chi cawbꞌi el snaꞌbꞌal yin Dios iquis cꞌaltaꞌ ecꞌoj. 13Yet eyto cꞌal jun tiempo tiꞌ jaxca jix yun yalon Naj Santo Espíritu, iptzewej je bꞌa junjun jex yin junjun cꞌu, yet watxꞌ cꞌam chi cawxi je naꞌbꞌal yu junoj spenail chi etnewi. 14Yutol ta tecꞌan cꞌal keoc masantaꞌcꞌal slawubꞌal yin tzettaj yetal eyoc yipoj cu cꞌul yet tax jix cu chaꞌon el yich kaon oc cu cꞌul yin, ey kalon ket yetoj Cristo. 15Yutol jaxca wan lalanto yalon tiꞌ:
Jaꞌ jun tiempoal tiꞌ xin, ta che yabꞌ tzet chi yal Dios, man caw oj che yute je naꞌbꞌal jaxca jix yun ebꞌ yet peyxa tuꞌ.#Salmos 95:7, 8.
16¿Mactxequel ebꞌ jix cawxi el snaꞌbꞌal yin Dios yet jix yabꞌen skꞌane Dios ebꞌ tuꞌ che naꞌ? Jaꞌton masanil ebꞌ iꞌbꞌil eltej yu Moisés bꞌey txꞌotxꞌ Egipto. 17¿Mactxequel ebꞌ bꞌey chi jowbꞌi a cu Mam Dios yin cawinaj abꞌil che naꞌ? Jaꞌton yin ebꞌ pena jix yute sbꞌa bꞌey cusiltaj txꞌotxꞌ tuꞌ. Jaꞌton tituꞌ jix cam can smimanil ebꞌ. 18Jix al-le tet ebꞌ yu Dios, tol cꞌam bꞌakꞌin oj octej ebꞌ xew yetoj. 19Kotaj, tol ma octoj ebꞌ xewoj, yutol ma yaoc scꞌul ebꞌ yin Dios.
Currently Selected:
Hebreos 3: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.