Ewesu 1
1
Haga Wẽtup 1
1Uiwyriaꞌin tawa Ewesu piaria koitywy atipoꞌoro uimiwan ehewowi. Mesuwat miwan nug hat ti uito Pauru. Eipe ti Tupana saꞌyruꞌin Tupana sakiꞌytꞌin koitywy eipe Aikaꞌiwat Iesui mohey potꞌi haria ti eipe. Saꞌawyꞌi Tupana uiꞌairo hawyi uinug tosaꞌyru wo Aipotypot Iesui potpoꞌoro wo tomikyꞌesat ewy uiꞌairo. 2Pyno mio tã ahẽtup ehewowi Aiꞌywot Tupana kaipyi iꞌewyte Aikaꞌiwat Iesui kaipyi -Etum o ewese hap tawa Ewesu piaria pe emohey haria pe are iꞌewyte etiꞌatupoityro kahato miꞌiria are ahẽtup Tupana pe iꞌewyte Iesui pe ehewowi uiwyriaꞌin are.
3Taꞌi Aikaꞌiwat Iesui iꞌewyte Toꞌywot Tupana aiꞌatupoityro poityro kahato raꞌyn. -Waku kahato En watoꞌe Tupana pe iꞌewyte Aikaꞌiwat Iesui pe watoꞌe -Waku kahato En Tupana watoꞌe aito Iesui mohey haria. Taꞌi atipy kaipyi putꞌok e ahete aipoityro kahato hap. Ahehakyeraꞌat hap tutum naꞌyn ahepe. Wuatꞌi eꞌat piat aimoieineꞌen Tupana kapiat hap tutum ahepe towatnuaria aito pote are. 4Taꞌi saꞌawyꞌi mesuwat yi nug hap eꞌyian mete Tupana aiꞌairo Tosaꞌyru emiit no. Taꞌi aheꞌyian mete aiꞌairo temiitꞌin no are. Miꞌi hawyi toꞌe -Uhaꞌyru mohey haria wo aru miꞌiria hap atiꞌatukuap e. Miꞌi pote ti atunug aru hãpyk miꞌiria uiꞌewywuaria wo raꞌyn e. Yt kat i saꞌag nug haria wo atiꞌatunug miꞌiria e. Pyno yt uwe i te aito turan aiꞌairo Tosaꞌyru emiit no. Aikyꞌe haype yn aiꞌairo mesuwat yi yt kat i te hap eꞌat pe turan aiꞌairo. 5Taꞌi atunug aru Uhaꞌyru mohey haria yne uhaꞌyruꞌin uhakiꞌytꞌin no e. Atum aru Uhaꞌyru iꞌatuepe Iꞌatukaꞌiwat no e ahetiat. Atunug aru miꞌiria uimepytꞌin no uimikyꞌesat ewywuat uimowepiit hamuat e Tupana ahowawi saꞌawyꞌi yt uwe i te mesuwarotiat turan. 6Pyno toꞌiro watuwehum Tupana kape -Egyiꞌat hap yt uwe ewywuat hin i waku watoꞌe. Poꞌog poꞌog torannia kai ewese hap waku watoꞌe. Urukyꞌe hap moherep hamuat etum Esaꞌyru uruepe. Wẽtup yn Esaꞌyru pykai etum neꞌen neꞌi uruepe yt kat saꞌup mo i etum uruepe urutoꞌe waku watoꞌe. Miꞌi ti Esaꞌyru Emikyꞌe kahato etum naꞌyn uruepe uruehakyeraꞌat hamuat. Waku kahato En Tupana urutoꞌe ewowi. 7Taꞌi Emipoꞌoro uruporekuat no ikuꞌuro hawyi uruminug saꞌag po pyi urutuwẽtem naꞌyn iꞌewyte uruminug saꞌag haꞌawytewuat etiꞌatuwaure waure raꞌyn En. Waku kahato En. En ni poꞌog poꞌog torannia kai hegyiꞌat rakat urutoꞌe ewowi Tupana urutoꞌe. Esaꞌyru suu ti urukyiꞌat ewatnuat hap urutoꞌe. 8Etum neꞌen neꞌi yne yne iwato kahato sakpo emiium etum yne yne. Waku kahato En urutoꞌe. Ewese kahato uruto yt uruwese i pykai urutoꞌe. Eweꞌeg hap oktan egyiꞌat hap oktan urukyꞌe hap urutoꞌe. Urutuwehum kahato ewowi Tupana katupono koitywy etunug naꞌyn ereꞌe saꞌawyꞌi wuat hap emikyꞌesat oktan urutoꞌe ewowi. 9Saꞌawyꞌi emikyꞌesat ewy ereꞌe ewepe -Atum aru Uhaꞌyru pe wuatꞌi ywania ere. Atum neꞌen neꞌi aru Uhaꞌyru wuatꞌi miitꞌin me Iꞌatuporekuat no. Uimowepiit hap ewy atum aru ereꞌe saꞌawyꞌi ewepe ewanetup hawe yt kat i miitꞌin te turan. Tupana uruikuap teran kat pote urukyꞌe kahato hap. Miꞌi tã yt uruikuap hin i te wen maꞌato urukyꞌe hap miꞌi uruikuap taꞌyn. Waku kahato En urutoꞌe epe Tupana.
10Mio tã e saꞌawyꞌi Tupana -Putꞌok e uheꞌat aru hawyi atunug sese ti Uhaꞌyru wuatꞌi Porekuat no e tuwepe iꞌewyte yne atipy piaria Porekuat no iꞌewyte yne yi totiaria Porekuat no e tuwepe. Uhaꞌyru suu wo atiꞌatumowehik sok torannia yi totiaria atipy piaria uhowowi e. Miꞌi hawyi wẽtup piit ewy yn naꞌyn watopyhuꞌat wuatꞌi uiminug koꞌi uikai tukupteꞌen e tuwepe Tupana wuatꞌi tominug koꞌi pe tukupteꞌen yian mete turan. 11Yne tomikyꞌesat ewy Tupana saꞌawyꞌi aiꞌairo raꞌyn tomikyꞌesat ewy. Miꞌi hawyi ainug tosakiꞌytꞌin no tosaꞌyruꞌin no Aheykeꞌet Aikywyt Iesui ewywuat ainug wẽtup miit mepytꞌin koꞌi ewywuat ainug naꞌyn aito watimohey Iesui hawyi. Tomikyꞌesat ewy tutum aru ahepe topowatꞌyp yne yne. Hekat kahato rakaria wo watopyhuꞌat wuatꞌi eꞌat pe aikotã toꞌe saꞌawyꞌi wuat hap ewy raꞌyn tutum ahepe. 12Pyno toꞌiro watuwehum Tupana kape katupono aito ti iraniaꞌin eꞌyian miat imohey haria iraniaꞌin eꞌyian miat watunug Iesui Aiporekuat no. Waku kahato watoꞌe aiwoꞌope miꞌi hap ete maꞌato meiũran aru iꞌatu kahato ahaipepiaria Iesui mohey haria tukupteꞌen kahato Tupana motypot wuatꞌi eꞌat piaria. Waku kahato are.
13Pyno mesup taꞌyn uruꞌewywuaria raꞌyn Tupana ehay pywuat rakat Iesui etiat uruwẽ pyi hawyi mekewat sehay Ehehakyeraꞌat hat moherep hap topyhuꞌat. Miꞌi e hap etikuap hawyi Aikaꞌiwat Iesui mohey haria sok eweikupteꞌen. Waku kahato are. Miꞌi hawyi ti aru Tupana tum naꞌyn Topaꞌãu ahepe toꞌe hap ewy tutum. Miꞌi hawyi mesup -Miꞌiria ti uiatnuaria e ehepe. Tutunug toset ehepe -Miꞌiria wyti uiat e wuatꞌi miitꞌin me Tupana Paꞌãu. 14Tupana tum naꞌyn Topaꞌãu ahepe. Miꞌi tutum mote mesup watikuap iꞌewyte tutum aru ahepe kat e hap kat e hap -Atum aru uimepytꞌin me e hap koꞌi ewy. Tutum naꞌyn yne saꞌup yne aiminug saꞌag hep hamuat Tosaꞌyru suu. Miꞌi pote watikuap taꞌyn mesup yt kat i saꞌag toipuẽti aikai. Watoineꞌen iwywo turan tuwehum ahowawi yt kat i aikai yt naku i pote yt kat i aipit pit hap. -Waku kahato En Tupana watoꞌe aru wuatꞌi eꞌat pe. Waku En waku En katupono uruhep ahiag po pywiat hat En urutoꞌe aru wuatꞌi eꞌat pe aru.
Pauru Hẽtup Kahato Tupana Kape Imohey Haria Powyro Hap
15Gaꞌatpo atikuap ehetiat sehay -Koitywy tawa Ewesu piaria Aipotypot Iesui mohey kahato haria tukupteꞌen. Poꞌog imohey haria mio saꞌawyꞌi wuat kai iꞌatuꞌe uruepe. Iꞌewyte Tupana emiitꞌin kyꞌe kahato haria tukupteꞌen miꞌiria iꞌatuꞌe ehepiat pe. 16Mio tã iꞌatuꞌe hap atikuap hawyi arehum kahato aat kaꞌap mesuwe -Uhetupana are waku kahato En katupono mesup tawa Ewesu piaria Esaꞌyru mohey kahato haria tukupteꞌen naꞌyn mesup iꞌewyte woꞌokyꞌe haria tukupteꞌen are aat kaꞌap Tupana pe. 17-Uruꞌywot koro En ni urupotypot Iesui eTupana are. Etum no Epaꞌãu poꞌog tawa Ewesu piaria pe ekuap poꞌog poꞌog mono areꞌe Tupana pe. Uwe En sese hap kuap hamuat atikyꞌesat. Epaꞌãu kaipyi iweꞌeg kahato rakaria wo tukupteꞌen hap atikyꞌesat are. Etiꞌatumoẽtyhot ro iꞌatuwanetup hap are. Etihep yt iꞌatuehapytig i hap miꞌi hawyi heremo iꞌatuwanetup hawe etum Esaꞌyru mohey hap Tupana are. 18Tupana areꞌe etum no Esaꞌyru mohey haria tapyiꞌa Ewesu piaria pe ewanetup hap kuap hamo hap are. Etum no iꞌatuepe ewanetup kuap hap kat hamo etiꞌatuꞌairo miꞌiria emiitꞌin no are. Etimoherep to iꞌatuepe emikyꞌesat koꞌi nug neran hap koꞌi are. Etimoherep iꞌatuepe aikotã aru tukupteꞌen atipy pe esaꞌyruꞌin wo esakiꞌytꞌin wo hap are. Etimoherep iꞌatuepe kat som atipy pe are. Etimoherep iꞌatuepe aikotã aru atipy pe emotypot haria tukupteꞌen hap are. Etimoherep iꞌatuepe aikotã aru ewaku hap ewywuaria tukupteꞌen hap are. Tupana ewaku hap ekahu hap ewato hap etimoherep emiitꞌin me tawa Ewesu piaria pe are aat kaꞌap ehetiatno uiwyriaꞌin. 19Tupana areꞌe etimoherep emiitꞌin me esaika hap kuap hap are. Esaika hap iwato kahato uruewawi Esaꞌyru mohey haria pe aikotã karãpe saꞌawyꞌi etihep Esaꞌyru guꞌuro pyi hap ewy esaika hap. Tupana etimoherep miꞌi tã esaika hap Esaꞌyru mohey haria pe are. 20Tupana esaika hap iwato kahato uruete are aikotã saꞌawyꞌi etihep urukaꞌiwat guꞌuro pyi hap ewy esaika are. Miꞌi hawyi -Eraꞌapyk o meiũpe uipo sese kai ere itote Esaꞌyru pe. Eraꞌapyk to mesuwe atipy pe ere. Miꞌi hawyi topyhuꞌat eꞌe hap ewy esaika sese hap ewywuat topyhuꞌat. Esaika kahato hap ewy etimoherep uruepe Esaꞌyru mohey haria pe are Tupana pe aat kaꞌap.
21Aiꞌakag Iesui topyhuꞌat Wuatꞌi Akag wo. Toineꞌen ni Morekuat Koro wo are. Aiꞌakag wo toineꞌen maꞌato iꞌewyte Wuatꞌi Akag wo atipy pe toineꞌen. Morekuaria Porekuat no topyhuꞌat Iesui are. Tuꞌisaria Porekuat no topyhuꞌat. Surara Akag Koro wo topyhuꞌat. Iesui set poꞌog Tupana mimotypot no wuatꞌi miitꞌin set kai. Poꞌog poꞌog wuatꞌi kai Aikaꞌiwat mesuwat iꞌewyte wuatꞌi eꞌat pe. 22Katupono Tupana tunug yne yne Iesui py ywytꞌokpype. Aikaꞌiwat wuatꞌi okpe tote toineꞌen. Miꞌi hawyi iꞌewyte aito imohey haria Akag Koro wo topyhuꞌat Iesui Tupana mikyꞌesat ewy. 23Pyno yne aito Iesui mohey haria watopyhuꞌat Iesui wywo wẽtup piit ewy yn. Iwywo watoineꞌen wẽtup ok miit ewy. Iesui piit no watoineꞌen mesup mesuwat yi tote are. Atipy pe iꞌewyte watoineꞌen iraniaꞌin imohey haria wẽtup piit ewy yn watoineꞌen aito. Imohey haria ipiit ewywuat watopyhuꞌat. Aikope Aikope Atipy pe mesuwat yi tote yne tote Aipotypot Iesui toineꞌen Morekuat Koro wo.
Currently Selected:
Ewesu 1: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.