Hebreos 2
2
Manche Cu Bꞌej Cu Teynen Cu Colbꞌanil
1Jaꞌ Naj Scꞌaal Dios, caw miman yeloc apnoj Naj yintaj ebꞌ ángel. Yuxan sowalil chi cu naꞌtej wan tzetyetal jix kabꞌe, yet watxꞌ cꞌam chi cu jitzwi el yin cu colbꞌanil. 2Jaꞌ wan skꞌane Dios jix yal wan ángel yet peyxa tuꞌ, caw yel wan kꞌane tuꞌ. Ta ey mac cꞌam chi jijen wan kꞌane tuꞌ, catuꞌ chi yunen spenail, chi ẍaꞌ spaj junjun ebꞌ. 3Ta chabꞌil spaj yu ebꞌ. ¿Tzet utbꞌil chi yun keltej yalan jun miman syaꞌilal oj tit kibꞌan xin, ta cꞌam chi cu teyne jun miman colbꞌanile tiꞌ? Jaꞌton Naj Kaawil jix alon yu jun colbꞌanile tiꞌ yet sbꞌabꞌelal. Jaꞌ ebꞌ jix abꞌen tzet jix yal Naj, jaꞌ ebꞌ jix txꞌoxon kil tol caw yel wan kꞌane tiꞌ. 4Catuꞌ xꞌoxnaj pax cu Mam Dios ey jon, tol caw yel wan kꞌane tiꞌ, yetoj wan txꞌoxbꞌanile chi qꞌueya cu cꞌul yu yet chi kiloni, yetoj swatxꞌcꞌulal yetoj wan smilagro.* Jaꞌ pax Santo Espíritu, xꞌoxnaj kilwej tol yel wan kꞌane tiꞌ, yutol chi yakꞌ kopiso Naj junjun jon. Jatacꞌalaꞌ tzet opisoal chi el yin scꞌul chi yakꞌ ey jon junjun jon. 5Man oj yakꞌ cu Mam Dios jun acꞌ yul yibꞌankꞌinal tol to oj juloj yul skꞌabꞌ ebꞌ ángel. Jaꞌ yin jun tuꞌ, lalan cu kꞌanabꞌ tinaniꞌ, 6tol jaꞌ yul An Juun Tzꞌibꞌebꞌilcanoj, albꞌilcan yu jun mactxequel jaxca tiꞌ:
¿Tzet yeloc apnoj wan ánima tiꞌ cha naꞌ, jaach Dios, yuxan cha naꞌtej ebꞌ, ma jun yuninal ánima tuꞌ, yuxan cha teyne?
7Txenne tiempoal jix ja wakꞌon can Naj yintaj ebꞌ ángel.
Jix ja wakꞌ watxꞌilal yetoj iꞌoeybꞌail tet Naj.
Jix ja waoc Naj yaawiloj yibꞌan masanil tzettaj yetal jix ja waꞌne.
8Masanil cꞌal jix ja wakꞌcan yalan Naj, ẍi yul An Juun.#Salmos 8:4-6.
Chi yal jaxca tuꞌ, tol jix akꞌle can masanil tzettaj yetal yul skꞌabꞌ ebꞌ ánima yu Dios. Cꞌam junoj tzetyetal ma akꞌle can yul skꞌabꞌ ebꞌ. Yu tuꞌ xin, chi kilaꞌ, tol cꞌamto chi sjije masanil tzettaj yetal ebꞌ ánima tinaniꞌ. 9Yuxan chi kil Naj Jesús. tol jix ale oc Naj yalan yopiso ebꞌ ángel yet eyoc smimanil Naj jaxca ánima yin txenne tiempoal yu Dios. Yu swatxꞌcꞌulal Dios yin ebꞌ ánima, yuxan jix akꞌle cam Jesús yu syaꞌiloj masanil ebꞌ. Jal tinaniꞌ xin, jix cancan swatxꞌilal yetoj iꞌoeybꞌail yin Naj Jesús yutol jix yabꞌ syaꞌil camich Naj. 10Masanil tzettaj yetal waꞌnebꞌil yu Dios, cꞌal masanil tzettaj yetal chi steyne Dios. Catuꞌ chi yoche Dios chi yiꞌ swatxꞌilal masanil ebꞌ yuninal. Yuxan smoo jix waꞌxi Naj Jesús yin tzꞌajanil yu Dios, yutol jaꞌ Naj chi oc Colwawomal yin ebꞌ. Jix waꞌxi Naj yin tzꞌajanil yu yilon syaꞌilal. 11Jaꞌ Jesús chi cu sicꞌon el yu koc yetoj Dios. Jaꞌ mac jon sicꞌbꞌil jon tuꞌ, yetoj jun mac chi sicꞌon el tuꞌ, jacꞌal oc cu Mam. Yuxan cꞌam chi qꞌuixwi Naj Scꞌaal Dios cu yalon oc yuẍtaj oj ma yanabꞌoj. 12Queytuꞌ yalon Naj tet Smam yul An Juun:
Oj wal tet ebꞌ wuẍtaj, ebꞌ wanabꞌ ja wu.
Oj jin bꞌitne wan bꞌit ey jaach an xol ebꞌ ánima yaman ocoj, ẍi Naj tet Smam.#Salmos 22:22.
13Catuꞌ jix yalon pax Naj:
Oj waoc Dios yipoj jin cꞌul. Jix yalon junelxa:
Ey jin ecꞌ xol ebꞌ wuninal jix yakꞌ Dios ey jin an, ẍi Cristo yul An Juun.#Isaías 8:17, 18.
14Masanil ebꞌ uninale junne mimanile yeoc ebꞌ. Queyton tuꞌ Naj Jesús, jix yiꞌ smimanil jaxca ánima. Jix yiꞌ smimanil Naj, yuxan jix skeꞌ scam Naj yu stantzele el yipal naj yaaw camich, jaꞌton naj diablo. 15Queyton tuꞌ, jix yun yelcan xiwcꞌulal ebꞌ ánima chi cami. 16Man yu oj scolcha ebꞌ ángel yuxan jix jul Naj. Jix jul yu scolcha ebꞌ yicꞌaal naj Abraham. 17Yu ton jun tiꞌ xin, yuxan sowalil jix yiꞌ smimanil Naj jaxca ebꞌ yuẍtaj. Yu yoc Naj Yaawiloj yakꞌomal xaambꞌal tet Dios yu ebꞌ ánima, jun chi okꞌ scꞌul yin ebꞌ, catuꞌ jichan chi yute sbꞌeybꞌal yin smulnail. Jaꞌ Naj jix yakꞌ cam sbꞌa yin xaambꞌalil yu yelcan spenail ebꞌ ánima. 18Jaꞌ Naj Jesús, jix yil syaꞌilal, catuꞌ jix akꞌle porobꞌal, ma cꞌal eyqꞌueyoj. Yuxan chi skeꞌ scolwa yin ebꞌ ánima yet chi jul syaꞌilal yibꞌan ebꞌ, ma yet chi akꞌle porobꞌal ebꞌ.
Currently Selected:
Hebreos 2: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.